Ziyaarat Timuutaawus
3
Aywa,
aniina garmaaniin leeku.
Wa wakit fagadna saburna khalaas,
chilna niiye achaan nagoodu wiheedna fi madiinat Atiina.
2 Wa rassalna leeku akhuuna Timuutaawus al-yakhdim maʼaana sawa le Allah fi ballikhiin bichaarat al-Masiih.
Wa rassalnaah le yisabbitku wa yigawwi iimaanku
3 achaan naadum waahid minku ma yibarjil be sabab al-taʼab al-gaaʼid foogku.
Intu zaatku taʼarfu kadar mukhaddar leena al-naas yitaʼʼubuuna.
4 Wa wakit lissaaʼna maʼaaku,
gulna leeku kadar al-taʼab yaji foogna kullina wa khalaas bigi misil gulna wa da taʼarfuuh.
5 Achaan da,
wakit fagadt al-sabur marra waahid,
rassalt leeku Timuutaawus achaan naʼarif kan intu saabtiin fi iimaanku walla.
Wa fi l-wakit daak,
ana gaaʼid nihimm leeku.
Fi fikri,
akuun Ibliis* annasar foogku wa l-taʼab al-ana tiʼibtah foogku macha fi l-riih saakit.
Al-khabar min Timuutaawus
6 Laakin hassaʼ bas Timuutaawus gabbal minku wa jaab leena khabar halu.
Ooraana be iimaanku wa mahabbitku wa gaal fikirku foogna daayman fikir zeen wa intu garmaaniin leena sawa misil aniina garmaaniin leeku.
7 Wa be misil da ya akhwaanna,
intu chajjaʼtuuna be iimaanku wa raggadtu guluubna fi usut taʼabna wa suʼuubaatna.
8 Awwal al-hamm katalaana laakin min simiʼna intu saabtiin fi Rabbina,
khalaas al-haya bigat leena halwa battaan.
9 Ma naʼarfu kikkeef nachkuru Allah fi chaanku.
Fi chaanku intu,
nafraho giddaam Allah be farha kabiire bilheen.
10 Leel wa nahaar nasʼalo Allah be chidde achaan yilimmina battaan maʼaaku wa niziidu leeku kulla cheyy al-lissaaʼ mugassir leeku fi iimaanku.
11 Wa hassaʼ khalli Allah Abuuna zaatah wa Rabbina Isa yisahhulu leena al-derib achaan najuuku.
12 Wa leeku intu,
khalli al-Rabb yiziid mahabbitku wa yikattirha achaan tirraayado ambeenaatku be ziyaada wa tihibbu kulla l-naas misil aniina nihibbuuku.
13 Wa khalli al-Rabb yisabbit guluubku achaan tukuunu saalihiin wa bala eeb giddaam Abuuna Allah fi l-yoom al-Rabbina Isa yaji foogah maʼa jamaaʼtah al-saalihiin.