Jawaabaat al-Rasuul Buulus le Timuutaawus
1
Jawaab minni ana Buulus Rasuul hana Isa al-Masiih be amur hana Allah Munajjiina wa l-Masiih Isa al-achamna gaaʼid foogah.
2 Wa naktib leek inta,
ya Timuutaawus,
al-bigiit wileedi al-sahiih be l-iimaan.
Aleekum al-salaam wa l-niʼma wa l-rahma min Allah Abuuna wa Isa al-Masiih Rabbina.
Muchkilat al-taʼliim al-ma sahiih
3 Nuguul leek nafs al-kalaam al-gultah leek wakit khalleetak wa saafart fi balad Magiduuniya.
Waajib tagood fi hillit Afasus achaan tiwassiihum le l-naas al-gaaʼidiin yichattutu al-taʼliim al-ma sahiih.
Aamurhum achaan yikhallu minhum al-kalaam da.
4 Guul leehum waajib ma yukhuttu baalhum battaan fi gisas baatliin wa la fi l-guram al-tuwaal bilheen dool.
Al-kalaam al-misil da yisabbib al-munaakhachaat al-ma induhum faayde wa ma yilimmu maʼa l-cheyy al-Allah yidoor yisawwiih fi l-naas.
Derib Allah hu be l-iimaan.
5 Wa anteetak al-wasiiye di achaan nidoor humman yiʼiichu be l-mahabba al-jaaye min galib taahir wa damiir saafi wa iimaan mukhlis.
6 Naas waahidiin khallo minhum al-achya al-adiiliin dool wa dakhalo fi munaakhachaat hana kalaam baatil.
7 Yidooru yisawwu nufuushum muʼallimiin fi l-Tawraat.
Laakin ma fihmo al-cheyy al-gaaʼidiin yihajju beyah wa la l-kalaam al-munkaribiin foogah.
Kalaam al-Tawraat hu adiil
8 Wa aniina naʼarfu kalaam al-Tawraat hu adiil kan niʼallumuuh be derbah.
9 Waajib nafhamo kadar Allah anta churuut al-Tawraat ma fi chaan al-saalihiin laakin fi chaan al-mujrimiin wa l-aasiyiin wa fi chaan al-kuffaar wa l-muznibiin wa fi chaan al-naas al-nujuus wa l-bakraho al-diin wa fi chaan al-naas al-yaktulu abbahaathum wa l-naas al-yaktulu ammahaathum wa fi chaan kulla kattaaliin al-dimam.
10 Wa churuut al-Tawraat humman fi chaan al-zannaayiin wa l-chamaariikh wa tujjaar al-abiid wa l-kaddaabiin wa l-yahlufu be l-baatil wa fi chaan kulla l-naas al-yisawwu ayyi cheyy aakhar al-yikhaalif al-taʼliim al-adiil.
11 Wa l-taʼliim hu adiil kan yiwaafig maʼa l-bichaara al-Allah kallafaani beeha achaan niballikhha wa hi l-bichaara al-majiide al-min Allah al-waajib leyah al-chukur.
Chukur Buulus fi chaan niʼmat Allah
12 Wa ana nachkur katiir Rabbina Isa al-Masiih al-antaani al-gudra al-beeha nisawwi al-khidme di.
Nachkurah achaan hu jaʼalaani naadum amiin wa ikhtaaraani achaan nakhdim leyah.
13 Wa da ajiib,
achaan awwal ana kaafir beyah wa gaaʼid nitaʼʼib naasah wa ana gadduumi murr marra waahid.
Laakin al-Rabb rahamaani achaan sawweet al-zunuub dool wakit lissaaʼni ma irift al-hagg wa ma indi iimaan.
14 Wa Rabbina antaani niʼma kabiire bilheen wa antaani al-iimaan wa l-mahabba al-gaaʼidiin fi l-Masiih Isa.
15 Nuguulu al-Masiih ja fi l-dunya achaan yinajji al-muznibiin wa l-kalaam da hagg wa waajib le kulla l-naas yisaddukhu beyah.
Wa ana aznabt foogah ziyaada min kulla l-naas.
16 Wa laakin daahu al-sabab al-Rabbina rahamaani.
Ana al-muznib al-akbar wa laakin al-Masiih Isa wassaf foogi sabrah al-aziim wa sawwaani masal waadih le kulla l-naas al-yiʼaamunu beyah wa yalgo al-haya al-abadiiye.
17 Wa l-hamdu wa l-ikraam le Allah ila l-abad.
Hu bas al-malik al-daayim al-abadan ma yumuut wa la yinchaaf,
Allah al-Waahid.
Aamiin.
Akrub al-iimaan gawi
18 Ya wileedi Timuutaawus,
al-wasiiye al-anteetha leek tiwaafig maʼa l-kalaam al-Allah gaalah wakit hu hajja beek be khuchuum al-chuyuukh.
Fakkir foogah wa jaahid beyah jihaad adiil.
19 Akrub al-iimaan gawi wa sawwi kulla cheyy be niiye mukhlisa.
Naas waahidiin khallo minhum al-niiye al-mukhlisa wa achaan da,
tallafo iimaanhum marra waahid.
20 Wa minhum Hamaani wa Iskandar wa ana sallamtuhum le l-Cheetaan achaan yaʼarfu waajib ma yihajju battaan didd Allah.