Masaaʼiil al-muʼminiin
3
Nuguulu kan naadum yidoor yabga waahid min masaaʼiil al-muʼminiin,
hu yidoor yugumm be khidme kariime.
Wa l-kalaam da hagg.
2 Wa achaan da,
khalli ayyi naadum al-masʼuul fi l-muʼminiin yabga naadum al-ma indah ayyi eeb.
Laazim yabga raajil martah waahide bas wa aagil wa multazim wa mukarram wa kariim le l-diifaan wa gaadir fi l-allimiin.
3 Laazim ma yabga sakkaari wa la daawaasi laakin laazim yabga naadum indah nafas baarid wa ma siid machaakil wa la tammaaʼ fi l-maal.
4 Waajib yabga naadum al-yichiil masʼuuliiyit beetah wa yirabbi iyaalah le yikarrumuuh fi kulla cheyy.
5 Achaan kan naadum ma yagdar yichiil masʼuuliiyit beetah,
kikkeef yirayyis ummat al-Masiih al-Allah ikhtaaraahum ?
6 Wa khalli naadum ma yabga masʼuul kan dahaabah aaman be l-Masiih.
Al-naadum al-misil da akuun yistakbar wa Allah yiʼaakhibah misil aakhab Ibliis.
7 Wa maʼa kulla l-kalaam da,
khalli ayyi masʼuul yabga naadum al-yikarrumuuh al-naas al-ma muʼminiin kula.
Wa misil da,
al-eeb ma yaji foogah wa ma yagaʼ fi charak Ibliis.
Al-muʼaawiniin
8 Wa nafs al-cheyy le l-muʼaawiniin.
Waajib yabgo naas muhtaramiin al-induhum kalaam waahid wa ma itneen wa ma sakkaara wa ma yihibbu ribah al-haraam.
9 Wa waajib yitaabuʼu derib al-iimaan al-Allah bayyanah leena wa yakurbuuh gawi be niiye mukhlisa.
10 Wa gubbaal kulla cheyy,
waajib yijarrubuuhum.
Wa baʼadeen kan ma induhum eeb,
khalli yabgo muʼaawiniin wa yakhdumu le l-kaniisa.
11 Wa nafs al-cheyy le awiinhum.
Waajib marit al-muʼaawin tabga muhtarama wa ma gawwaala laakin aagle wa amiine fi kulla cheyy.
12 Wa khalli ayyi muʼaawin yabga raajil martah waahide bas wa yirabbi iyaalah adiil wa yichiil masʼuuliiyit beetah.
13 Al-naas al-yabgo muʼaawiniin le l-kaniisa wa yakhdumu adiil dool,
iimaanhum be l-Masiih Isa yabga aali wa yabgo saabtiin bilheen wa raashum foog.
Amuud al-hagg wa asaasah
14 Nidoor najiik gariib laakin katabt leek al-wasaaya dool achaan
15 kan niʼakhkhir kula,
inta taʼarif al-haal al-waajbe le ahal Allah.
Humman ummat al-Masiih al-Allah al-Hayy ikhtaarha.
Wa ummat al-Masiih,
hi amuud al-hagg wa asaasah.
16 Wa bala chakk,
derib al-takhwa al-Allah bayyanah leena,
hu aziim.
Al-Masiih bigi naadum wa baan fi l-dunya wa l-Ruuh al-Khudduus chihid leyah.
Al-malaaʼika chaafooh fi l-sama wa naasah bachcharo beyah al-umam.
Naas aamano beyah fi l-dunya wa Allah rafaʼah foog fi majdah.