Farhat Buulus be toobithum
7
Ya akhwaani al-nihibbuku,
khalli nifakkuru fi l-kalaam al-Allah gaalah da wa nitahhuru jisimna wa guluubna min ayyi cheyy al-yinajjisna lahaddi niʼiichu be haal saalhe wa be takhwa tamaam.
2 Aftaho guluubku leena.
Aniina ma zalamna naadum wa ma azeena naadum wa ma khachcheena naadum.
3 Wa ma gult al-kalaam da achaan nidoor nuluumku.
Misil awwal gultah,
intu gaaʼidiin fi guluubna wa achaan da,
niʼiichu sawa wa numuutu sawa.
4 Nihajji beeku daayman be farha.
Ana farhaan minku bilheen.
Chajjaʼtuuni chajaaʼa chadiide bilheen.
Wa khalaas,
fi usut kulla suʼuubaatna,
indi farah ziyaada.
5 Wa wakit jiina fi Magiduuniya kula,
ma ligiina raaha.
Tiʼibna wa fi ayyi bakaan ligiina machaakil wa l-khoof gaaʼid fi guluubna.
6 Laakin Allah al-yichajjiʼ al-taʼbaaniin chajjaʼaana be jayyit akhuuna Tiitus.
7 Wa chajaaʼitna di ma be sabab jaytah bas.
La.
Al-khabar al-jaabah minku chajjaʼaana ziyaada.
Hu ooraana be kikkeef intu chajjaʼtuuh.
Wa gaal intu garmaaniin leyi wa haznaaniin le l-muchkila al-bigat wa induku hamiisa leyi fi guluubku.
Wa achaan da,
ana farhaan farha kabiire.
8 Kan jawaabi jaab hizin fi guluubku kula,
ana ma nadmaan leyah.
Sahiih,
awwal nidimt leyah.
Laakin hassaʼ naʼarif jawaabi da jaab hizin fi guluubku laakin al-hizin da ma tawwal.
9 Wa hassaʼ da,
ana farhaan.
Ana ma farhaan be hizinku.
Ana farhaan achaan al-hizin waddaaku le l-tooba.
Al-hizin da ja min Allah wa achaan da,
ma khassarnaaku cheyy.
10 Achaan al-hizin al-yaji min Allah yisabbib al-tooba al-tiwaddiina le l-naja wa ma yijiib al-nadaama.
Laakin al-hizin al-naas al-dunya yisabbubuuh,
yiwaddiihum le l-moot.
11 Fakkuru fi l-cheyy al-sabbab leeku al-hizin al-ja min Allah da.
Intu waajahtu al-muchkila be niiye waahide.
Wa ajala ke daafaʼtu le nufuusku wa ziʼiltu min al-khaati.
Wa khuftu khoof chadiid wa bigiitu garmaaniin leyi ziyaada.
Wa galibku gamma wa addabtu al-muznib.
Wa khalaas,
be ayyi daliil intu wassaftu kadar intu bariʼiin min kulla l-kalaam da.
12 Sahiih,
ana katabt leeku jawaab yoom daak laakin ma katabtah fi chaan al-zaalim wa la fi chaan al-mazluum.
Ana katabtah fi chaan hamiisitku leena tibiin leeku giddaam Allah.
13 Wa da chajjaʼaana bilheen.
Firihna be sabab al-chajaaʼa al-ligiinaaha di.
Wa firihna ziyaada be farhat Tiitus achaan awwal galbah muʼallag wa intu raggadtu galbah marra waahid.
14 Achaan awwal raasi marfuuʼ wakit ana ooreetah beeku wa khalaas kalaami da ma khajjalaani.
Misil kulla l-kalaam al-gulna leeku sahiih,
al-kalaam al-gultah fiiku le Tiitus,
da kula bigi sahiih.
15 Wa hu gaaʼid yifakkir fiiku wa fi kikkeef intu kulluku simiʼtu kalaamah wa karabtuuh adiil wa karramtuuh be ihtiraam tamaam wa khalaas,
hu yihibbuku katiir.
16 Wa ana nafrah achaan achami foogku saabit.