Gaddimiin al‑salaam
16
1 Nigaddim leeku akhutna Fiiba.*
Hi khaddaama fi jamaaʼat al‑muʼminiin al‑gaaʼidiin fi hillit Kankhiriiya.
2 Akhbalooha be usum al‑Rabb wa dayyufuuha be l‑diife al‑waajbe le l‑naas al‑saalihiin.
Saaʼuduuha fi ayyi cheyy al‑hi tidoorah minku achaan hi zaatha saaʼadat naas katiiriin wa saaʼadatni ana kula.
3 Wa sallumu Biriskiila* wa Akiila al‑khadamo maʼaayi sawa le l‑Masiih Isa.
4 Wa humman dakhalo fi khutuura chadiide achaan yinajjuuni min al‑moot.
Wa kulla jamaaʼaat al‑muʼminiin al‑gaaʼidiin fi ust al‑naas al‑ma Yahuud gaaʼidiin yachkuruuhum maʼaayi.
5 Wa sallumu jamaaʼat al‑muʼminiin al‑yilimmu fi beethum.
Wa sallumu habiibi Abinaatus.
Hu awwal naadum al‑aaman be l‑Masiih fi balad Aasiya.
6 Wa sallumu Mariyam al‑khadamat leeku katiir.
7 Wa sallumu ahali Andaruuniki wa Yuuniya al‑gaʼadna sawa maʼaahum fi l‑sijin.
Kulla l‑rusul yaʼarfuuhum wa yikarrumuuhum.
Humman muʼminiin be l‑Masiih gubbaali ana.
8 Wa sallumu Amfilaawus,
hu habiibi fi l‑Rabb.
9 Wa sallumu Urbaan al‑yakhdim misilna le l‑Masiih wa habiibi Istakhi.
10 Wa sallumu Afaliis al‑wassaf sabaatah fi l‑Masiih.
Wa sallumu al‑akhwaan fi beet Aristubuul.
11 Wa sallumu akhuuyi Hiruudiyun.
Wa sallumu naas Rabbina al‑gaaʼidiin fi beet Narkiis.
12 Wa sallumu al‑akhwaat Tarfiina wa Tarfuusa al‑yakhdiman katiir le l‑Rabb.
Wa sallumu akhti al‑niriidha Farsiiya al‑khadamat katiir bilheen le l‑Rabb.
13 Wa sallumu Ruufus,
hu al‑azalah al‑Rabb.
Wa sallumu ammah.
Hi bigat misil ammi.
14 Wa sallumu Sinkiraat wa Filikhuun wa Harmiis wa Batruub wa Harmaas wa kulla l‑akhwaan al‑maʼaahum.
15 Wa sallumu Filuluukh wa Juuliya wa Niiri wa akhtah wa Uluumba wa kulla l‑saalihiin al‑gaaʼidiin maʼaahum.
16 Wa assaalamo ambeenaatku be salaam al‑saalihiin.
Kulla jamaaʼaat al‑muʼminiin be l‑Masiih yisallumuuku.
Nihaayat al‑jawaab
17 Ya akhwaani,
niwassiiku be cheyy waahid.
Angarʼu min al‑naas al‑yiʼallumuuku be taʼliim chig min al‑taʼliim al‑simiʼtuuh awwal.
Al‑naas dool yifarrugu al‑muʼminiin be kalaamhum wa yitallufu iimaanhum.
Kissu minhum baʼiid.
18 Al‑naas al‑misil dool ma yakhdumu le Rabbina al‑Masiih laakin yakhdumu le butuunhum bas.
Yihajju le l‑naas be kalaam halu wa yachkuruuhum katiir achaan yukhuchchu al‑naas al‑induhum ilim chiyya bas.
19 Wa leeku intu,
kulla l‑naas yaʼarfu intu simiʼtu bichaarat al‑Masiih wa taabaʼtuuha.
Wa fi chaanku,
ana farhaan laakin nidoor intu tabgo faahimiin fi l‑kheer wa bariyiin min al‑charr.
20 Wa Allah Rabb al‑salaam ma yiʼakhkhir yarhak Ibliis tihit rijleeku.
Aleekum rahmat Rabbina Isa.
21 Wa akhuuyi Timuutaawus al‑yakhdim maʼaayi sawa yisallimku.
Wa ahali Luukiyus wa Yaasuun wa Suubaatar kula yisallumuuku.
22 Wa ana Tartiiyus al‑gaaʼid naktib kalaam Buulus fi l‑jawaab da,
nisallimku be usum al‑Rabb.
23 Wa Khaayus yisallimku.
Hu siid al‑beet al‑ana muddayyif foogah.
Wa beetah hu al‑bakaan al‑yilimmu foogah jamaaʼat al‑muʼminiin.
Wa Rastus wakiil sanduug hana maal al‑hille wa akhuuna Kawaartus yisallumuuku.
24 Aleeku kulluku niʼmat Rabbina Isa al‑Masiih.
Aamiin.
25 Wa khalaas nachkuru Allah !
Achaan hu yagdar yigawwiiku fi l‑iimaan be bichaarat al‑Masiih al‑nijiibha leeku wakit niballikh be Isa al‑Masiih.
Wa be l‑bichaara di,
Allah yiʼarrif al‑sirr al‑mulabbad min al‑zaman al‑faat.
26 Wa laakin hassaʼ bayyanah khalaas be kutub al‑anbiya le kulla l‑umam al‑ma Yahuud.
Wa Allah al‑Hayy ila l‑abad anta al‑amur da achaan kulla l‑chaʼab yiʼaamunu beyah wa yitaabuʼu kalaamah.
27 Wa l‑hamd waajib le Allah al‑Waahid al‑Hakiim,
be usum Isa al‑Masiih ila l‑abad.
Aamiin.