Buʼaas al‑Masiih
24
1 Wa awwal yoom fi subuuʼ be fajur badri,
al‑awiin maragan le l‑khabur wa chaalan maʼaahin al‑riihe al‑jahhazanha.
2 Wa chaafan al‑hajar al‑kabiir al‑saddo beyah al‑khabur,
mudardag min bakaanah.
3 Wa l‑awiin dakhalan fi l‑khabur wa laakin janaazit al‑Rabb Isa ma liganha.
4 Wa hinna barjalan bilheen.
Wa ajala ke rujaal itneen baano jambihin wa khulgaanhum yidawwu deyy chadiid.
5 Wa l‑khoof karab al‑awiin wa dangaran wujuuhhin ale l‑ard.
Wa l‑rujaal hajjo leehin wa gaalo :
« Maala tifattichan naadum hayy fi ust al‑maytiin ?
6 Hu ma fiih hini.
Hu baʼas khalaas.
Fakkiran fi l‑kalaam al‑hu gaalah leekan wakit hu lissaaʼ gaaʼid fi daar al‑Jaliil.
7 Hu gaal :
‹ Ibn al‑Insaan laabudda yisallumuuh le l‑muznibiin wa yaktuluuh fi l‑saliib wa fi l‑yoom al‑taalit,
yabʼas.
› »
8 Wa khalaas fi l‑bakaan da bas,
zakkaran fi l‑kalaam al‑Isa awwal gaalah da.
9 Wa gabbalan min al‑khabur wa machan le l‑rusul al‑ihdaachar wa l‑talaamiiz al‑aakhariin wa ooranhum be kulla l‑kalaam da.
10 Wa l‑awiin deel hinna Mariyam al‑Magdaliiye wa Jaana wa Mariyam amm Yaakhuub wa l‑awiin al‑maʼaahin wa hinna bas al‑ooran al‑rusul be l‑kalaam da.
11 Wa l‑rusul ma saddago be kalaamhin.
Fi fikirhum,
kalaamhin kalaam saakit bas.
12 Wa laakin Butrus gamma jara le l‑khabur.
Wa hu dangar wa taawag fi l‑karkuur wa chaaf al‑kafan wiheedah wa ma chaaf cheyy aakhar.
Wa gabbal le l‑beet wa l‑cheyy da bigi leyah ajiib bilheen.
Al‑Masiih fi derib Imwaas
13 Wa nafs al‑yoom,
naaseen min al‑talaamiiz maachiin le hille waahide usumha Imwaas wa hi gaaʼide misil achara kiilomitir min Madiinat al‑Khudus.
14 Wa humman gaaʼidiin yihajju ambeenaathum be kulla cheyy al‑bigi da.
15 Wa wakit humman gaaʼidiin yihajju wa yinaakhuchu ambeenaathum,
Isa zaatah garrab leehum wa lihigaahum wa bada yuruukh maʼaahum.
16 Wa humman chaafooh laakin ma irfooh.
17 Wa Isa gaal leehum :
« Da chunu al‑kalaam al‑gaaʼidiin tihajju beyah fi l‑derib da ? »
Wa wagafo haznaaniin.
18 Wa waahid minhum usmah Kuluuba radda leyah wa gaal :
« Haay !
Min kulla l‑diifaan al‑fi Madiinat al‑Khudus,
inta wiheedak bas ma taʼarif al‑cheyy al‑bigi foogha walla ? »
19 Wa Isa gaal leehum :
« Chunu al‑cheyy al‑bigi ? »
Wa gaalo leyah :
« Al‑cheyy al‑bukhuss Isa al‑min al‑Naasira.
Hu kaan nabi wa indah gudra fi l‑kalaam wa l‑khidme,
giddaam Allah wa giddaam kulla l‑naas.
20 Wa kubaaraat rujaal al‑diin wa chuyuukhna sallamooh le l‑waali achaan yahkim leyah be l‑moot wa katalooh fi l‑saliib.
21 Wa laakin aniina awwal khatteena achamna foogah.
Saddagna kadar hu bas al‑naadum al‑yafda Bani Israaʼiil.
Wa laakin da ma bigi wa hassaʼ indina talaata yoom min katalooh.
22 « Wa battaan awiin waahidaat min jamaaʼitna gaalan cheyy waahid al‑aniina alʼajjabna leyah bilheen.
Be fajur machan fi bakaan al‑khabur
23 wa ma ligan janaaztah.
Wa gabbalan leena wa gaalan kadar chaafan ruʼyat al‑malaaʼika al‑gaalo Isa hayy.
24 Wa naas waahidiin min jamaaʼitna macho le l‑khabur wa ligo kulla cheyy misil al‑awiin gaalannah.
Laakin Isa zaatah ma chaafooh. »
25 Wa Isa gaal leehum :
« Ya mataamiis,
fikirku tagiil bilheen.
Lissaaʼ ma aamantu be kulla l‑kalaam al‑gaalooh al‑anbiya.
26 Ma fihimtu kadar al‑Masiih laabudda yatʼab misil da gubbaal ma yadkhul fi majdah walla ? »
27 Wa fassar leehum kulla cheyy al‑bukhussah al‑maktuub fi kutub Allah.
Wa bada fi kitaab Muusa wa fassar leehum kutub hana kulla l‑anbiya.
28 Wa wakit garrabo le l‑hille al‑humman dawwaro yamchu fiiha,
Isa sawwa misil hu yidoor yamchi giddaam.
29 Laakin al‑naaseen dool assarooh wa gaalo :
« Agood maʼaana.
Al‑makhrib jaat wa l‑yoom gariib yikammil. »
Wa khalaas,
hu dakhal fi l‑beet achaan yidalli maʼaahum.
30 Wa hu gaʼad tihit achaan yiʼachchi maʼaahum wa chaal al‑khubza wa chakar Allah wa kasarha wa antaaha leehum.
31 Wa khalaas uyuunhum anfataho wa irfooh.
Wa tawwaali hu faat minhum wa ma anchaaf battaan.
32 Wa gammo yihajju ambeenaathum wa gaalo :
« Haay !
Wakit hu gaaʼid yihajji leena fi l‑derib wa fassar leena al‑kutub,
hu chajjaʼaana bilheen lahaddi guluubna firho. »
33 Wa gammo ajala wa gabbalo fi Madiinat al‑Khudus.
Wa ligo al‑rusul al‑ihdaachar laammiin maʼa l‑naas al‑aakhariin.
34 Wa l‑rusul gaaʼidiin yuguulu :
« Sahiih al‑Rabb baʼas !
Hu baan le Simʼaan. »
35 Wa l‑naaseen al‑jo min Imwaas ooroohum be l‑cheyy al‑bigi leehum fi l‑derib wa kikkeef irfo Isa wakit hu gaaʼid yaksir leehum al‑khubza.
Al‑Masiih baan le talaamiizah
36 Wa wakit al‑talaamiiz gaaʼidiin yihajju,
Isa zaatah baan wa wagaf fi usuthum wa gaal :
« Al‑salaam aleekum. »
37 Wa humman barjalo wa l‑khoof dakhal leehum.
Wa fi fikirhum yichiifu dull hana naadum.
38 Wa Isa gaal leehum :
« Maalku tibarjulu ?
Maala tichakkuku fi guluubku ?
39 Chiifu iideeni wa rijileeni.
Chiifu daahuuni ana.
Almasooni wa chiifu adiil.
Achaan ma fi dull indah laham wa udaam misil intu gaaʼidiin tichiifuuh foogi ana. »
40 Wa hu gaal al‑kalaam da wa wassafaahum iideenah wa rijileenah.
41 Wa bigi leehum farah chadiid wa ajab ziyaada lahaddi ma gidro yiʼaamunu beyah.
Wa achaan da,
hu saʼalaahum wa gaal :
« Ma induku chokhol hana akil walla ? »
42 Wa antooh lugma min huut matchuuch.
43 Wa chaalaaha wa akalaaha giddaamhum.
44 Wa Isa hajja leehum wa gaal :
« Khalaas bigi misil al‑kalaam al‑awwal gultah leeku wakit ana gaaʼid maʼaaku.
Ana gult leeku kadar kulla l‑kalaam al‑bukhussini fi Tawraat Muusa wa kutub al‑anbiya wa l‑Zabuur waajib yitimm. »
45 Wa fatah leehum uguulhum achaan yafhamo al‑kutub.
46 Wa gaal leehum :
« Maktuub fi l‑Kitaab kadar al‑Masiih laabudda yatʼab wa fi l‑yoom al‑taalit,
yabʼas min ust al‑maytiin.
47 Wa laabudda al‑bichaara yiballukhuuha be usum al‑Masiih le kulla l‑umam.
Wa yuguulu leehum :
‹ Tuubu min zunuubku wa Allah yakhfir leeku.
› Wa l‑ballikhiin da waajib yabda min Madiinat al‑Khudus.
48 Wa intu chuhuud fi kulla l‑kalaam da.
49 Wa ana ninazzil foogku al‑baraka al‑abuuyi Allah gaal waaʼadaaku beeha.
Wa hassaʼ da,
waajib tagoodu hini fi l‑madiina lahaddi gudrat Allah tanzil foogku min al‑sama. »