Jawaab al-Rasuul Buulus le Tiitus
1
Jawaab minni ana Buulus abid hana Allah wa rasuul hana Isa al-Masiih,
murassal achaan nijiib al-naas al-Allah ikhtaaraahum fi derib al-iimaan wa niʼarrifhum al-hagg al-yiwaddiihum fi l-takhwa.
2 Wa be sabab al-iimaan da,
yarjo be acham al-haya al-abadiiye al-hu waaʼadaahum beeha min gubbaal bidaayit al-dunya.
Wa Allah abadan ma yakdib.
3 Wa fi l-wakit al-Allah haddadah,
hu nazzal kalaamah fi l-Masiih.
Wa Allah Munajjiina kallafaani be l-kalaam da wa amaraani achaan niballikhah.
4 Wa naktib leek inta ya Tiitus al-bigiit wileedi al-sahiih be l-iimaan al-nichaaruku foogah.
Aleekum al-salaam wa l-rahma min Allah Abuuna wa l-Masiih Isa al-Munajji.
Khidmit Tiitus fi Kiriit
5 Ana khalleetak fi jaziirat Kiriit achaan tiʼaddil kulla cheyy al-lissaaʼ ma indah nizaam adiil.
Waajib tikhtaar min al-muʼminiin naas fi ayyi hille achaan yabgo leehum chuyuukh misil ana awwal wasseetak beyah.
6 Kulla cheekh waajib yabga naadum ma indah eeb.
Khalli yabga raajil martah waahide bas wa iyaalah muʼminiin wa ma fi naadum waahid yuguul fooghum kadar humman faasdiin wa la aasiyiin.
7 Masʼuul al-muʼminiin hu wakiil Allah wa achaan da,
waajib yabga naadum ma indah eeb.
Waajib ma yabga naadum mustakbir raasah gawi wa la naadum al-bazʼal ajala wa la sakkaari wa la siid al-machaakil wa la naadum al-biriid ribah al-haraam.
8 Laakin waajib yabga naadum kariim le l-diifaan wa l-yiriid al-kheer wa aagil wa saalih wa takhi wa yisabbit nafsah.
9 Hu waajib yakrub gawi al-kalaam al-sahiih al-allamnaah leyah achaan yichajjiʼ akhwaanah be taʼliim adiil wa yurudd le l-naas al-yikhaalufuuh.
10 Achaan fiyah naas katiiriin aasiyiin wa khachchaachiin wa bihajju kalaam saakit wa katiiriin minhum Yahuud.
11 Laazim niwaggufuuhum achaan tallafo iimaan hana kulla l-naas fi buyuut waahidiin be taʼliimhum.
Gaaʼidiin yiʼallumu kalaam ma adiil achaan yarbaho gurus be kidibhum.
12 Naadum waahid min al-Kiriitiyiin al-bigi leehum misil nabi gaal «
 Naas hana Kiriit humman daayman kaddaabiin wa misil haywaanaat khatiiriin.
Humman bihibbu al-akil wa ma biriidu al-khidme ».
13 Wa kalaamah da sahiih.
Wa achaan da,
ahrijhum be chidde achaan yagoodu saabtiin fi l-iimaan
14 wa ma yasmaʼo battaan al-gisas al-baatliin al-jaayiin min ust al-Yahuud wa la churuut al-naas al-abo al-hagg.
15 Le l-naas al-guluubhum taahiriin,
kulla cheyy taahir.
Wa laakin le l-naas al-guluubhum ma taahiriin wa le l-ma muʼminiin ma fi cheyy waahid taahir.
Afkaarhum wa guluubhum ma taahiriin marra waahid.
16 Yuguulu yaʼarfu Allah laakin be amalhum yakfuru beyah.
Naas misil dool makruuhiin wa aasiyiin wa ma yanfaʼo le ayyi amal al-kheer.