Khilaaf fi yoom al‑sabt
6
1 Yoom waahid,
Isa raayikh fi ust al‑ziraaʼa wa da yoom al‑sabt.
Wa talaamiizah gammo yagtaʼo ganaadiil al‑gameh wa yafurkuuhum fi iideehum wa yaakuluuh.
2 Laakin Fariiziyiin waahidiin gaalo :
« Maala intu tisawwu al‑khidme al‑ma halaala fi yoom al‑sabt ? »
3 Wa Isa radda leehum wa gaal :
« Ma gareetu al‑Kitaab walla ?
Nisiitu al‑cheyy al‑Dawuud wa jamaaʼtah sawwooh wakit al‑juuʼ sawwaahum walla ?
4 Hu dakhal fi beet Allah wa akal al‑khubza al‑gaddamooha al‑naas le Allah.*
Wa da ma halaal le ayyi naadum illa le rujaal al‑diin.
Wa Dawuud zaatah akal wa anta minha le jamaaʼtah kula. »
5 Wa Isa gaal :
« Ibn al‑Insaan hu Rabb yoom al‑sabt wa ana bas hu. »
6 Wa fi yoom sabt aakhar,
Isa dakhal fi beet al‑sala wa gaaʼid yiʼallim al‑naas.
Wa fiyah naadum waahid iidah al‑zeene mayte gaaʼid daakhal.
7 Wa l‑Fariiziyiin wa l‑ulama khatto baalhum le Isa.
Yidooru yaʼarfu kan hu yachfiih fi yoom al‑sabt walla la,
achaan yalgo fursa le yukhuttu foogah tuhma.
8 Laakin hu irif fikirhum.
Wa hajja le l‑raajil al‑iidah mayte wa gaal :
« Gumm foog giddaam al‑naas.
» Wa l‑raajil gamma wagaf giddaamhum.
9 Wa Isa hajja leehum wa gaal :
« Nasʼalku cheyy waahid.
Chunu al‑halaal fi yoom al‑sabt ?
Al‑kheer walla l‑charr ?
Halaal leena ninajju al‑naas walla nahalkuuhum ? »
10 Wa Isa allaffat achaan yichiifhum kulluhum fi uyuunhum.
Wa hajja le l‑raajil wa gaal :
« Midd iidak.
» Wa l‑raajil maddaaha wa khalaas iidah achchaafat.
11 Laakin al‑Fariiziyiin wa l‑ulama ziʼilo zaʼal chadiid.
Wa gammo yichchaawaro ambeenaathum fi l‑cheyy al‑yagdaro yisawwuuh le Isa.
Al‑rusul al‑atnaachar
12 Wa fi l‑wakit da,
Isa marag wa talaʼ fi hajar achaan yisalli.
Wa tuul al‑leel hu gaaʼid yisalli le Allah.
13 Wa wakit al‑wata asbahat,
hu naada talaamiizah wa azal minhum 12 wa sammaahum rusul.
14 Wa humman Simʼaan al‑Isa sammaah Butrus wa Andareeyas akhuuh le Simʼaan wa Yaakhuub wa Yuuhanna wa Filibbus wa Bartulma
15 wa Matta wa Tuuma wa Yaakhuub wileed Halfa wa Simʼaan al‑binaaduuh al‑Sawri
16 wa Yahuuza wileed Yaakhuub wa Yahuuza al‑Iskhariyooti al‑baʼadeen yukhuun Isa.
17 Wa hu nazal maʼaahum min al‑hajar wa wagaf fi bakaan wasiiʼ.
Wa talaamiiz katiiriin gaaʼidiin maʼaayah.
Wa naas katiiriin marra waahid jo min kulla daar al‑Yahuudiiya wa min madiinat al‑Khudus wa min al‑hillaal al‑jamb al‑bahar gariib le Suur wa Seeda.
18 Wa l‑naas dool jo achaan yasmaʼo kalaamah wa hu yachfi amraadhum.
Wa l‑naas al‑induhum chawaatiin kula,
hu daawaahum.
19 Wa kulla l‑naas dawwaro yalmasooh achaan al‑gudra al‑tamrug minnah tachfiihum kulluhum.
Taʼliim al‑Masiih
20 Wa Isa rafaʼ raasah chaaf talaamiizah wa gaal :
« Mabruuk leeku intu al‑masaakiin
achaan mamlakat Allah hintuku.
21 Mabruuk leeku intu al‑hassaʼ jiiʼaaniin
achaan baʼadeen tachbaʼo.
Mabruuk leeku intu al‑tabku min al‑nadaama
achaan baʼadeen tadhako min al‑farah.
22 Mabruuk leeku intu
kan al‑naas yakrahooku
wa yaabooku wa yiʼayyuruuku
wa yitallufu usumku be sababi ana,
Ibn al‑Insaan.
23 Fi l‑yoom daak,
anbastu wa nattutu min al‑farha
achaan nuguul leeku ajurku fi l‑sama kabiir bilheen.
Ma tanso kadar zamaan juduudhum
sawwo nafs al‑cheyy le l‑anbiya al‑faato.
24 « Laakin al‑azaab yarjaaku intu siyaad al‑maal
achaan kulla l‑raaha al‑talgooha ligiituuha khalaas.
25 Wa l‑azaab yarjaaku intu al‑chabʼaaniin
achaan baʼadeen tabgo jiiʼaaniin.
Wa l‑azaab yarjaaku intu al‑gaaʼidiin tadhako
achaan baʼadeen tabku wa tahzano min al‑nadaama.
26 Wa l‑azaab yarjaaku intu
kan kulla l‑naas yachkuruuku.
Ma tanso kadar zamaan al‑naas
chakaroohum le l‑kaddaabiin al‑sawwo nufuushum anbiya. »
Al‑mahabba al‑waajbe
27 Wa Isa gaal battaan :
« Wa laakin ana nuguul leeku intu al‑tasmaʼo kalaami,
hibbu aduuku wa sawwu al‑kheer le l‑naas al‑yakrahooku.
28 Wa baaruku al‑naas al‑yalʼanooku wa asʼalo Allah be l‑kheer fi chaan al‑naas al‑yitaʼʼubuuku.
29 Kan naadum daggaak fi chidgak al‑waahide,
antiih al‑aakhara kula.
Wa kan naadum yidoor yichiil jallaabiiytak,
khalaas khalli yichiil jawwaaniiytak kula.
30 Anti le ayyi naadum al‑yasʼal minnak cheyy wa l‑naadum al‑chaal minnak khumaamak ma tasʼalah minnah.
31 Wa sawwu le l‑naas al‑cheyy al‑intu zaatku tidooru al‑naas yisawwuuh leeku.
32 « Wa kan tihibbu al‑naas al‑yihibbuuku bas,
ween al‑kheer al‑sawweetuuh ?
Al‑muznibiin zaathum yihibbu al‑yihibbuuhum.
33 Wa kan intu tisawwu al‑kheer le l‑naas al‑yisawwu leeku al‑kheer,
ween al‑baraka ?
Al‑muznibiin yisawwu nafs al‑cheyy.
34 Wa kan tidayyunu al‑naas al‑induku fooghum achaan le yigabbulu leeku gurusku,
ween al‑kheer al‑sawweetuuh ?
Al‑muznibiin zaathum yidayyunu akhwaanhum al‑muznibiin al‑yagdaro yikaffuuhum.
35 « Laakin hibbu udwaanku wa sawwu leehum al‑kheer wa dayyunuuhum wa ma tarjo minhum cheyy wa khalaas talgo ajur kabiir.
Wa misil da,
tabgo iyaal Allah al‑Aali.
Hu yisawwi zeen le l‑naas al‑fasliin al‑ma yachkuruuh.
36 Arhamo al‑naas misil abuuku Allah rahiim le l‑naas.
37 « Ma tihaakumu al‑naas achaan Allah ma yihaakimku intu.
Ma tajʼalo al‑naas khaatiyiin achaan Allah ma yajʼalku intu khaatiyiin.
Saamuhu al‑naas wa Allah yisaamihku.
38 Antu le l‑naas wa Allah yantiiku.
Yantiiku be iid wasiiʼe fi iideeku wa yukuun wazin adiil wa kiyaala lahaddi yidaffig.
Allah yikiil leeku be nafs al‑mikyaal al‑intu tikiilu beyah le l‑naas. »
Masal al‑gechchaay wa l‑uud
39 Wa Isa hajja leehum battaan be masal wa gaal :
« Naadum amyaan yagdar yuguud naadum amyaan walla ?
Kulluhum ma yagaʼo fi nugra walla ?
40 Al‑tilmiiz ma akbar min sayyidah laakin wakit allamah kulla cheyy,
al‑tilmiiz yabga misil sayyidah.
41 Kikkeef tichiif gechchaay fi een akhuuk wa laakin ma tichiif al‑uud al‑kabiir al‑gaaʼid fi eenak inta ?
42 Walla kikkeef tuguul le akhuuk ‹ Khalliini nisill al‑gechchaay min eenak › wa inta zaatak ma chift al‑uud al‑gaaʼid fi eenak ?
Ya munaafikh !
Awwal ke sill al‑uud al‑fi eenak wa misil da tichiif adiil wa khalaas tagdar tisill al‑gechchaay al‑fi een akhuuk.
43 « Ma fi chadara adiile al‑talda iyaal fasliin.
Wa battaan ma fi chadara fasle al‑talda iyaal adiiliin.
44 Achaan al‑naas yaʼarfu ayyi chadara min iyaalha.
Ma yalgo iyaal jimmeez fi l‑chadara al‑indaha chook.
Wa ma yilaggutu inab min andireesa.
45 « Al‑galib hu misil makhazan.
Wa l‑naadum al‑adiil yudumm kalaam adiil fi galbah wa l‑kalaam al‑yamrug minnah adiil.
Wa l‑naadum al‑fasil yudumm kalaam fasil fi galbah wa l‑kalaam al‑yamrug minnah fasil.
Achaan al‑cheyy al‑galib al‑naadum malaan beyah,
da bas al‑yamrug min khachmah wakit yihajji.
Masal al‑buyuut al‑itneen
46 « Kikkeef tinaaduuni :
‹ Ya sayyidna,
Ya sayyidna › kan ma tisawwu al‑cheyy al‑nuguulah leeku ?
47 Ayyi naadum al‑yaji leyi wa yasmaʼ kalaami wa yitaabiʼah,
ana niʼooriiku be l‑cheyy al‑hu yichaabihah.
48 Hu misil naadum waahid al‑bana beet.
Awwal nakat fi l‑turaab achaan yukhutt asaas al‑beet fi l‑hajar al‑gaaʼid tihit.
Wa almi al‑waadi saal wa darab al‑beet wa l‑beet ma anhazza achaan hu mabni adiil.
49 Wa laakin al‑naadum al‑yasmaʼ kalaami wa ma yitabbigah,
hu yabga misil al‑naadum al‑bana beetah fi l‑turaab bala asaas.
Wa almi al‑waadi darabah wa ajala ke al‑beet wagaʼ wa tilif marra waahid. »