Al‑jawaab al‑awwal le Kuruntus
min jawaabaat al‑rasuul Buulus
1
1 Jawaab minni ana Buulus al‑Allah naadaani achaan nabga be iznah rasuul hana Isa al‑Masiih.
Wa daahu naktib leeku maʼa akhuuna Suustaan.
2 Wa nisallumuuku intu jamaaʼat al‑muʼminiin hana Allah al‑gaaʼidiin fi hillit Kuruntus,
intu al‑Allah khassasaaku be alaakhitku maʼa l‑Masiih Isa.
Allah naadaaku fi derbah achaan tabgo khaassiin sawa maʼa kulla l‑naas al‑yadʼu fi ayyi bakaan be usum Rabbina Isa al‑Masiih wa hu Rabbuhum wa Rabbina.
3 Aleekum al‑salaam wa l‑rahma min Allah abuuna wa Rabbina Isa al‑Masiih.
4 Nachkur Allah daayman fi chaanku wa fi chaan al‑rahma al‑hu antaaku be alaakhitku maʼa l‑Masiih Isa.
5 Wa be alaakhitku maʼaayah,
Allah baarakaaku wa antaaku kulla cheyy wa antaaku kulla maʼrafat al‑kalaam wa kulla l‑ilim.
6 Wa misil da,
Allah sabbat ambeenaatku chahaaditna al‑chahadna beeha le l‑Masiih.
7 Wa fi chaan da bas,
ma fi ayyi baraka min barakaat al‑Ruuh al‑Khudduus al‑gassarat leeku,
intu al‑gaaʼidiin tarjo al‑yoom al‑Allah yibayyin foogah Rabbina Isa al‑Masiih.
8 Al‑Masiih yahfadku lahaddi fi l‑aakhira.
Achaan da,
fi yoom jayyit Rabbina Isa al‑Masiih,
tukuunu bala eeb.
9 Allah hu saadikh fi waʼadah.
Wa hu bas al‑naadaaku achaan tadkhulu fi l‑alaakha al‑induku maʼa Ibnah Isa al‑Masiih Rabbina.
Al‑muʼminiin ma yingasmu
10 Ya akhwaani,
ana niwassiiku be usum Rabbina Isa al‑Masiih achaan kalaamku yabga waahid lahaddi ma tingasmu.
Wa khalli galibku yabga waahid wa fikirku yabga waahid.
11 Ya akhwaani,
ana gult al‑kalaam da achaan naas waahidiin min beet akhutku Khuluwa oorooni kadar intu gaaʼidiin tilkhaalato ambeenaatku.
12 Wa ayyi naadum minku gaaʼid yuguul :
« Ana naadum hana Buulus » aw « Ana hana Abuluus » aw « Ana hana Butrus » aw « Ana hana l‑Masiih. »
13 Haay !
Al‑Masiih da waahid walla mugassam ?
Buulus da maat fi l‑saliib fi chaanku walla ?
Wa khattasooku be usum Buulus walla ?
Akiid,
la !
14 Wa ana ma khattast ayyi naadum minku illa Kiriisbus wa Khaayus.
Wa achaan da,
nuguul al‑hamdulillah.
15 Wa be da,
ma fi naadum al‑yagdar yuguul hu khattasooh be usmi ana.
16 Aywa,
ana khattast naas beet Istifaan kula.
Laakin ma naʼarif kan fi naadum aakhar ambeenaatku ana khattastah.
17 Wa l‑Masiih rassalaani ma achaan nikhattis al‑naas laakin achaan niballikh leehum bichaartah.
Wa ma niballikhha misil al‑ulama al‑yiballukhu fikirhum be kalaam halu.
Niballikh moot al‑Masiih fi l‑saliib achaan al‑saliib kula indah gudra al‑khaassa beyah.
Hikmat Allah wa gudrat Allah
18 Sahiih,
al‑naas al‑muwaddiriin yuguulu kadar kalaamna fi l‑saliib kalaam baatil.
Laakin leena aniina al‑Allah gaaʼid yinajjiina,
kalaam hana l‑saliib indah gudrat Allah.
19 Wa fakkuru fi l‑kalaam al‑Allah gaalah fi l‑Kitaab :
﴾Hikmat al‑hukama niwaddirha wa fihim al‑faahimiin yabga ma fiih.﴿*
20 Wa hassaʼ da,
ween al‑hakiim ?
Ween al‑aalim ?
Ween al‑mutakallim al‑yiriiduuh naas al‑dunya ?
Khalaas,
Allah wassaf kadar hikmat naas al‑dunya baatle.
21 Achaan Allah sawwa kulla cheyy hasab hikmatah wa laakin naas al‑dunya ma aʼtarafo beyah.
Wa khalaas Allah chaal niiye achaan yinajji al‑naas al‑yiʼaamunu beyah be tariig al‑bichaara,
hatta kan naas al‑dunya yichiifuuh kalaam baatil kula.
22 Aywa,
al‑Yahuud yidooru yichiifu al‑alaama al‑tabga leehum daliil wa l‑Yuunaaniyiin yifattuchu al‑hagg be hikmat al‑dunya
23 laakin aniina niballukhu le kulla l‑naas be l‑Masiih al‑katalooh fi l‑saliib.
Wa l‑kalaam da yizaʼʼil al‑Yahuud wa hu kalaam baatil le l‑Yuunaaniyiin.
24 Laakin le kulla l‑naas al‑Allah naadaahum fi derbah,
kan min al‑Yahuud walla min al‑Yuunaaniyiin kula,
al‑Masiih hu gudrat Allah wa hikmat Allah.
25 Wa l‑naas yuguulu hikmat Allah baatle.
Laakin hikmat Allah ziyaada marra waahid min hikmithum.
Wa yuguulu gudrat Allah hi daʼiife,
laakin gudrat Allah ziyaada min gudrat al‑naas.
26 Wa be kalaam aakhar,
ya akhwaani,
fakkuru fi haalitku hi kikkeef gubbaal Allah ma naadaaku fi derbah.
Awwal da,
naas chiyya minku induhum hikma wa chiyya minku induhum gudra wa chiyya minku iyaal kubaaraat.
27 Laakin al‑naas al‑juhhaal hasab naas al‑dunya,
humman dool bas Allah azalaahum achaan yijiib al‑eeb fi l‑hukama.
Wa l‑naas al‑ma induhum gudra hasab naas al‑dunya,
humman dool Allah azalaahum achaan yijiib al‑eeb fi l‑gaadriin.
28 Aywa,
Allah azal al‑naas al‑masaakiin wa l‑mahguuriin wa l‑ma induhum faayde hasab naas al‑dunya,
achaan yibattil faaydit al‑naas al‑yuguulu humman bas induhum faayde.
29 Wa khalaas,
ma fi insaan indah hagg yisawwi nafsah kabiir giddaam Allah.
30 Wa Allah bas al‑antaaku al‑alaakha al‑induku maʼa l‑Masiih Isa.
Wa be l‑Masiih bas,
nalgo hikmat Allah.
Wa be l‑Masiih bas,
Allah jaʼalaana saalihiin wa khassasaana wa fadaana.
31 Wa achaan da,
khalli nitaabuʼu al‑kalaam al‑maktuub fi l‑Kitaab :
﴾Khalli naadum ma yisawwi nafsah kabiir.
Akheer yuguul Allah bas kabiir.﴿*