Al-haya al-jadiide be l-Masiih
3
Akiid ligiitu haya jadiide fi buʼaas al-Masiih wa achaan da,
khuttu baalku fi l-achya al-gaaʼidiin fi l-sama maʼa l-Masiih al-gaaʼid jamb Allah fi nussah al-zeenaay.
2 Khuttu afkaarku fi l-khumaam al-samaawi wa ma fi khumaam al-ard
3 achaan intu muttu maʼa l-Masiih wa l-haya al-Allah antaaha leeku hi lissaaʼ ma tinchaaf.
Hi maʼa l-Masiih fi iideen Allah.
4 Al-Masiih hu bigi leeku al-haya wa wakit hu yaji battaan intu tibiinu maʼaayah fi majdah.
5 Achaan da,
guchchu marra waahid min guluubku kulla cheyy al-min al-ard misil al-zina wa l-haal al-cheene wa l-chahwaat al-fasliin wa l-niiye al-fasle wa l-tamaʼ.
Wa be l-sahiih,
al-tamaʼ hu ibaadat al-asnaam.
6 Fi chaan al-zunuub dool,
khadab Allah yanzil foog al-aasiyiin.
7 Wa awwal,
intu kula haalku kaanat misil haalhum wakit intu gaaʼidiin titaabuʼu al-chahwaat dool.
8 Laakin hassaʼ khallu minku kulla cheyy al-ma adiil.
Sillu min guluubku al-zaʼal wa l-khabiine wa l-hasiife wa l-gatiiʼe wa l-kalaam al-cheen.
9 Ma takdubu le akhwaanku battaan achaan intu khalleetu al-haal al-gadiime maʼa kulla aadaatha.
10 Intu chiltu al-haya al-jadiide wa Allah gaaʼid yijaddidku wa yiziid leeku al-irfe lahaddi tichaabuhu misil suurat Allah al-khalagaaku.
11 Wa fi l-haya al-jadiide di,
ma muhimm battaan kan naadum Yahuudi walla ma Yahuudi,
wa kan hu mutahhar walla ma mutahhar,
wa kan hu ajnabi walla min al-kadaade walla abid walla hurr.
Laakin al-Masiih bas al-muhimm wa hu gaaʼid fiina kullina.
12 Ya naas al-Allah ikhtaaraaku,
bigiitu saalihiin wa mahbuubiin.
Achaan da,
albaso al-mahanna wa khalli guluubku yabgo buyud wa nafasku yabga baarid wa abgo daluuliin wa sabuuriin.
13 Wa sabburu nafisku ambeenaatku be l-mahabba.
Wa kan naadum indah chakwa foog akhuuh,
khalli yisaamihah.
Al-Rabb saamahaaku wa achaan da,
waajib leeku tissaamaho ambeenaatku.
14 Wa ziidu le kulla l-achya dool al-mahabba al-tarbut kulla cheyy tamaam wa tijiib al-wihda.
15 Khallu salaam al-Masiih yamluk fi guluubku achaan Allah naadaaku le tiʼiichu fi l-salaam wa jaʼalaaku jisim waahid.
Wa abgo chakuuriin.
16 Khallu kalaam al-Masiih yaskun ambeenaatku be kulla barakaatah.
Allumu beyah ayyi waahid wa achchaajaʼo ambeenaatku be irfe tamaam.
Achkuru Allah fi guluubku wa sabbuhu le Allah be tasaabiih wa anaachiid wa madih min al-Ruuh al-Khudduus.
17 Wa kulla cheyy al-tisawwuuh,
kan be kalaam walla be fiʼil,
sawwuuh be usum al-Rabb Isa wa be usmah achkuru Allah Abuuku.
Al-beet al-Masiihi
18 Ya l-awiin,
asmaʼan kalaam rujaalkan misil waajib le l-awiin al-yitaabiʼan al-Rabb.
19 Ya l-rujaal,
hibbu awiinku wa ma takurbu leehin fi guluubku.
20 Ya l-iyaal,
taabuʼu kalaam waaldeenku fi kulla cheyy achaan da yiraddi Rabbina.
21 Ya abbahaat al-iyaal,
ma tizaʼʼulu iyaalku.
Kan tizaʼʼuluuhum ziyaada akuun yaksalo.
22 Ya l-abiid,
fi kulla cheyy taabuʼu kalaam al-naas al-bigo siyaadku fi l-dunya.
Taabuʼu kalaamhum daayman wa ma wakit humman gaaʼidiin yichiifuuku bas wa la wakit tidooru minhum al-chukur.
Laakin taabuʼu kalaamhum be niiye mukhlisa achaan Rabbina hu siidku al-intu khaayfiin minnah.
23 Ayyi khidme al-yantuuku,
akhdumuuha be niiye waahide.
Khuttu fi afkaarku kadar takhdumu le Rabbina wa ma le l-naas bas.
24 Aʼarfu kadar talgo warasa min al-Rabb wa di bas ujratku.
Intu gaaʼidiin takhdumu le Rabbina al-Masiih.
25 Wa ayyi naadum al-yisawwi cheyy fasil,
al-Rabb yiʼaakhibah fi chaan fasaaltah.
Rabbina ma yifannid al-naas.