Kitaab Luukha
min Injiil al‑Masiih
Mugaddima
Allah hu al‑Rahmaan al‑Rahiim wa l‑hamdulillah, hu wassaf kubur rahmatah wakit hu rassal fi l‑dunya Isa al‑Masiih. Allah rassalah achaan yinajji al‑naas min Jahannam wa min gudrat Ibliis wa yakhfir leehum zunuubhum. Wa Isa al‑Masiih ja wa daawa al‑mardaaniin wa l‑maʼduuriin wa l‑amyaaniin wa tarad min al‑naas al‑chawaatiin wa chajjaʼaahum le kulla l‑naas wa bachcharaahum be bichaarat mamlakat Allah. Wa khidimtah wa kalaamah wassafo le l‑naas gudrat Allah al‑tinajjiihum. Wa Isa naada al‑naas achaan yiʼaamunu beyah wa yalgo al‑salaam wa l‑khufraan min al‑zunuub.
Wa daahu kitaab waahid min Injiil al‑Masiih. Al‑naadum al‑Rabbina azalah achaan yaktib al‑kitaab da, hu al‑sayyid Luukha wa hu katabah be gudrat al‑Ruuh al‑Khudduus. Wa sayyidna Luukha gaddam al‑kitaab da awwal le naadum usmah Saawufiilus wa l‑usum da maʼanaatah al‑naadum al‑yihibb Allah. Wa fi l‑kitaab da, Luukha hajja le naas al‑ma Yahuud. Wa hu fassar leehum aadaat al‑Yahuud al‑humman ma yaʼarfuuhum. Wa wakit hu katab al‑kitaab da khalaas, hu katab kitaab aakhar usmah Aʼmaal al‑Rusul.
Wa l‑kitaab da yabda be l‑kalaam al‑Allah gaalah be khachum al‑malak Jibriil le Zakariiya abu Yahya wa kalaamah le Mariyam amm Isa al‑Masiih. Wa l‑kitaab yiʼooriina be waaluudit al‑Masiih al‑ajiibe wa be l‑ajaayib al‑sawwaahum wa kalaamah wa mootah al‑Allah khaddarah leyah. Wa fi l‑akhiir, yihajji be buʼaasah al‑majiid fi l‑yoom al‑taalit. Wa fi kumaalit al‑kitaab, nagru al‑kalaam al‑Isa gaalah wakit hu baʼas min ust al‑maytiin khalaas wa gaaʼid yirassil rusulah le kulla l‑umam achaan yibachchuru kulla l‑naas be l‑bichaara. Wa baʼad da, Allah rafaʼah fi l‑sama.
Wa ayyi naadum al‑yihibb Allah wa yidoor yitaabiʼ derbah tamaam, khalli yagri al‑kalaam da wa yakhbalah. Wa Allah yantiih al‑baraka al‑kabiire al‑nazzalaaha be Isa al‑Masiih.