Ballikhiin kalaam Allah
4
Wa nantiik wasiiye be usum Allah wa be usum al-Masiih Isa al-yihaasib al-hayyiin wa l-maytiin wa be l-yoom al-hu yibiin foogah be mamlakatah.
2 Ballikh kalaam Allah.
Ankarib foogah kan talga min al-naas murr walla halu kula.
Jiib al-naas fi l-derib.
Al-waahidiin ahrijhum wa l-waahidiin chajjiʼhum.
Allimhum kulluhum be sabur chadiid.
3 Fiyah wakit jaayi al-naas yaabo ma yahmalo al-taʼliim al-adiil.
Yitaabuʼu al-kalaam al-halu leehum wa yichiilu muʼallimiin katiiriin al-yuguulu al-kalaam al-yaʼajib al-naas bas.
4 Wa ma yidooru yasmaʼo abadan kalaam al-hagg.
Fi badalah yidooru yasmaʼo gisas al-naas al-yiwadduruuhum.
5 Laakin inta,
agood daayman saabit wa ahmal al-taʼab wa bachchir al-naas be l-bichaara wa akhdim adiil al-khidme al-Allah antaaha leek.
Haalit Buulus wa khabarah
6 Wa laakin ana bigiit misil dahiiye wa gariib dammi yidaffig.
Wa ana mooti garrab khalaas.
7 Ana jaahadt jihaad adiil fi l-hagg.
Wa l-sabag al-tawiil kammaltah wa l-iimaan karabtah gawi lahaddi l-nihaaya.
8 Wa hassaʼ al-jaaʼiza al-yantuuha le l-khaalib tarjaani.
Wa hi al-taaj al-Rabbina yukhuttah fi raas al-naadum al-saalih.
Wa Rabbina al-haakim al-aadil yantiini al-taagiiye di fi l-yoom al-akhiir.
Wa ma yantiiha leyi ana wiheedi laakin yantiiha le kulla l-naas al-garmaaniin le yoom jaytah.
9 Jaahid le tajiini ajala
10 achaan akhuuna Diimaas yihibb al-dunya wa faat khallaani macha fi hillit Tasaluuniiki.
Wa l-aakhariin ma fiihum.
Akhuuna Kiriiski macha fi balad Khalaatiya wa akhuuna Tiitus macha fi balad Dalmaatiya.
11 Wa misil da,
illa akhuuna Luukha wiheedah gaaʼid maʼaayi.
Amchi le akhuuna Markhus wa jiibah maʼaak.
Hu yisaaʼidni bilheen fi khidmit al-Rabb.
12 Wa ana rassalt akhuuna Tichiikus fi hillit Afasus.
13 Wa wakit taji,
jiib maʼaak khalagi hana l-barid al-khalleetah maʼa akhuuna Kaarbus fi hillit Turuwaas.
Wa jiib al-kutub kula.
Wa fakkir fi l-kutub al-maktuubiin fi farwa wa ma tansaahum.
14 Wa Iskandar daggaag al-nahaas hu sawwa leyi fasil bilheen.
Rabbina bas yijaaziih foog al-cheyy al-sawwaah leyi.
15 Angariʼ minnah achaan hu khaalaf kalaamna mukhaalafa chadiide.
16 Fi l-marra al-awwalaaniiye al-jaabooni fi l-mahkama wa daafaʼt le nafsi,
ma fi naadum waahid al-wigif maʼaayi.
Kulluhum khallooni marra waahid.
Nasʼal Rabbina ma yihaasibhum.
17 Laakin Rabbina wigif maʼaayi wa antaani gudra wa beeha ballakht al-bichaara kullaha ke wa naas min kulla l-umam simʼooha.
Wa fi l-yoom da,
ana misil naadum al-duud yidoor yaakulah laakin al-Rabb najjaani min al-moot.
18 Wa hu yinajjiini min kulla cheyy fasil wa yiwaddiini aafe fi mamlakatah al-samaawiiye.
Al-hamdulillah daayman wa ila l-abad.
Aamiin.
Nihaayat al-jawaab
19 Sallim Firiska wa Akiila wa naas beet Waani Sifirus.
20 Akhuuna Rastus gaʼad fi Kuruntus.
Wa Turuufiimus bigi mardaan wa ana khalleetah fi hillit Miliitus.
Jaahid achaan taji leyi gubbaal al-chite ma yabda.
21 Yuubulus wa Buudis wa Liinus wa Kuluudiya wa kulla l-akhwaan yisallumuuk.
22 Al-Rabb maʼaak.
Aleekum al-niʼma.