Jawaabaat al-Rasuul Buulus le Tasaluuniiki
1
Jawaab minni ana Buulus wa akhwaani Siila wa Timuutaawus le ummat al-Masiih al-fi hillit Tasaluuniiki,
chaʼab hana Allah Abuuna wa Rabbina Isa al-Masiih.
Aleekum al-salaam wa l-rahma.
Haal al-muʼminiin wa iimaanhum
2 Aniina nachkuru Allah daayman fi chaanku kulluku wa nasʼalo leeku Allah fi kulla salaawaatna.
3 Wa ayyi wakit al-nasʼalo leeku Abuuna Allah,
nifakkuru fi l-amal al-sawweetuuh be l-iimaan wa l-khidme al-sawweetuuha be l-mahabba wa achamku al-gawi foog Rabbina Isa al-Masiih.
4 Ya akhwaanna al-Allah yihibbuku,
naʼarfu hu ikhtaaraaku
5 achaan al-bichaara al-ballakhnaaha leeku ma jaat leeku be kalaam bas laakin be gudra wa be khidmit al-Ruuh al-Khudduus wa be acham muʼakkad.
Wa intu chiftu haalna maʼaaku wa khidmitna fi chaanku.
6 Wa intu chiltu masalna wa haalku bigat misil haalna wa misil haal hana Rabbina Isa.
Wakit al-naas gaaʼidiin yitaʼʼubuuku bilheen kula,
intu khibiltu al-kalaam be l-farah al-jaayi min al-Ruuh al-Khudduus.
7 Wa be da intu bigiitu masal adiil le kulla l-muʼminiin al-fi buldaan Magiduuniya wa l-Yuunaan.
8 Minku intu,
bichaarat al-Rabb chattat machat baʼiid,
ma fi Magiduuniya wa l-Yuunaan bas wa laakin lihgat kulla bakaan.
Kan ma nuguulu cheyy fiiku kula,
iimaanku be Allah maʼruuf.
9 Fi ayyi bakaan al-naas gaaʼidiin yihajju beeku wa yuguulu kadar intu karabtuuna adiil wa tubtu le Allah.
Wa yuguulu intu khalleetu minku al-asnaam achaan taʼabudu Allah al-Waahid al-Hayy
10 wa tarjo Ibnah al-yigabbil min al-samaawaat wa hu Isa al-Allah baʼasah min ust al-maytiin wa yinajjiina min al-khadab al-jaayi.