Jawaab le Rooma
min jawaabaat al‑rasuul Buulus
Mugaddima
Subhaan Allah wa l‑hamdulillah, Allah fatah derib le kulla l‑naas achaan yabgo saalihiin wa yadkhulu fi majdah. Wa be izin Allah, al‑rasuul Buulus dawwar yifassir al‑kalaam da le l‑muʼminiin al‑fi madiinat Rooma. Fi l‑wakit da, Rooma hi madiina hana naas ma baʼarfu Allah. Wa fi Masiihiyiin ambeenaathum laakin lissaaʼ ma fi naadum min rusul al‑Masiih macha le l‑madiina al‑muhimme di.
Wa Buulus katab leehum al‑jawaab da be gudrat al‑Ruuh al‑Khudduus wa fassar leehum bichaarat al‑Masiih. Hu wassaf kikkeef al‑Masiih yinajji al‑Yahuud wa l‑ma Yahuud be nafs al‑derib. Wa fassar leehum kadar kulla l‑naas muznibiin kan awwal induhum diin walla kan ma induhum diin kula. Wa Buulus fassar kadar Allah rassal al‑Masiih le yaftah leena kullina derib waahid al‑beyah nabgo saalihiin. Be waasitat al‑Masiih, al‑naas yalgo al‑khufraan wa gudrat al‑Ruuh al‑Khudduus. Al‑Masiih fatah leena kullina majd Allah be derib al‑iimaan.
Wakit al‑rasuul Buulus gaaʼid fi hillit Kuruntus, hu jahhaz safar le Madiinat al‑Khudus. Wa hu irif kadar al‑Rabb yidoor hu yamchi giddaam le Rooma. Achaan da, hu katab al‑jawaab da le l‑Masiihiyiin al‑fi Rooma wa ooraahum kadar hu indah niiye yamchi leehum. Wa hu rassal al‑jawaab be iideen muʼmine waahide usumha Fiiba. Wa baʼad da, hu gamma macha Madiinat al‑Khudus. Wa hinaak, hu ligi taʼab chadiid wa laakin fi l‑akhiir, hu wisil fi Rooma. Wa l‑naas al‑garo jawaabah karabooh adiil.
Wa jawaab Buulus le l‑Masiihiyiin al‑fi Rooma yiwassif be kalaam waadih kadar barakat al‑Masiih ma hana nafar waahid wa la hana gabiila waahide. Kulla Bani Adam muznibiin. Wa be l‑Masiih, Allah fatah derib jadiid achaan kulla l‑umam yagdaro yabgo beyah saalihiin. Allah yibaarik ayyi naadum al‑yagri al‑kalaam da. Aamiin.