Al-fasaad fi l-zaman al-akhiir
3
Waajib taʼarif kadar al-zaman al-akhiir yabga zaman gaasi bilheen.
2 Wa fi l-zaman da,
al-naas yihibbu nufuushum be ziyaada wa yihibbu al-gurus bilheen.
Wa yabgo fachchaariin wa mustakbiriin wa kalaamhum yabga murr wa yabgo aaykhiin le waaldeenhum wa nassaayiin al-kheer wa faasdiin.
3 Wa ma induhum mahanna wa yaabo ma yisaamuhu.
Wa yabgo gattaaʼiin wa ma gaadriin yisabbutu nufuushum wa yabgo kachraaniin wa yakraho al-kheer.
4 Wa yabgo khaayniin wa mutaʼammidiin wa fachchaariin.
Wa yihibbu halaat al-dunya ziyaada min Allah.
5 Wa yinkarubu fi l-chokhol al-biwassif al-takhwa laakin fi guluubhum yaabooh ma yitaabuʼuuh.
Angariʼ min al-naas al-misil dool.
6 Waahidiin minhum yindasso fi buyuut al-naas be najaada.
Wa yissaytaro be l-khachch foog al-awiin al-fikirhin ma saabit al-malaanaat be zunuub wa gaaʼidaat yitaabiʼan kulla nafar al-chahwaat.
7 Al-awiin al-misil deel yasmaʼan taʼliim katiir wa abadan ma yagdaran yafhaman al-hagg.
8 Wa l-khachchaachiin dool gaaʼidiin yikhaalufu al-hagg misil Yaniis wa Yambaaris* al-khaalafo Muusa.
Fikirhum tilif wa iimaanhum baatil.
9 Laakin ma yanjaho achaan baʼad chiyya yabga waadih le kulla l-naas kadar kalaamhum baatil.
Wa yabga leehum misil al-cheyy al-bigi le Yaniis wa Yambaaris.
Agood saabit
10 Laakin inta raafagtini wa taʼarifni.
Chiftini wakit ana gaaʼid niʼallim al-naas wa taʼarif haali wa niiyiti fi kulla cheyy.
Taʼarif iimaani wa sabri wa mahabbiti wa galbi al-saabit.
11 Inta chiftini wakit al-naas gaaʼidiin yitaʼʼubuuni wa wakit taʼab chadiid ja foogi.
Wa chiftini fi kulla cheyy al-gaasi al-bigi foogi fi l-hillaal Antaakiya wa Iguuniya wa Listara*.
Himilt fooghum taʼab chadiid marra waahid.
Laakin Rabbina fazaʼni wa najjaani min al-taʼab da kulla ke.
12 Wa akiid ayyi naadum al-yidoor yinkarib fi l-takhwa fi derib al-Masiih Isa,
yitaʼʼubuuh.
13 Wa laakin al-naas al-fasliin wa l-kaddaabiin,
fasaalithum tiziid be ziyaada wa yabgo khachchaachiin wa makhchuuchiin.
14 Laakin inta,
agood saabit fi kulla cheyy al-allamtah wa aamant beyah be iimaan gawi.
Taʼarif kadar al-naas al-allamook leyah saadikhiin.
15 Min inta sakhayyar,
irift kitaab Allah al-antaak al-ilim al-yiwaddiik le l-naja be l-iimaan fi l-Masiih Isa.
16 Al-Kitaab kulla ke hu kalaam min Allah wa indah faayde achaan yiʼallim al-hagg wa yiwassif al-naas khataahum wa yigabbilhum fi l-derib al-adiil wa yidarribhum fi l-haal al-saalhe.
17 Wa beyah khaddaam Allah yabga gaadir wa jaahiz achaan yisawwi ayyi amal al-kheer.