Jawaabaat al-Rasuul Buulus le Timuutaawus
Al-jawaab al-taani
1
Jawaab minni ana Buulus Rasuul hana Isa al-Masiih be izin Allah.
Wa hu jaʼalaani Rasuul achaan niballikh al-haya al-abadiiye al-Allah waaʼadaana beeha wa antaaha be Isa al-Masiih.
2 Wa naktib leek inta,
ya Timuutaawus,
al-bigiit wileedi al-niriidak.
Aleekum al-salaam wa l-niʼma wa l-rahma min Allah Abuuna wa l-Masiih Isa Rabbina.
Chukur wa kalaam chajaaʼa
3 Fi chaanak inta,
nachkur Allah al-naʼabudah misil juduudi abadooh be niiye mukhlisa wa nifakkir foogak daayman wakit nadʼi leel wa nahaar.
4 Nifakkir fi dumuuʼak wa nagram leek.
Nidoor nichiifak battaan achaan ninmali be l-farha.
5 Ana gaaʼid nifakkir fi iimaanak al-mukhlis al-misil al-iimaan al-awwal chiftah fi jidditak Luwiisa wa ammak Yuunika wa hassaʼ akiid gaaʼid foogak inta.
6 Achaan da,
nidoor nizakkirak battaan.
Wakit ana daʼeet wa khatteet foogak iideeni,
Allah anta leek baraka wa hi misil jamur.
Hajjijha achaan tabga battaan haamiye misil awwal.
7 Achaan Allah antaana al-Ruuh al-Khudduus al-hu ma yisawwiina khawwaafiin.
Be l-aks,
al-Ruuh al-Khudduus yantiina al-gudra wa l-mahabba wa l-agul al-saabit.
Al-taʼab fi chaan al-bichaara
8 Ma takhaaf wa ma takhjal.
Bachchir al-naas be usum al-Rabb al-ana masjuun fi chaanah.
Ma tidangir raasak be sabab sijni ana.
Chaarikni fi l-taʼab fi chaan bichaarat al-Masiih wa Allah yantiik al-gudra.
9 Hu najjaana wa naadaana achaan nabgo naas khaassiin leyah.
Wa da ma be sabab ayyi amal saalih al-aniina sawweenaah laakin be sabab niiyitah wa rahmatah.
Gubbaal al-dunya ma badat,
hu indah niiye achaan yantiina al-niʼma di fi l-Masiih Isa.
10 Wa hassaʼ fi l-zaman al-haadir,
hu bayyan rahmatah fi jayyit al-naadum al-yinajjiina wa hu al-Masiih Isa.
Al-Masiih battal gudrat al-moot wa fi bichaartah wassaf leena al-haya al-abadiiye.
11 Wa Allah ikhtaaraani wa sawwaani mubachchir wa rasuul wa muʼallim achaan niballikh le l-naas al-bichaara di.
12 Wa achaan da bas,
ana gaaʼid natʼab misil da.
Laakin al-eeb abadan ma sawwaani achaan hu al-ana aamant beyah naʼarfah tamaam.
Wa ana muʼakkid kadar hu gaadir wa yahfad al-amaana al-anteetha leyah lahaddi l-yoom al-akhiir.
13 Akrub gawi al-taʼliim al-adiil al-simiʼtah minni wa taabiʼah tamaam.
Wa ankarib fi l-iimaan wa l-mahabba misil al-waajib fi derib al-Masiih Isa.
14 Kalaam al-hagg,
hu amaana min Allah.
Ahfadah be gudrat al-Ruuh al-Khudduus al-gaaʼid fi usutna.
15 Akiid,
inta simiʼt kadar kulla l-akhwaan al-min balad Aasiya gataʼo maʼaayi al-alaakha wa l-akhwaan Figeel wa Harmuugiin kula minhum.
16 Khalli Rabbina yarham naas beet akhuuna Waani Sifirus achaan hu ja leyi fi l-sijin wa chajjaʼaani katiir.
Janaaziiri abadan ma sawwo leyah eeb.
17 Be l-aks,
wakit wisil fi Rooma hu fattachaani be niiye waahide lahaddi ligiini.
18 Wa nasʼal Rabbina le Waani Sifirus achaan yalga rahma min Allah fi l-yoom al-akhiir.
Wa inta taʼarif hu saaʼadaani katiir wakit ana gaaʼid fi hillit Afasus kula.