Al‑Masiih naada Simʼaan wa rufgaanah
5
1 Wa yoom waahid,
Isa gaaʼid jamb bahar al‑Jaliil.
Wa l‑naas al‑yidooru yasmaʼo kalaam Allah bigo katiiriin marra waahid lahaddi gaaʼidiin yaʼasuruuh.
2 Wa chaaf maraakib itneen gaaʼidiin fi khachum al‑bahar.
Al‑hawwaatiin nazalo minhum le yikhassulu churukkaahum.
3 Wa Isa rikib fi markaba waahide wa hi hana Simʼaan.
Wa talab min Simʼaan yilizzaha chiyya min khachum al‑bahar.
Wa gaʼad tihit fi l‑markaba wa bada yiʼallim al‑naas al‑gaaʼidiin fi khachum al‑bahar.
4 Wa wakit Isa kammal kalaamah,
hu hajja le Simʼaan wa gaal :
« Waddi al‑markaba fi ust al‑bahar wa oori naasak yazgulu al‑charak fi l‑almi le yakurbu huut. »
5 Wa Simʼaan radda leyah wa gaal :
« Ya Sayyidna,
tiʼibna tuul al‑leel wa ma karabna cheyy.
Laakin nazgul al‑charak kan inta tidoorah. »
6 Wa wakit zagalo charakhum,
karabo huut katiir bilheen lahaddi l‑charak yidoor yingatiʼ min al‑tagala.
7 Wa sawwo ichaara le rufgaanhum al‑fi l‑markaba al‑aakhara achaan yiʼaawunuuhum.
Wa jo malo al‑maraakib al‑itneen lahaddi l‑maraakib yidooru yakhtusu.
8 Wa wakit Simʼaan Butrus chaaf al‑cheyy al‑bigi da,
hu sajad giddaam rijileen Isa wa gaal :
« Ya Rabb,
kiss minni baʼiid !
Achaan ana naadum muznib. »
9 Wa hajja misil da achaan hu wa kulla jamaaʼtah fi l‑markaba alʼajjabo bilheen min al‑huut al‑katiir al‑karabooh.
10 Wa rufgaanah le Simʼaan,
Yaakhuub wa Yuuhanna awlaad Zabadi,
kula alʼajjabo maʼaayah.
Wa Isa gaal le Simʼaan :
« Ma takhaaf.
Awwal inta gaaʼid takrub al‑huut wa laakin min al‑yoom takrub al‑naas le tijiibhum leyi. »
11 Wa min gabbalo maraakibhum fi khachum al‑bahar,
humman khallo kulla cheyy wa gammo taabaʼo Isa.
Al‑Masiih chafa naadum indah jidaam
12 Wa yoom waahid,
Isa gaaʼid fi hille waahide wa raajil waahid indah jidaam ja leyah.
Wa l‑raajil da indah jidaam* cheen.
Wa wakit chaaf Isa,
hu sajad giddaamah wa gaal :
« Ya sayyidna,
kan tidoor tachfiini akiid inta tagdar wa ana nabga taahir. »
13 Wa Isa madda iidah wa limis al‑raajil al‑indah jidaam wa gaal :
« Nidoor nachfiik.
Abga taahir.
» Wa tawwaali bigi taahir min al‑jidaam.
14 Wa Isa amarah wa gaal leyah :
« Ma tiʼoori naadum.
Amchi wassif nafsak le raajil al‑diin wa gaddim dahiiye le Allah misil al‑nabi Muusa amaraana beeha.
Wa misil da,
al‑naas yaʼarfu kadar inta ligiit al‑aafe wa bigiit taahir. »
15 Laakin be da,
khabarah chattat be ziyaada fi l‑naas.
Wa naas katiiriin marra waahid laammiin foogah achaan yidooru yasmaʼo kalaamah wa hu yachfi amraadhum.
16 Laakin Isa gamma wiheedah misil fi aadtah wa macha fi l‑khala achaan yisalli.
Al‑Masiih khafar le l‑mukarsah
17 Wa yoom aakhar,
Isa gaaʼid yiʼallim al‑naas.
Wa fi l‑bakaan da,
fi naas katiiriin gaaʼidiin maʼaayah min tariigat al‑Fariiziiya wa min al‑muʼallimiin fi l‑Tawraat.
Wa humman jo min ayyi hille al‑fi daar al‑Jaliil wa l‑Yahuudiiya wa min Madiinat al‑Khudus.
Wa gudrat Allah gaaʼide foogah achaan yachfi al‑mardaaniin.
18 Wa rujaal waahidiin jo wa humman chaayliin naadum mukarsah fi furaachah.
Wa dawwaro yadkhulu beyah daakhal wa yukhuttuuh giddaam Isa.
19 Laakin ma irfo kikkeef yidakhkhulu al‑naadum da le Isa,
be sabab al‑naas al‑katiiriin al‑saddo leehum al‑derib.
Wa achaan da,
rikbo fi raas al‑beet wa gaddooh be foog.
Wa dallo al‑mukarsah be furaachah fi ust al‑naas wa khattooh giddaam Isa.
20 Wakit Isa chaaf iimaanhum,
hajja le l‑raajil al‑mukarsah wa gaal :
« Ya akhuuyi,
zunuubak ankhafaro. »
21 Wa l‑ulama wa l‑Fariiziyiin bado yihajju fi guluubhum wa yuguulu :
« Haay !
Da yaatu al‑gaaʼid yihajji be kalaam kufur da ?
Al‑insaan ma yagdar yakhfir zunuub al‑insaan,
illa Allah ! »
22 Wa Isa irif al‑kalaam al‑fi guluubhum.
Wa radda leehum wa gaal :
« Maala tifakkuru fi guluubku ?
23 Weenu al‑hayyin nuguulah ?
Nuguul :
‹ Zunuubak ankhafaro ›,
walla nuguul :
‹ Gumm wa ruukh › ?
24 Wa laakin nidoor intu taʼarfu kadar ana,
Ibn al‑Insaan,
indi sulta fi l‑ard achaan nakhfir le l‑naas zunuubhum. »
Wa gaal le l‑mukarsah :
« Nuguul leek,
gumm !
Chiil furaachak wa amchi beetak ! »
25 Wa tawwaali al‑mukarsah gamma giddaamhum wa chaal furaachah al‑raagid foogah wa macha beetah.
Wa fi l‑derib,
hu gaaʼid yachkur Allah.
26 Wa kulluhum alʼajjabo marra waahid wa gammo yachkuru Allah.
Wa l‑khoof karabaahum wa gaalo :
« Al‑yoom chifna cheyy ajiib ! »
Al‑Masiih naada Laawi
27 Wa baʼad da,
Isa marag.
Wa chaaf naadum waahid usmah Laawi al‑yilimm al‑daraayib.*
Wa gaaʼid yakhdim fi maktab al‑daraayib.
Wa Isa gaal leyah :
« Taʼaal taabiʼni. »
28 Wa khalaas Laawi khalla kulla cheyy wa gamma taabaʼah.
29 Wa Laawi sawwa leyah aazuuma kabiire fi beetah.
Wa fi naas katiiriin al‑yilimmu al‑daraayib wa naas aakhariin jo wa gaaʼidiin yaakulu maʼaayah.
30 Wa l‑Fariiziyiin wa ulamaahum harajo talaamiiz Isa wa gaalo :
« Maala taakulu wa tacharbo maʼa naas al‑daraayib wa l‑muznibiin ? »
31 Wa Isa radda leehum wa gaal :
« Al‑naas al‑taybiin ma hawjaaniin daktoor,
illa l‑mardaaniin bas.
32 Ana ma jiit achaan ninaadi al‑saalihiin,
laakin jiit le ninaadi al‑muznibiin le l‑tooba. »
Al‑Masiih saʼalooh fi l‑siyaam
33 Wa gaalo leyah :
« Talaamiiz Yahya wa talaamiiz al‑Fariiziyiin yusuumu wa yisallu katiir.
Laakin talaamiizak inta gaaʼidiin yaakulu wa yacharbo. »
34 Wa Isa radda leehum wa gaal :
« Kan naas gaaʼidiin fi iris wa l‑ariis maʼaahum,
tidooru humman yusuumu walla ?
35 Wa laakin yoom waahid yaji,
al‑ariis yichiiluuh minhum wa khalaas fi l‑wakit daak,
yusuumu. »
36 Wa battaan hu hajja leehum be masal wa gaal :
« Ma fi naadum al‑yachrut gitʼe min khalag jadiid achaan yargaʼ beeha khalag gadiim.
Achaan kan yisawwi misil da,
hu yitallif al‑khalag al‑jadiid wa l‑gitʼe al‑chaalaaha min al‑jadiid ma tiwaafig maʼa l‑gadiim.
37 « Wa ma fi naadum yusubb khamar jadiid fi girbe gadiime.
Kan yisawwi misil da,
al‑khamar al‑jadiid yuchugg al‑girbe wa l‑khamar yidaffig wa l‑girbe tatlaf.
38 Laakin waajib yusubbu khamar jadiid fi girbe jadiide.
39 Wa baʼad naadum chirib al‑khamar al‑gadiim hu ma yidoor yachrab al‑jadiid,
achaan hu yuguul al‑khamar al‑gadiim bas adiil. »