Al-haal al-waajbe
5
Intu iyaal Allah al-yihibbuku wa achaan da,
khalli haalku tabga misil haalah.
2 Iichu be l-mahabba al-misil mahabbat al-Masiih al-yihibbina lahaddi fadaana be ruuhah wa bigi misil hadiiye le Allah wa misil dahiiye al-tiraddi Allah.
3 Laakin al-zina wa l-haal al-cheene wa l-tamaʼ khalli yabgo ma fiihum ambeenaatku marra waahid.
Wa ma tihajju fooghum zaatah.
Dool ma afʼaal hana l-naas al-saalihiin.
4 Abadan ma tihajju kalaam cheen wa la kalaam hana l-safaaha wa abadan ma talʼabo ambeenaatku be kalaam fasil.
Kulla l-kalaam al-misil da ma waajib.
Fi badalah,
hajju be chukur.
5 Niʼakkid leeku kan naadum zannaay walla nijis walla tammaaʼ,
hu ma yalga cheyy fi Mamlakat Allah wa l-Masiih.
Al-tamaʼ hu misil ibaadat al-asnaam.
6 Ma tikhallu naadum yukhuchchuku be kalaam baatil.
Be sabab al-zunuub al-misil dool,
Allah yinazzil khadabah foog al-aasiyiin.
7 Achaan da,
ma tichaarukuuhum fi haalhum.
Ahal al-nuur
8 Awwal intu bas al-dalaam wa laakin hassaʼ bigiitu nuur be alaakhitku maʼa l-Rabb.
Iichu be l-haal al-waajbe le ahal al-nuur.
9 Achaan nuur Allah yijiib al-kheer wa l-haal al-saalhe wa l-hagg wa hu yimagginhum fi guluub al-naas.
10 Aʼarfu tamaam al-cheyy al-yiraddi al-Rabb.
11 Ma tichaaruku fi amal hana ahal al-dalaam al-ma yimaggin cheyy adiil.
Akheer afdaho al-cheyy al-humman gaaʼidiin yisawwuuh.
12 Achaan al-cheyy al-humman gaaʼidiin yisawwuuh be talbiid cheen bilheen lahaddi nakhjalo kan nihajju beyah.
13 Achaan ayyi cheyy kan ankachaf fi l-nuur khalaas yinchaaf.
14 Wa ayyi cheyy al-yinchaaf yinʼarif be l-sahiih.
Achaan da,
nuguulu «
He ya l-naayim,
gumm foog !
Gumm min ust al-maytiin wa l-Masiih yidaawi foogak ».
15 Fakkuru tamaam fi haalku.
Ma tiʼiichu be haal al-jaahiliin laakin be haal al-faahimiin.
16 Sawwu al-kheer be kulla daliil achaan al-zaman al-gaaʼidiin foogah da fasil.
17 Ma tabgo mataamiis laakin afhamo muraadat al-Rabb.
18 Ma taskaro be l-khamar achaan al-khamar yisabbib illa l-kharaab.
Laakin khalli Allah yamlaaku be l-Ruuh al-Khudduus.
19 Achchaajaʼo ambeenaatku be tasaabiih wa anaachiid wa madih min al-Ruuh al-Khudduus.
Sabbuhu wa amdaho le Rabbina be niiye waahide.
20 Achkuru Allah Abuuna fi kulla wakit wa fi kulla cheyy be usum Rabbina Isa al-Masiih.
Wasaaya le l-rujaal wa l-awiin
21 Abgo daluuliin ambeenaatku wa khalli ayyi waahid yikarrim al-aakhar fi chaan al-Masiih.
22 Asmaʼo ya l-awiin,
khalli ayyi mara tikarrim raajilha misil hi tikarrim al-Rabb.
23 Achaan al-raajil hu raʼiis martah misil al-Masiih hu raʼiis ummatah.
Wa ummatah hi jismah wa hu zaatah Munajji jismah.
24 Wa misil ummat al-Masiih tikarrim al-Masiih,
khalli kulla mara tikarrim raajilha fi kulla cheyy.
25 Asmaʼo ya l-rujaal,
hibbu awiinku misil al-Masiih yihibb ummatah al-fadaaha be ruuhah
26 achaan hi tabga umma saalhe.
Hu naddafaaha be khattisiin fi almi wa be kalaam Allah
27 achaan yigaddimha le nafsah umma samhe bilheen bala najaasa wa la wasakh wa la ayyi cheyy al-bitallifha lahaddi tabga khaassa leyah wa bala ayyi eeb.
28 Wa kulla raajil waajib yihibb martah misil yihibb jildah.
Al-yihibb martah yihibb nafsah.
29 Abadan ma fi raajil al-yakrah laham jismah.
Be l-aks,
hu yiʼayyichah wa yirayyisah misil al-Masiih yirayyis ummatah.
30 Wa ayyi waahid minnina udu min jismah.
31 Wa l-Kitaab buguul <Fi l-sabab da,
ayyi raajil yikhalli ammah wa abuuh wa yilimm maʼa martah wa l-naaseen dool yabgo jisim waahid*>.
32 Al-kalaam da sirr aziim.
Ana nuguul leeku al-kalaam da bukhuss al-Masiih wa ummatah.
33 Wa bukhussuku intu kula.
Khalli ayyi raajil minku yihibb martah misil yihibb nafsah wa ayyi mara waajib tikarrim raajilha.