Jawaab al-Rasuul Buulus le Tiitus
Mugaddima
Buulus hu rasuul hana Isa al-Masiih wa beyah Allah antaana taʼliim katiir. Al-jawaab da gisayyir laakin indah faayde katiire. Al-Rasuul katabah be izin Allah wa be gudrat al-Ruuh al-Khudduus. Al-jawaab da ankatab fi nafs al-mudda misil al-jawaab al-awwal le Timuutaawus. Al-Rasuul gaʼad sanateen fi l-sijin fi Rooma (Amal al-Rusul 28). Wa baʼad da talagooh. Wa gamma yuruukh battaan yiballikh bichaarat al-Masiih wa Tiitus khadam maʼaayah. Wa gubbaal ma karabooh fi l-sijin le taani marra, Buulus katab al-jawaab da.
Wa Tiitus hu waahid min al-naas al-khadamo maʼa l-Rasuul Buulus fi ballikhiin bichaarat al-Masiih. Al-Rasuul tara usmah fi jawaabah le Khalaatiya (Khalaatiya 2:3) wa fi jawaabah le Kuruntus (2 Kuruntus 7). Wa min jawaabah le Tiitus naʼarfu al-Rasuul Buulus macha maʼa Tiitus le jaziirat Kiriit al-gaaʼide fi l-Bahar al-Abyad al-kulla maʼruuf be l-Bahar al-Mutawassit. Wa ballakho kalaam Allah le l-naas. Wakit al-Rasuul Buulus macha giddaam, hu khalla Tiitus fi Kiriit achaan yitammim al-khidme al-badooha sawa. Wakit Buulus lissaaʼ gaaʼid maʼaayah, hu anta Tiitus wasaaya fi l-cheyy al-bukhuss nizaam al-Masiihiyiin. Wa fi l-jawaab da, hu karrar al-kalaam da wa wassafah al-taʼliim al-muhimm al-waajib yiʼallimah le kulla l-naas.
Khalli Allah yibaarik kulla naadum al-yagriih. Aamiin.