Al‑jawaab al‑awwal le Kuruntus
min jawaabaat al‑rasuul Buulus
Mugaddima
Al‑hamdulillah, Allah rassal al‑Masiih fi l‑ard achaan kulla l‑naas yalgo al‑naja wa l‑salaam. Wa Allah hu sabuur wa kariim.
Wa l‑jawaab da, al‑rasuul Buulus katabah be gudrat al‑Ruuh al‑Khudduus le l‑naas al‑bigo muʼminiin be l‑Masiih fi hillit Kuruntus fi balad Yuunaan. Al‑rasuul Buulus hu awwal naadum al‑ballakh kalaam al‑Masiih fi Kuruntus. Wa taariikh hana ziyaartah di gaaʼid fi kitaab Aʼmaal al‑Rusul fasul 18.
Wa hu katab al‑jawaab da le l‑muʼminiin achaan yichajjiʼhum wa yiʼallimhum kalaam muhimm. Wa l‑jawaab yuguul leena kalaam katiir fi l‑haal al‑waajbe le l‑muʼminiin wa le malammaat al‑muʼminiin. Wa bihajji fi l‑fikir al‑waajib wa l‑fikir al‑ma waajib. Wa indah taʼliim al‑yihajji fi gudrat al‑Ruuh al‑Khudduus wa l‑buʼaas. Wa min katabah, muʼminiin katiiriin fi ayyi bakaan ligo minnah faayde katiire.
Wa gabul al‑rasuul ma yaktib leehum, al‑muʼminiin al‑fi Kuruntus katabo le l‑rasuul wa saʼalooh fi l‑kalaam al‑ma waadih leehum. Wa khalaas al‑rasuul radda leehum fi l‑jawaab da. Wa battaan fi nafs al‑wakit, hu simiʼ khabar al‑machaakil al‑gammo ambeenaat al‑muʼminiin wa hu dawwar yihill al‑machaakil dool be jawaabah. Hu simiʼ khabar hana naas waahidiin al‑gammo yiʼallumu kalaam ma sahiih wa hu dawwar yigabbilhum le l‑naas dool fi l‑derib. Wa katab kalaam katiir al‑bukhuss wihdat al‑muʼminiin wa l‑mahabba al‑akhawiiye wa l‑haal al‑saalhe wa l‑iche maʼa l‑muznibiin wa muchkilat al‑laham al‑awwal dabahooh le l‑asnaam wa baʼad da, baaʼooh fi l‑suug.
Wa l‑kalaam al‑Buulus katabah leehum fi l‑haal al‑waajbe le l‑muʼminiin al‑saakniin fi ust al‑muznibiin indah faayde le l‑muʼminiin fi ayyi wakit wa fi ayyi bakaan. Khalli Allah yibaarik al‑yagri al‑kalaam da. Aamiin.