Khidmit al-Rasuul fi Tasaluuniiki
2
Ya akhwaanna,
intu zaatku taʼarfu khidmitna ambeenaatku ma fachalat.
2 Taʼarfu kadar jiina leeku min hillit Filibbi al-taʼʼaboona wa ayyaroona foogha bilheen.
Laakin Allah antaana chajaaʼa wa gammeena niballukhu leeku bichaarat Allah,
kan al-naas gaaʼidiin yikhaalufuuna be niiye waahide kula.
3 Wa da yiwassif kadar ninaadu al-naas fi l-derib al-adiil ma be l-kidib wa la be l-niiye al-fasle wa la be l-najaada.
4 Be l-aks,
Allah chaaf guluubna wa kallafaana be l-bichaara wa achaan da bas nibachchuru al-naas.
Wa nibachchuruuhum da,
ma achaan nidooru rida minhum laakin achaan nidooru rida min Allah al-yihaasib guluubna.
5 Abadan ma hajjeena kalaam halu hana khachch.
Wa abadan ma indina tamaʼ achaan naakulu maal hana ayyi naadum.
Allah chaahid le kalaamna.
6 Wa kulla cheyy al-sawweenaah ma achaan nidooru chukur min al-naas wa la minku wa la min al-naas al-aakhariin.
Aniina rusul al-Masiih wa indina hagg achaan natlubu minku cheyy katiir laakin aniina ma chilna minku cheyy.
7 Wakit aniina gaaʼidiin fi usutku,
hanneena fiiku misil al-amm al-tirayyis iyaalha al-dugaag.
8 Aniina gaaʼidiin nihinnu foogku wa achaan da,
dawwarna nantuuku al-bichaara.
Wa ziyaada min da,
dawwarna nantuuku nufuusna achaan nihibbuuku bilheen.
9 Ya akhwaanna,
ma tanso taʼabna wa amalna.
Leel wa nahaar khadamna be duraaʼna.
Ma dawwarna nikallufu naadum minku beena wakit aniina gaaʼidiin niballukhu leeku bichaarat Allah.
10 Intu zaatku tagdaro tachhado leena wa Allah kula chaahid kadar haalna maʼaaku intu al-muʼminiin hi saalhe wa taybe wa ma indaha eeb.
11 Wa taʼarfu kadar hajjeena le ayyi naadum minku misil aniina abbahaatku wa misil intu iyaalna halaalna.
12 Wa aniina daayman chajjaʼnaaku wa sabbarnaaku wa wasseenaaku be chidde achaan tiʼiichu be l-haal al-waajbe le l-naas al-Allah naadaahum le yadkhulu fi mamlakatah wa majdah.
13 Wa nachkuru Allah daayman achaan wakit simiʼtu minnina kalaam Allah,
karabtuuh gawi.
Khibiltuuh ma misil hu kalaam insaani bas laakin khibiltuuh misil hu kalaam Allah.
Wa be l-sahiih,
hu kalaam Allah wa gaaʼid yisawwi khidimtah fi guluubku intu al-muʼminiin.
14 Ya akhwaanna,
intu taabaʼtu nafs al-derib misil akhwaanku al-muʼminiin be Allah al-yitaabuʼu al-Masiih Isa fi daar al-Yahuudiiya.
Wa intu bigiitu misilhum.
Naas baladku taʼʼabooku misil al-Yahuud kula taʼʼabo naas al-Masiih al-fi baladhum.
15 Al-Yahuud al-misil dool,
humman katalo al-Rabb Isa wa l-anbiya al-gubbaalah wa taʼʼaboona bilheen.
Yizaʼʼulu Allah wa khalaas bigo adu le kulla l-naas.
16 Aniina niballukhu al-bichaara le l-umam achaan yanjo laakin al-Yahuud dool yidooru yadharoona.
Wa misil da,
yitammumu adad zunuubhum marra waahid wa khadab Allah nazal fooghum khalaas.
Al-Rasuul garmaan leehum
17 Ya akhwaanna,
aniina farragoona minku wakit chiyya.
Wa kan aniina macheena baʼiid minku kula,
guluubna maʼaaku.
Wa aniina garmaaniin leeku be ziyaada wa dawwarna nichiifuuku battaan.
18 Dawwarna nigabbulu leeku.
Wa ana Buulus haawalt namchi leeku iddat marraat laakin Ibliis sadda leena al-derib.
19 Aywa,
nidooru nichiifuuku battaan achaan intu bas achamna wa farahna.
Wa fi yoom jayyit Rabbina Isa,
chunu al-daliil al-yiwassif khidmitna ma fachalat ?
Al-daliil hu intu wa iimaanku.
20 Aywa,
be sababku intu bas,
narfaʼo raasna foog wa nafraho bilheen.