Al-haal al-saalhe
4
Ya akhwaanna,
asmaʼo kalaami battaan.
Awwal allamtu minnina al-haal al-waajbe achaan Allah yarda beeku.
Wa khalaas intu maachiin adiil.
Wa achaan da,
nachhadooku wa niwassuuku be usum al-Rabb Isa achaan tamchu adiil be ziyaada.
2 Taʼarfu al-wasaaya al-anteenaaku be usum Rabbina Isa.
3 Al-cheyy al-Allah yidoorah leeku hu al-haal al-saalhe.
Ma tigarrubu le l-zina.
4 Hu yidoor ayyi naadum yaʼarif kikkeef yamluk jismah be l-haal al-saalhe wa chariife.
5 Ma tikhallu chahwaatku yamluku foogku.
Ma tabgo misil al-naas al-ma induhum diin wa ma baʼarfu Allah.
6 Fi l-kalaam da,
khalli naadum ma yakhta foog akhuuh wa la yazulmah achaan ooreenaaku min awwal be kalaam waadih,
Allah yiʼaakhib al-naas al-yisawwu kulla l-zunuub al-misil dool.
7 Allah ma naadaana le l-fasaad.
Allah naadaana le nabgo saalihiin.
8 Wa achaan da,
ayyi naadum al-yaaba al-kalaam da,
ma yaaba kalaam insaani bas.
Hu yaaba kalaam Allah al-nazzal foogku al-Ruuh al-Khudduus.
9 Wa akiid,
Allah zaatah allamaaku kadar waajib tirraayado ambeenaatku.
Wa achaan da,
intu ma hawjaaniin aniina naktubu leeku cheyy fi l-mahabba al-akhawiiye.
10 Wa da bas al-cheyy al-gaaʼidiin tisawwuuh achaan tihibbu kulla l-akhwaan al-fi balad Magiduuniya.
Laakin ya akhwaanna,
niwassuuku achaan tirraayado be ziyaada battaan.
11 Chiilu niiye achaan tiʼiichu be haal haadiye.
Wa ma tadkhulu fi chuʼuun al-naas.
Akhdumu be duraaʼku misil aniina wasseenaaku beyah.
12 Kan intu gaaʼidiin tisawwu misil da,
al-naas al-ma muʼminiin yikarrumuuku wa ma tihtaaju le cheyy min ayyi naadum.
Buʼaas al-muʼminiin
13 Ya akhwaanna,
nidooru niʼooruuku be haalat al-muʼminiin al-atwaffo achaan ma tahzano misil al-naas al-ma induhum acham fi Rabbina.
14 Aamanna kadar Isa maat wa baʼas.
Wa achaan da,
niʼaamunu kula kadar yoom Isa yaji,
Allah yabʼas al-muʼminiin be Isa al-atwaffo wa yijiibhum maʼaayah.
15 Niʼooruuku be l-kalaam al-Rabbina zaatah ooraana beyah wa da hu.
Aniina al-hayyiin fi yoom jayyit al-Rabb wa lissaaʼ ma mutna,
abadan ma nigaddumu gubbaal akhwaanna al-maato khalaas.
16 Achaan al-Rabb Isa zaatah yanzil min al-sama wa yinaadi be hiss chadiid.
Wa soot hana kabiir al-malaaʼika yinsamiʼ wa maʼaayah hiss hana burunjit Allah.
Wa awwal cheyy,
al-muʼminiin be l-Masiih al-maytiin yabʼaso.
17 Wa baʼad da,
aniina al-hayyiin al-lissaaʼna ma mutna,
Allah yarfaʼna maʼaahum sawa fi l-sahaab wa nulummu maʼa l-Rabb foog fi l-hawa.
Wa khalaas,
min da nagoodu daayman maʼa l-Rabb.
18 Wa achchaajaʼo ambeenaatku be l-kalaam da.