Jawaab le Rooma
min jawaabaat al‑rasuul Buulus
1
1 Jawaab minni ana Buulus abid Isa al‑Masiih.
Allah naadaani achaan nabga rasuul wa azalaani achaan niballikh bichaartah
2 al‑waaʼad beeha min zamaan be waasitat al‑anbiya al‑kalaamhum maktuub fi l‑kutub al‑mukhaddasa.
3 Wa l‑bichaara di tihajji be Ibnah al‑bigi insaan min zurriiyit al‑malik Dawuud
4 wa Allah jaʼalah Ibnah be gudrat al‑Ruuh al‑Khudduus,
wakit hu baʼasah min ust al‑maytiin.
Wa Ibnah da,
hu Isa al‑Masiih Rabbina.
5 Wa beyah hu wa fi chaan usmah,
Allah antaani niʼma wa sawwaani rasuul achaan ninaadi kulla l‑umam le yiʼaamunu beyah wa yitaabuʼu kalaamah.
6 Wa intu kula,
Allah naadaaku achaan tabgo maʼaahum chaʼab hana Isa al‑Masiih.
7 Wa naktib leeku intu kulluku al‑gaaʼidiin fi madiinat Rooma,
intu al‑Allah yihibbuku wa naadaaku le tabgo saalihiin.
Aleekum al‑salaam wa l‑rahma min Allah abuuna wa Rabbina Isa al‑Masiih.
Chukur wa duʼa hana Buulus
8 Awwal cheyy,
nachkur Allah be usum Isa al‑Masiih fi chaanku kulluku achaan iimaanku bigi maʼruuf fi kulla l‑dunya.
9 Wa Allah al‑naʼabudah be kulla ruuhi fi ballikhiin bichaarat Ibnah,
hu chaahid leyi kadar ana gaaʼid nifakkir foogku daayman wa nadʼi leeku
10 fi kulla salaawaati.
Wa gaaʼid nasʼal Allah kan di muraadtah,
hu yaftah leyi al‑derib achaan namchi leeku.
11 Nidoor bilheen nuzuurku wa nantiiku baraka be gudrat al‑Ruuh al‑Khudduus achaan nichajjiʼku.
12 Wa ziyaada min da,
nidoor naji fi usutku achaan be iimaanku wa iimaani,
kullina nalgo chajaaʼa.
Gudrat Allah fi bichaarat al‑Masiih
13 Ya akhwaani,
nidoor intu taʼarfu kadar ana haawalt iddat marraat najiiku.
Nidoor kadar khidimti tantiiku natiija misil antat natiija le l‑naas al‑aakhariin al‑fi diyaar hana l‑ma Yahuud.
Laakin ma gidirt najiiku lahaddi l‑yoom.
14 Waajib namchi le kulla l‑naas,
al‑musakhkhafiin wa l‑ma musakhkhafiin wa l‑garo wa l‑ma garo.
Wa da gaaʼid foogi misil deen.
15 Wa achaan da,
indi niiye achaan nibachchirku intu al‑fi Rooma kula be bichaarat al‑Masiih.
16 Achaan wakit ana nibachchir bichaarat al‑Masiih,
da ma indah leyi eeb.
Wa bichaarat al‑Masiih,
hi gudrat Allah al‑beeha yinajji kulla l‑naas al‑yiʼaamunu beyah,
awwal ke al‑Yahuud wa battaan al‑ma Yahuud.
17 Achaan be bichaarat al‑Masiih,
Allah wassaf kikkeef hu yisawwi al‑naas saalihiin wa l‑derib da be l‑iimaan min al‑bidaaya lahaddi l‑nihaaya.
Achaan da,
al‑Kitaab buguul :
﴾Be iimaanah,
al‑saalih yahya.﴿*
Khadab Allah fi zunuub al‑naas
18 Allah bayyan khadabah al‑yinazzilah min al‑sama fi kulla zanib wa fasaalit Bani Adam.
Humman gaaʼidiin yikhaalufu al‑hagg be amalhum al‑fasil.
19 Al‑cheyy al‑yagdaro yaʼarfuuh fi Allah waadih leehum achaan Allah sawwaah waadih leehum.
20 Min Allah khalag al‑dunya,
al‑naas yagdaro yaʼarfu sifaat Allah al‑ma yinchaafo misil gudurtah al‑daayme wa tabiiʼtah al‑ilaahiiye.
Kan yifakkuru adiil fi l‑achya al‑Allah khalagaahum,
sifaatah yabgo waadhiin leehum.
Wa be da,
ma yagdaro yidaafuʼu le nufuushum giddaam Allah battaan.
21 Humman irfo Allah gaaʼid wa laakin ma majjadooh wa ma chakarooh misil waajib leyah.
Be l‑aks,
fikirhum waddar marra waahid wa khallo al‑dalaam dakhal fi guluubhum al‑ma induhum fihim.
22 Hasabo nufuushum hakiimiin wa laakin be l‑sahiih,
bigo mataamiis.
23 Abo ma yaʼabudu Allah al‑majiid al‑ma yumuut abadan.
Wa gammo yaʼabudu fi badalah,
asnaam fi suurat al‑insaan al‑akiid yumuut walla suurat teer walla suurat haywaanaat walla suurat zawaahif.
24 Wa achaan da,
Allah sallamaahum le chahwaat guluubhum wa khallaahum yisawwu fiʼil cheen be ajsaamhum wa yitallufu charafhum ambeenaathum.
25 Humman abo hagg Allah wa khiblo fi badalah al‑kidib.
Humman gammo yaʼabudu al‑makhluug wa yakhdumu leyah fi badal Allah al‑khaalig,
al‑waajib leyah kulla l‑chukur ila l‑abad.
Aamiin.
26 Wa achaan da,
Allah sallamaahum le chahwaathum al‑yijiibu fi ruuseehum al‑eeb.
Wa awiinhum kula khallan minhin al‑rujaal wa dawwaran awiin.
27 Wa l‑rujaal kula khallo minhum al‑awiin wa chahwithum le l‑rujaal bigat chadiide bilheen.
Wa l‑rujaal gammo billaawato ambeenaathum wa l‑azaab al‑waajib leehum be sabab fasaadhum,
lihigaahum khalaas.
28 Al‑naas abo ma yaʼarfu Allah wa achaan da,
Allah sallamaahum le uguulhum al‑faasdiin wa gammo yisawwu al‑cheyy al‑ma waajib yisawwuuh.
29 Wa guluubhum anmalo be kulla l‑zunuub wa l‑fasaala wa l‑tamaʼ wa l‑niiye al‑faasde.
Humman malaaniin be l‑husud wa l‑katil wa l‑mukhaasama wa l‑khachch wa l‑charr.
Humman gawwaaliin
30 wa gattaaʼiin wa udwaan Allah.
Humman chammaatiin wa mustakbiriin wa fachchaariin wa yifattuchu ayyi tariiga le yisawwu al‑charr wa aaykhiin waaldeenhum.
31 Humman ma induhum fihim wa la induhum amaan wa la induhum mahanna wa la induhum rahma.
32 Humman irfo kharaar Allah al‑buguul al‑moot waajib le ayyi naadum al‑yisawwi al‑amal al‑misil da.
Wa laakin ma khallo minhum al‑zunuub dool wa humman radyaaniin be l‑naas al‑yisawwuuhum kula.