Kitaab Yuuhanna
min Injiil al‑Masiih
Al‑Masiih hu Kalimat Allah
1
1 Fi l‑bidaaya al‑Kalima gaaʼide.
Wa l‑Kalima gaaʼide maʼa Allah wa l‑Kalima hi Allah.
2 Fi l‑bidaaya hi gaaʼide maʼa Allah.
3 Wa kulla cheyy kaan be l‑Kalima wa min kulla l‑achya al‑kaano,
ma fi cheyy al‑kaan balaaha.
4 Hi indaha al‑haya wa l‑haya hi nuur le l‑naas.
5 Al‑nuur gaaʼid yidawwi fi l‑dalaam wa laakin al‑dalaam ma gidir yaktulah.
6 Wa Allah rassal naadum waahid usmah Yahya.
7 Hu ja achaan yachhad.
Wa chahad le l‑nuur achaan kulla l‑naas yiʼaamunu be l‑nuur be sabab chahaadtah.
8 Yahya zaatah hu ma al‑nuur laakin hu ja achaan yachhad le l‑nuur.
9 Wa l‑nuur al‑sahiih ja fi l‑dunya le yinawwir kulla l‑naas.
10 Al‑dunya kawwanat beyah wa laakin wakit hu ja fi l‑dunya,
naas al‑dunya ma irfooh.
11 Hu ja le naasah wa laakin naasah ma khiblooh.
12 Laakin le kulla l‑naas al‑khiblooh wa aamano be usmah,
hu antaahum al‑hagg achaan yabgo iyaal Allah.
13 Wa yabgo iyaal Allah ma be waaluuda wa la be chahwat al‑naas wa la be niiye hana ayyi raajil,
laakin humman bigo iyaal Allah be gudrat Allah.
14 Wa l‑Kalima bigat insaan wa hu sakan fi usutna.
Wa chifna gudurtah al‑majiide.
Wa gudurtah hi majiide bilheen wa muwaafge le l‑Ibn al‑waahid al‑jaayi min Allah abuuh.
Wa hu malaan be l‑rahma wa l‑hagg.
15 Wa Yahya chaahid leyah wa naada al‑naas wa gaal :
« Da bas al‑naadum al‑ooreetku beyah wa gult hu al‑jaayi waraayi aali minni bilheen achaan hu mawjuud gubbaali. »
16 Wa rahmatah kaamile wa kullina ligiina minha baraka fi baraka.
17 Allah nazzal churuut al‑Tawraat be waasitat Muusa wa laakin Allah nazzal al‑rahma wa l‑hagg be waasitat Isa al‑Masiih.
18 Abadan ma fi naadum chaaf Allah laakin Ibn Allah al‑Waahid al‑gaaʼid jamb abuuh,
hu bas al‑bayyan Allah le l‑naas.
Yahya radda le l‑Yahuud
19 Wa di hi chahaadat Yahya wakit kubaaraat al‑Yahuud rassalo leyah rujaal diin wa Laawiyiin min Madiinat al‑Khudus le yasʼalooh hu yaatu.
20 Yahya ma nakar cheyy wa laakin chahad be kalaam waadih wa gaal :
« Ana ma al‑Masiih. »
21 Wa achaan da,
saʼalooh battaan wa gaalo :
« Inta yaatu ?
Inta al‑nabi Iliyaas* walla ?
» Wa Yahya gaal :
« La,
ana ma hu.
» Wa gaalo :
« Inta al‑nabi* al‑baji walla ?
» Wa radda leehum wa gaal :
« La. »
22 Wa khalaas gaalo leyah :
« Inta yaatu ?
Ooriina achaan nigabbulu le l‑naas al‑rassaloona wa niʼooruuhum.
Chunu al‑kalaam al‑tuguulah fi nafsak ? »
23 Wa hu radda leehum be kalaam al‑nabi Ichaʼya wa gaal :
﴾Ana hiss al‑gaaʼid yiʼiit fi l‑khala wa yuguul :
« Addulu derib al‑Rabb !
»﴿*
24 Wa fiyah Fariiziyiin been al‑naas al‑rassaloohum.
25 Wa humman saʼalo Yahya wa gaalo :
« Kan inta ma al‑Masiih wa la Iliyaas wa la l‑nabi al‑yaji,
maala inta gaaʼid tikhattis al‑naas fi l‑almi ? »
26 Wa Yahya radda leehum wa gaal :
« Ana nikhattis al‑naas fi l‑almi wa laakin naadum waahid gaaʼid maʼaaku wa intu ma taʼarfuuh.
27 Hu bas al‑naadum al‑yaji waraayi.
Wa ana ma tammeet leyah khaddaam kula. »
28 Wa l‑bakaan al‑saʼalo Yahya foogah,
hu fi hillit Beet Anya al‑gaaʼide khaadi le bahar al‑Urdun.
Wa da l‑bakaan al‑Yahya gaaʼid yikhattis foogah al‑naas.
Isa hamal Allah
29 Wa ambaakir,
Yahya chaaf Isa jaayi leyah wa gaal :
« Da bas al‑hamal al‑Allah rassalah achaan yuguchch zanib naas al‑dunya.
30 Da bas al‑naadum al‑ooreetku beyah wa gult naadum waahid jaayi waraayi wa hu aali minni bilheen achaan hu mawjuud gubbaali.
31 Awwal ana ma iriftah.
Laakin ana jiit nikhattis al‑naas achaan niwassifah le Bani Israaʼiil. »
32 Wa Yahya chahad leyah wa gaal :
« Ana chift al‑Ruuh al‑Khudduus jaayi min al‑sama wa nazal foogah misil hamaama wa gaʼad foogah.
33 Awwal ana ma iriftah laakin al‑rassalaani le nikhattis al‑naas fi l‑almi,
hajja leyi min awwal wa gaal :
‹ Al‑naadum al‑tichiif al‑Ruuh al‑Khudduus yanzil foogah wa yagood foogah,
da bas al‑naadum al‑yikhattis al‑naas be l‑Ruuh al‑Khudduus. ›
34 Wa khalaas,
ana chiftah wa ana chaahid leyah hu Ibn Allah ».
Talaamiiz al‑Masiih al‑awwalaaniyiin
35 Wa ambaakir,
Yahya gaaʼid fi nafs al‑bakaan wa naaseen min talaamiizah gaaʼidiin maʼaayah.
36 Wa Yahya chaaf Isa raayikh fi l‑derib wa gaal leehum :
« Daahu hamal Allah. »
37 Wa l‑talaamiiz al‑itneen simʼo kalaamah wa gammo taabaʼo Isa.
38 Wa Isa anlafat wa chaafaahum jaayiin waraayah.
Wa saʼalaahum wa gaal :
« Tifattuchu chunu ?
» Wa raddo leyah wa gaalo :
« Ya rabbaai,
inta saakin ween ?
» Wa rabbaai maʼanaatah sayyid be l‑lukhkha al‑araamiiye.
39 Wa Isa radda leehum wa gaal :
« Taʼaalu chiifu al‑bakaan.
» Wa da bigi fi l‑asur.
Wa macho maʼaayah wa chaafo al‑beet al‑hu gaaʼid foogah wa fi l‑yoom da,
gaʼado maʼaayah.
40 Wa naadum waahid min al‑naaseen al‑simʼo kalaam Yahya wa gammo taabaʼo Isa,
usmah Andareeyas wa hu akhu Simʼaan Butrus.
41 Awwal cheyy,
Andareeyas macha ligi akhuuh Simʼaan wa hajja leyah wa gaal :
« Ligiina Massiiya.
» Wa Massiiya maʼanaatah al‑Masiih be l‑lukhkha al‑araamiiye.
42 Wa Andareeyas wadda Simʼaan le Isa.
Wa Isa chaaf Simʼaan fi uyuunah wa gaal :
« Inta Simʼaan wileed Yuuhanna.
Yisammuuk Safa.
» Wa Safa maʼanaatah hajar wa be l‑lukhkha al‑yuunaaniiye da Butrus.
43 Wa ambaakir,
Isa dawwar yamchi fi daar al‑Jaliil.
Wa ligi Filibbus wa gaal leyah :
« Taʼaal taabiʼni. »
44 Wa Filibbus hu min hillit Beet Seeda wa di hille hana Andareeyas wa Butrus.
45 Wa Filibbus macha ligi Natanaayil wa gaal leyah :
« Ligiina al‑naadum al‑Muusa katab be sababah fi l‑Tawraat wa l‑anbiya katabo foogah fi kutubhum.
Wa hu Isa wileed Yuusuf min hillit al‑Naasira. »
46 Wa Natanaayil radda leyah wa gaal :
« Haay !
Mata ke yoom waahid cheyy adiil ja min al‑Naasira ?
» Wa Filibbus gaal leyah :
« Taʼaal maʼaayi wa chiifah ! »
47 Wa Isa chaaf Natanaayil jaayi leyah wa gaal :
« Daahu Israaʼiili sahiih.
Hu ma yukhuchch ayyi naadum. »
48 Wa Natanaayil saʼalah wa gaal :
« Kikkeef iriftini ?
» Wa Isa gaal :
« Chiftak wakit inta gaaʼid tihit chadarat al‑tiin gubbaal Filibbus ma yinaadiik. »
49 Wa Natanaayil gaal :
« Sayyidna,
inta Ibn Allah !
Inta malik hana Israaʼiil ! »
50 Wa Isa gaal leyah :
« Inta aamant beyi achaan gult leek ana chiftak tihit chadarat al‑tiin ?
Tichiif achya kubaar min da ! »
51 Wa Isa gaal leehum :
« Asmaʼo nuguul leeku al‑hagg,
tichiifu al‑sama faatih wa malaaʼikat Allah taaliʼiin wa naazliin foog Ibn al‑Insaan. »