Aʼmaal al‑Rusul
Allah rafaʼ Isa al‑Masiih
1
1 Ya l‑sayyid Saawufiilus,*
fi l‑kitaab al‑awwal al‑ana katabtah leek,
ooreetak be kulla cheyy al‑Isa bada yisawwiih wa be kulla cheyy al‑allamah min bidaayit khidimtah
2 lahaddi l‑yoom al‑Allah rafaʼah fi l‑samaawaat.
Wa gubbaal Allah ma yarfaʼah,
Isa hajja le l‑naas al‑azalaahum le yabgo rusul wa amaraahum be gudrat al‑Ruuh al‑Khudduus.
3 Baʼad mootah,
Isa sabbat leehum be dalaayil katiiriin kadar hu hayy.
Wa gaaʼid yibiin leehum fi muddit arbaʼiin yoom wa yikallim leehum be mamlakat Allah.
4 Wa wakit hu gaaʼid maʼaahum hu gaal :
« Ma tamurgu min Madiinat al‑Khudus.
Arjo lahaddi abuuku Allah yantiiku al‑baraka al‑hu waaʼadaaku beeha wa ana zaati ooreetku beeha.
5 Yahya khattas al‑naas fi l‑almi wa laakin baʼad ayyaam bas,
Allah yikhattisku be l‑Ruuh al‑Khudduus. »
6 Wa wakit al‑rusul gaaʼidiin maʼa Isa,
humman saʼalooh wa gaalo :
« Ya Rabbina,
da bas al‑wakit al‑tidoor tiʼassis battaan mamlakat Israaʼiil walla ? »
7 Wa Isa radda leehum wa gaal :
« Abuuku Allah bas nazzam al‑awkaat be sultitah wa ma antaaku izin achaan taʼarfuuhum.
8 Wa laakin wakit al‑Ruuh al‑Khudduus yanzil foogku,
talgo gudra achaan tachhado leyi fi Madiinat al‑Khudus wa fi kulla daar al‑Yahuudiiya wa fi daar al‑Saamira wa lahaddi aakhir al‑ard. »
9 Wa baʼad Isa gaal al‑kalaam da,
anrafaʼ fi l‑sama wa humman chaayfiin Isa taaliʼ wa sahaab daaragah minhum.
10 Wa wakit humman gaaʼidiin yisanguʼu foog fi l‑sama wa Isa maachi minhum,
rujaal itneen khulgaanhum buyud baano jambuhum
11 wa gaalo :
« Ya rujaal daar al‑Jaliil,
maalku intu waagfiin tisanguʼu foog fi l‑sama ?
Chiftu Isa taaliʼ minku wa faat fi l‑sama.
Wa be nafs al‑tariiga di,
hu yigabbil min al‑sama fi l‑ard ! »
12 Wa da bigi fi hajar usmah jabal al‑Zaytuun misil kiilomitir waahid min Madiinat al‑Khudus.
Wa baʼad da,
al‑rusul dallo min al‑hajar wa gabbalo fi l‑madiina.
Azalo Mattiyaas fi badal Yahuuza
13 Wa l‑rusul gabbalo fi l‑madiina wa dakhalo fi l‑beet wa talaʼo fi l‑gasir al‑gaaʼidiin foogah.
Wa l‑naas dool,
humman Butrus wa Yuuhanna wa Yaakhuub wa Andareeyas wa Filibbus wa Tuuma wa Bartulma wa Matta wa Yaakhuub wileed Halfa wa Simʼaan al‑Sawri wa Yahuuza wileed Yaakhuub.
14 Wa kulluhum gaaʼidiin yilimmu daayman wa yisallu be niiye waahide wa awiin waahidaat kula gaaʼidaat yilimman maʼaahum wa Mariyam amm Isa wa akhwaanah.
15 Wa yoom waahid,
Butrus gamma fi ust al‑akhwaan.
Adadhum misil 120 naadum.
Wa hu kallam leehum wa gaal :
16 « Ya l‑akhwaan,
al‑kalaam al‑maktuub fi l‑Kitaab,
waajib yitimm.
Zamaan,
al‑Ruuh al‑Khudduus kallam be waasitat al‑nabi Dawuud fi Yahuuza.
Hu al‑wadda al‑naas le Isa achaan yakurbuuh.
17 Wa Yahuuza da,
hu waahid minnina wa sawwa maʼaana nafs al‑khidme. »
18 Wa Yahuuza chaal al‑gurus al‑awwal saʼalah min al‑kubaaraat achaan yukhuun Isa wa chara beyah zereʼ.
Wa fi l‑zereʼ da,
hu wagaʼ wa batnah anchaggat wa kulla masaariinah daffago.
19 Wa kulla naas Madiinat al‑Khudus irfo al‑cheyy al‑bigi lahaddi sammo al‑zereʼ be kalaamhum Hakhil Damma,
maʼanaatah zereʼ al‑damm.
20 Wa Butrus gaal :
« Al‑kalaam al‑maktuub fi l‑Zabuur buguul :
﴾Khalli beetah yakhrab wa naadum ma yaskun foogah.﴿*
Wa battaan maktuub :
﴾Khalli naadum aakhar yibaddilah.﴿*
21 Wa achaan da,
waajib leena naʼazulu naadum waahid min al‑rujaal al‑gaaʼidiin maʼaana fi kulla l‑wakit al‑Rabbina Isa gaaʼid maʼaana,
22 min Yahya khattasah fi almi lahaddi l‑yoom al‑Allah rafaʼah minnina wa chaalah fi l‑sama.
Wa l‑naadum al‑naʼazuluuh yabga chaahid maʼaana fi buʼaas Isa. »
23 Wa gaddamo rujaal itneen.
Wa l‑waahid hu Yuusuf Baar Saaba al‑usmah al‑aakhar Yustus wa l‑taani hu Mattiyaas.
24 Wa daʼo wa gaalo :
« Ya Rabbina,
inta taʼarif guluub kulla l‑naas.
Wassif leena yaatu min al‑rujaal al‑itneen dool al‑inta azaltah.
25 Hu yabga rasuul wa yichiil khidmit Yahuuza al‑khallaaha wa faat macha le l‑bakaan al‑waajib leyah. »
26 Wa sawwo leehum amʼiyeedaat wa wagaʼ fi Mattiyaas.
Wa Mattiyaas lamma maʼa l‑rusul al‑ihdaachar.