Wasaaya fi l-ibaada
2
Wa awwal cheyy,
niwassi al-akhwaan yasʼalo Allah be chidde be sala wa duʼa wa chukur fi chaan kulla l-naas.
2 Khalli yasʼalo Allah fi chaan al-ruʼasa wa kulla l-kubaaraat achaan niʼiichu fi haala haadiye wa be l-salaam wa be takhwa wa ihtiraam fi kulla cheyy.
3 Al-duʼa al-misil da sameh wa Allah Munajjiina hu yarda beyah.
4 Hu yidoor kadar kulla l-naas yanjo wa yalgo irfat al-hagg.
5 Wa daahu al-hagg,
Allah waahid wa l-wasiit al-been Allah wa been al-naas kula waahid wa hu al-insaan Isa al-Masiih
6 al-anta nafsah dahiiye achaan yafda kulla l-naas.
Wa di bas chahaadat Allah al-gaddamaaha fi l-wakit al-muwaafig.
7 Wa Allah ikhtaaraani wa sawwaani mubachchir wa rasuul achaan niballikh al-chahaada di.
Kalaami sahiih wa ma kidib.
Hu sawwaani muʼallim al-umam le niʼallimhum al-iimaan wa l-hagg.
Haal al-rujaal wa l-awiin fi l-ibaada
8 Wa fi kulla bakaan nidoor kadar al-rujaal al-yaʼabudu Allah yabgo saalihiin wa yarfaʼo iideenhum giddaam Allah bala zaʼal wa la huraaj.
9 Wa nidoor kadar kulli mara talbas lubaas saatir wa aadi misil al-waajib.
Khalli al-mara ma tijjammal be l-muchaat al-ma bichaabih wa la be dahab wa la marjaan wa la lubaas hana fachaar,
10 laakin khalli tijjammal be amal al-kheer misil muwaafig le l-mara al-titaabiʼ derib Allah.
11 Khalli kulli mara tagood saakit achaan tasmaʼ al-taʼliim wa titaabiʼah be kulla adab.
12 Ana ma nanti izin le ayyi mara achaan tiʼallim al-rujaal wa la tahkimhum.
Waajib tagood haadiye.
13 Achaan Allah khalag Adam awwal wa baʼadeen khalag Hawwa.
14 Wa l-naadum al-Ibliis khachchah ma Adam laakin al-mara.
Wa hi bigat muznibe.
15 Wa laakin al-mara tanja be waaluudit al-Wileed*.
Wa khalaas,
yanjan kan yagoodan saabtaat fi l-iimaan wa fi l-mahabba wa l-tihaara maʼa l-adab.