Kitaab Yuuhanna
min Injiil al‑Masiih
Mugaddima
Allah hu siid al‑nuur wa siid al‑hagg wa hu bas al‑yanti al‑haya le l‑naas. Wa hu rassal al‑Masiih fi l‑dunya achaan yanti le l‑naas al‑nuur wa l‑hagg wa l‑haya al‑abadiiye. Wa hu rassalah awwal le l‑Yahuud wa laakin kubaaraat al‑Yahuud ma khiblooh. Induhum diin min Allah laakin aaychiin fi l‑dalaam. Allah rassal Isa al‑Masiih achaan yaftah le l‑naas derib jadiid al‑beyah al‑naas yabgo iyaal Allah wa yiʼiichu fi l‑nuur.
Da juzu waahid min Injiil al‑Masiih. Wa hu yachhad be kalaam waadih le kubuuriiyit al‑Masiih wa yizakkirna kadar hu Kalimat Allah wa Nuur al‑Aalam wa l‑Hamal al‑Allah rassalah. Al‑juzu da yiʼooriina kadar al‑nabi Yahya al‑Mukhattis chahad le l‑Masiih wa yiwassifna kikkeef Allah chahad le l‑Masiih be l‑ajaayib al‑antaahum leyah. Wa kalaam al‑juzu da yiwassifna kadar al‑Masiih irif akiid yumuut fi l‑saliib fi chaan zunuub al‑naas wa yabʼas min ust al‑maytiin achaan yaftah derib al‑haya al‑abadiiye le Bani Adam.
Al‑naadum al‑Rabbina azalah achaan yaktib al‑juzu da, hu Yuuhanna wileed Zabadi wa hu katabah be gudrat al‑Ruuh al‑Khudduus. Hu min talaamiiz al‑Masiih al‑awwalaaniyiin. Gubbaal al‑Masiih ma yinaadiih, hu hawwaati maʼa akhwaanah. Wa Isa jaʼalah rasuul wa rassalah achaan yachhad leyah. Hu katab talaata jawaabaat al‑gaaʼidiin fi l‑Ahad al‑Jadiid wa hu katab kitaab al‑Ruʼya kula. Wa usmah binlagi fi bakaanaat katiiriin laakin fi l‑juzu da, hu ma tara usmah. Fi badal usmah, hu buguul « al‑tilmiiz al‑Isa yiriidah bilheen ».
Wa Yuuhanna katabah be izin al‑Rabb wa hu zaatah fassar leena maala hu katabah wakit hu gaal : « Al‑kalaam al‑maktuub hini ankatab achaan intu tisaddugu kadar Isa hu al‑Masiih wa Ibn Allah wa tiʼaamunu beyah wa talgo be usmah al‑haya al‑abadiiye. » Aamiin.