Al-taʼliim al-waajib
2
Laakin inta,
allim al-akhwaan al-haal al-muwaafge maʼa l-taʼliim al-adiil.
2 Wassi al-chuyaab achaan yabgo aagliin wa muhtaramiin wa khalli baalhum yabga wasiiʼ.
Wa khalli yabgo saabtiin fi l-iimaan wa l-mahabba wa l-sabur.
3 Wa wassi al-ajaayiz kula achaan haalhin tabga takhiiye wa ma yabgan gawwaalaat wa la sakkaariyaat.
Khalli yiʼalliman akhwaathin kikkeef yisawwan al-kheer.
4 Wa be misil da,
yichajjiʼan al-chaabbaat achaan yiriidan rujaalhin wa iyaalhin
5 wa yiʼiichan be haal aagle wa taahire wa yukhuttan baalhin fi buyuuthin wa guluubhin yabgo buyud wa yasmaʼan kalaam rujaalhin.
Wa be misil da,
yisiddan al-derib le l-naadum al-yidoor yuguul kalaam fasil foog kalaam Allah.
6 Wa wassi al-subyaan achaan yisabbutu nufuushum.
7 Abga leehum masal fi kulla cheyy.
Wassif leehum be haalak kikkeef yisawwu al-kheer.
Wa khalliihum yichiifu kadar inta naadum mukhlis fi taʼliimak wa munkarib foogah.
8 Wa khalli kalaamak yabga saalim bilheen hatta naadum ma yalga foogah sabab le yaharjak.
Wa be misil da,
ayyi naadum al-yidoor yikhaalifak,
yakhjal wa ma yagdar yuguul foogna cheyy fasil.
9 Wa wassi al-abiid achaan yasmaʼo kalaam siyaadhum lahaddi siyaadhum yardo beehum fi kulla cheyy.
Wa khalli al-abiid ma yikhaalufuuhum
10 wa la yasurgu minhum cheyy.
Wa laakin waajib yabgo leehum saadikhiin marra waahid achaan yiwassufu fi kulla cheyy kadar taʼliim hana Allah al-yinajjiina,
hu sameh bilheen.
11 Akiid,
niʼmat Allah baanat fi l-Masiih achaan tinajji kulla l-naas.
12 Wa hi tidarribna achaan nikhallu minnina al-kufur wa chahwaat al-dunya wa niʼiichu fi l-dunya be haal aagle wa saalhe wa takhiiye.
13 Wa narjo be acham al-yoom al-mubaarak al-yibiin foogah majd hana Ilaahna wa Munajjiina al-aziim,
Isa al-Masiih.
14 Hu anta nafsah dahiiye le yafdaana min kulla fasaala wa yitahhir guluubna achaan nabgo leyah chaʼabah halaalah munkaribiin fi amal al-kheer.
15 Wa khalaas kulla l-kalaam da,
ooriihum beyah be kalaam waadih.
Indak fooghum gudra achaan tichajjiʼhum wa tahrijhum hasab haalhum.
Ma tikhalli naadum yahgirak.