6
Wa khalaas aniina nakhdumu maʼa Allah wa achaan da niwassuuku.
Akiid khibiltu niʼmat Allah wa hassaʼ da,
akurbuuha gawi achaan talgo minha al-faayde al-kaamile.
2 Achaan fi l-Kitaab,
Allah gaal <Fi l-wakit al-ana ridiit beyah,
ana khibilt duʼaak.
Aywa,
fi yoom al-naja,
ana fazaʼtak>.
Asmaʼo,
da bas al-wakit al-Allah yarda beyah.
Da bas yoom al-naja.
Haal al-rasuul fi l-taʼab
3 Wa abadan ma nisiddu le ayyi naadum al-derib al-yiwaddiih le Allah achaan ma nidooru nijiibu loom fi khidmitna.
4 Wa be haalna wassafna fi kulla cheyy kadar aniina khaddaamiin Allah.
Sabarna sabur gawi fi taʼab chadiid wa diige wa suʼuubaat.
5 Farachoona wa sajjanoona wa asbahna fi ust al-barjala.
Khadamna be duraaʼna.
Fagadna al-noom wa l-akil.
6 Wa wassafna kadar aniina khaddaamiin Allah be haalna al-samhe wa ilimna wa saburna wa galibna al-abyad wa l-Ruuh al-Khudduus al-gaaʼid foogna wa mahabbitna al-mukhlisa.
7 Kalaamna kalaam al-hagg wa nakhdumu be gudrat Allah.
Al-haal al-saalhe bas silaahna fi iidna al-zeene wa fi iidna al-isra.
8 Wa nakhdumu le Allah kan yikarrumuuna walla yahguruuna,
kan yiʼayyuruuna walla yachkuruuna.
Buguulu aniina kaddaabiin wa laakin aniina saadikhiin.
9 Buguulu aniina naas ma maʼruufiin wa laakin Allah chaahid leena.
Buguulu mutna wa chiifu aniina hayyiin.
Aniina azzaboona chadiid laakin ma kataloona.
10 Indina hizin wa laakin nafraho daayman.
Aniina masaakiin wa laakin nijiibu le katiir min al-naas baraka katiire.
Ma indina cheyy wa laakin kulla cheyy hanaana.
11 Ya akhwaanna fi Kuruntus,
kallamna leeku be kalaam waadih.
Fatahna leeku guluubna.
12 Aniina ma saddeena leeku derib wa laakin intu bas saddeetu leena deribku.
13 Nihajji leeku misil intu iyaali.
Sawwu leena al-sawweena leeku.
Aftaho leena guluubku.
Beet Allah al-Hayy
14 Ma tadkhulu fi alaakha maʼa l-naas al-ma muʼminiin achaan intu ma sawa.
Kikkeef haal al-saalihiin wa haal al-aasiyiin yabgo waahid ?
Kikkeef al-nuur wa l-dalaam yilimmu ?
15 Kikkeef al-Masiih wa Ibliis yittafugu ?
Hal fi cheyy al-yarbut al-muʼmin maʼa l-ma muʼmin ?
16 Wa ween al-alaakha been beet ibaadit Allah wa beet ibaadit al-asnaam ?
Wa aniina bas Beet Allah al-Hayy.
Wa fi l-Kitaab,
Allah gaal <Naskun fooghum wa nuruukh ambeenaathum wa nabga Rabbuhum wa humman yabgo chaʼabi.
17 Achaan da,
amurgu min usuthum wa anfasulu minhum.
Da bas kalaam Allah.
Ma talmaso cheyy nijis wa ana nakhbalku
18 wa nabga Abuuku wa intu tabgo awlaadi wa banaati.
Ana Allah al-Gaadir wa ana bas gultah>.