15
1 Laakin aniina al‑gawiyiin fi l‑iimaan,
waajib nahmalo akhwaanna al‑ma gawiyiin fi l‑iimaan.
Wa ma waajib nisawwu al‑cheyy al‑yaʼajibna aniina bas.
2 Khalli ayyi naadum minnina yisawwi al‑cheyy al‑yaʼajib akhuuh wa da,
le kheerah wa le yigawwiih fi l‑iimaan.
3 Achaan al‑Masiih zaatah ma chaal al‑derib al‑yaʼajib nafsah,
laakin maktuub fi l‑Kitaab :
﴾Al‑yiʼayyuruuk,
muʼyaarhum wagaʼ foogi ana kula.﴿*
4 Kulla cheyy al‑katabooh fi l‑zaman al‑faat ankatab le yiʼallimna.
Achaan be l‑sabur wa l‑chajaaʼa al‑allamnaahum min al‑kutub,
namchu giddaam be acham.
5 Allah yanti al‑sabur wa l‑chajaaʼa wa khalli yantiiku kulluku fikir waahid le titaabuʼu derib al‑Masiih Isa
6 lahaddi kulluku timajjudu Allah abu Rabbina Isa al‑Masiih be niiye waahide wa be hiss waahid.
Bichaarat al‑Masiih le kulla l‑naas
7 Khalaas,
akhbalo kulla muʼmin be l‑Masiih misil al‑Masiih khibilaaku.
Wa be misil da,
timajjudu Allah.
8 Wa fi chaan da,
nuguul leeku kadar al‑Masiih bigi khaddaam le l‑Yahuud achaan yiwassif kadar Allah saadikh wa yitimm al‑cheyy al‑waaʼad beyah juduudhum.
9 Wa ja achaan al‑naas al‑ma Yahuud kula yachkuru Allah fi chaan rahmatah.
Maktuub fi l‑Kitaab :
﴾Be sabab da,
ya Allah,
fi ust al‑umam nachkurak wa be khine,
namdah usmak.﴿*
10 Wa battaan buguul :
﴾Ya l‑umam,
afraho maʼa chaʼab Allah.﴿*
11 Wa battaan buguul :
﴾Ya kulla l‑umam,
ahmudu Allah !
Ya kulla l‑chuʼuub,
majjuduuh !﴿*
12 Wa l‑nabi Ichaʼya gaal :
﴾Min zurriiyit Yassa* yaji naadum wa yabga malik fi kulla l‑umam.
Wa l‑chuʼuub al‑aakhariin yukhuttu achamhum foogah.﴿*
13 Wa Allah al‑antaaku acham yantiiku al‑farha wa l‑salaam fi l‑iimaan achaan achamku foogah yiziid be gudrat al‑Ruuh al‑Khudduus.
Khidmit Buulus fi ust al‑umam
14 Ya akhwaani,
ana be nafsi muʼakkid kadar intu malaaniin be l‑kheer wa be l‑ilim wa gaadriin tilwaaso ambeenaatku.
15 Laakin fi achya waahidiin katabt leeku be kalaam gawi chiyya achaan dawwart nizakkirku beehum.
Wa gidirt katabt misil da be sabab al‑niʼma al‑Allah antaaha leyi
16 le nabga khaddaam le l‑Masiih Isa.
Wa khidimti hi ballikhiin bichaarat Allah le l‑umam al‑ma Yahuud.
Ana nabga misil raajil diin wakit niballikh bichaarat Allah le l‑umam al‑ma Yahuud le yabgo misil dahiiye al‑Allah yarda beeha.
Wa l‑dahiiye di tabga khaassa le Allah be gudrat al‑Ruuh al‑Khudduus.
17 Wa achaan da,
nilfachchar be kulla l‑khidme al‑sawweetha le Allah be l‑Masiih Isa.
18 Wa abadan ma nidoor nihajji be ayyi khidme illa l‑khidme al‑Isa al‑Masiih sawwaaha beyi achaan al‑umam yitiiʼu Allah.
Hu khadam be kalaam wa be fiʼil
19 wa be gudrat al‑ajaayib wa l‑alaamaat wa be gudrat al‑Ruuh al‑Khudduus.
Wa misil da,
ana ballakht bichaarat al‑Masiih le l‑naas fi kulli bakaan min Madiinat al‑Khudus lahaddi balad Illirkuun.
20 Wa indi niiye daayman achaan niballikh al‑bichaara fi ayyi bakaan al‑lissaaʼ ma ballakho foogah usum al‑Masiih.
Ma nidoor nabni fi asaas al‑khattaah naadum aakhar.
21 Nidoor nitaabiʼ al‑kalaam al‑maktuub al‑buguul :
﴾Al‑naas al‑ma hajjoohum beyah yichiifuuh.
Wa l‑ma simʼo beyah yafhamooh.﴿*
Buulus yidoor yakhcha Rooma
22 Wa iddat marraat,
haawalt najiiku wa ma gidirt achaan khidimti di daharatni.
23 Laakin hassaʼ ma faddal leyi bakaan fi l‑manaatig dool al‑nibachchir foogah.
Wa min siniin katiiriin,
nidoor najiiku.
24 Wa khalaas,
nagdar nakhchaaku wakit namchi Isbaaniya.
In cha Allah,
najiiku wa nagood maʼaaku ayyaam wa da yabga leyi halu.
Wa baʼad da,
tisaaʼuduuni achaan nisaafir giddaam.
25 Laakin hassaʼ da,
ana maachi Madiinat al‑Khudus achaan nisaaʼid al‑saalihiin.
26 Achaan al‑muʼminiin al‑fi Magiduuniya wa l‑Yuunaan chaalo niiye ambeenaathum achaan yirassulu musaaʼada le l‑masaakiin al‑gaaʼidiin ambeen al‑saalihiin fi Madiinat al‑Khudus.
27 Wa chaalo al‑niiye di be farah.
Wa da misil deen fooghum achaan awwal al‑Yahuud gassamo barakaathum al‑ligoohum min Allah maʼa l‑ma Yahuud.
Wa hassaʼ al‑ma Yahuud waajib leehum yisaaʼudu al‑Yahuud be l‑barakaat al‑ardiiye al‑ligoohum.
28 Wa wakit al‑khidme di tikammil wa ana anteethum kulla cheyy al‑lammooh leehum,
nichiil derib hana Isbaaniya wa nakhchaaku fi Rooma.
29 Wa naʼarif kadar wakit nalhag bakaanku da,
najiiku malaan be barakat al‑Masiih al‑khaassa leeku.
30 Wa hassaʼ ya akhwaani,
natlub minku be usum Rabbina Isa al‑Masiih wa be mahabbat al‑Ruuh al‑Khudduus achaan intu tasʼalo Allah maʼaayi be chidde.
31 Asʼalo leyi Allah achaan yafzaʼni min al‑Yahuud al‑ma Masiihiyiin fi daar al‑Yahuudiiya.
Wa asʼalo achaan al‑saalihiin al‑fi Madiinat al‑Khudus yardo be l‑musaaʼada al‑nijiibha leehum.
32 Wa misil da,
in cha Allah najiiku be farah wa ninjamma maʼaaku chiyya.
33 Allah Rabb al‑salaam yukuun maʼaaku kulluku.
Aamiin.