Jayyit al-Masiih al-taaniye
5
Wa intu ma hawjaaniin aniina naktubu leeku cheyy fi l-awkaat wa l-ayyaam al-jaayiin.
2 Achaan intu zaatku taʼarfu adiil kadar Yoom al-Rabb yaji be khafla misil jayyit al-sarraag be l-leel.
3 Wakit al-naas gaaʼidiin yuguulu «
Indina al-sihha wa l-salaam »,
fi l-wakit al-misil da bas,
al-halaak yadrubhum ajala ke misil al-talaga taji ajala le l-mara al-khalbaane.
Ma mumkin yinbalusu.
4 Wa laakin ya akhwaanna,
intu ma gaaʼidiin fi l-dalaam misilhum.
Wa l-yoom da ma yaji foogku intu be khafla misil jayyit al-sarraag
5 achaan intu kulluku iyaal al-nuur wa naas hana l-nahaar.
Aywa,
aniina ma naas hana l-leel wa la l-dalaam.
6 Achaan da,
khalli ma nabgo misil al-naas al-aakhariin.
Humman misil naas naaymiin achaan ma baʼarfu al-cheyy al-yaji fooghum.
Khalli nagoodu waaʼiyiin wa nukhuttu baalna.
7 Achaan fi l-leel al-naas yunuumu wa fi l-leel al-sakkaara yaskaro.
8 Wa laakin aniina naas hana l-nahaar wa achaan da khalliina nukhuttu baalna.
Wa khalli al-iimaan wa l-mahabba yabgo leena misil khalagna hana l-harb.
Wa khalli al-acham al-indina fi Rabbina al-yinajjiina yabga taagiiyitna.
9 Achaan Allah ma khaddar leena al-azaab.
La.
Hu khaddar leena al-naja be Rabbina Isa al-Masiih.
10 Al-Masiih maat fi chaanna wa achaan da,
niʼiichu maʼaayah sawa,
kan aniina hayyiin fi yoom jaytah walla kan aniina maytiin kula.
11 Wa khalaas be l-kalaam da,
achchaajaʼo ambeenaatku wa assaaʼado fi iimaanku be ziyaada misil intu gaaʼidiin tisawwuuh.
Wasaaya al-Rasuul wa salaamah
12 Ya akhwaanna,
natlubu minku tikarrumu al-naas al-gaaʼidiin yakhdumu maʼaaku al-induhum foogku masʼuuliiye wa yuguuduuku fi derib al-Rabb.
13 Hibbuuhum be mahabba chadiide be sabab khidmithum.
Wa agoodu be salaam ambeenaatku.
14 Ya akhwaanna,
asmaʼo wasaayaana.
Hazzuru al-aatiliin wa sabbutu al-khawwaafiin wa saaʼudu al-daʼiifiin.
Wa asburu maʼa kulla l-naas.
15 Angarʼu naadum minku ma yisawwi chokhol fasil le l-naas al-sawwo leyah chokhol fasil.
Chiilu niiye achaan tisawwu daayman al-kheer ambeenaatku wa le kulla l-naas.
16 Afraho daayman
17 wa ma taksalo min al-sala
18 wa achkuru Allah fi kulli haal.
Da bas al-cheyy al-Allah yidoorah leeku fi derib Isa al-Masiih.
19 Wa ma taktulu nuur hana l-Ruuh al-Khudduus.
20 Ma tikaddubu kalaam Allah al-yanzil leeku be khuchuum akhwaanku.
21 Jarrubu kulla cheyy.
Al-cheyy al-zeen akurbuuh gawi.
22 Angarʼu min ayyi cheyy fasil.
23 Khalli Allah Rabb al-salaam zaatah yitahhir guluubku marra waahid wa yahfadku saalimiin fi l-ruuh wa l-nafs wa l-jisim achaan tukuunu taahiriin tamaam fi yoom jayyit Rabbina Isa al-Masiih.
24 Al-naadaaku fi derbah,
hu saadikh.
Wa akiid kulla cheyy da,
hu yisawwiih.