Aʼmaal al‑Rusul
Mugaddima
Allah hu akbar ! Zamaan Allah gaal le sayyidna Ibraahiim kadar hu yanti baraka kabiire be zurriiytah wa l‑baraka di tabga le kulla l‑umam. Wa baʼad da, Allah hajja le anbiya katiiriin wa ooraahum be l‑naadum al‑yirassilah al‑yijiib al‑baraka di. Wa l‑Masiih hu bas al‑jaab al‑baraka al‑Allah hajja beeha le Ibraahiim wa le l‑anbiya al‑aakhariin. Al‑Masiih maat fi l‑saliib le zunuub al‑naas wa baʼas min ust al‑maytiin. Wa l‑Masiih azal 12 rujaal min talaamiizah wa jaʼalaahum rusul. Wa gubbaal Allah ma rafaʼah foog fi l‑sama, al‑Masiih amaraahum le l‑rusul dool wa rassalaahum achaan yiballukhu al‑bichaara le kulla l‑naas.
Wa Aʼmaal al‑Rusul yiʼooriina be kikkeef rusul al‑Masiih bado al‑khidme al‑hu kallafaahum beeha. Allah rassal al‑Masiih le l‑Yahuud wa awwal, kulla talaamiizah min al‑Yahuud. Wa fi fikir al‑Masiihiyiin al‑awwalaaniyiin, al‑naas ma yagdaro yalgo barakat al‑Masiih illa kan awwal dakhalo fi diin al‑Yahuud. Wa Aʼmaal al‑Rusul yiwassifna kikkeef Allah allamaahum wa waddah leehum kadar hu yidoor yanti barakat al‑Masiih le kulla l‑naas. Hu yinaadi kulla l‑naas fi derib waahid wa l‑derib da jadiid. Allah yanti le l‑muʼminiin al‑min al‑umam al‑aakhariin nafs al‑baraka al‑antaaha le l‑Yahuud. Wa l‑naas yalgo al‑baraka di kan yiʼaamunu be l‑Masiih wa hi al‑baraka al‑Allah awwal waaʼad beeha Ibraahiim wa l‑hamdulillah.
Al‑naadum al‑Rabbina azalah achaan yaktib Aʼmaal al‑Rusul, hu al‑sayyid Luukha wa hu katabah be gudrat al‑Ruuh al‑Khudduus. Wa gubbaal hu ma katabah, hu katab juzu aakhar hana Injiil al‑Masiih wa da maʼruuf be kitaab Luukha.
Khalli Allah yaftah galib hana ayyi naadum al‑yagri Aʼmaal al‑Rusul achaan yiʼaamin tamaam wa yalga al‑baraka al‑ajiibe al‑Allah yidoor yinazzilha. Aamiin.