Allah yinajji Madiinat al‑Khudus
12
1 Daahu al‑muhaakama al‑kallam beeha Allah fi chaan Bani Israaʼiil.
Wa da kalaam Allah al‑falla al‑samaawaat wa assas al‑ard wa khalag al‑ruuh fi daakhal al‑insaan.
Wa hu gaal :
2 « Daahu ana nisawwi Madiinat al‑Khudus misil kaas al‑yisakkir kulla l‑chuʼuub al‑mujaawiriinha.
Wa naas Yahuuza kula yabga leehum misil da,
wakit yihaasuru Madiinat al‑Khudus.
3 Wa fi l‑yoom da,
ana nukhutt Madiinat al‑Khudus giddaam kulla l‑chuʼuub misil hajar kabiir al‑abadan ma yagdaro yarfaʼooh.
Wa ayyi naadum al‑yihaawil yarfaʼah,
yinjarih.
Wa kulla umam al‑ard yilimmu wa yugummu didd al‑hajar da.
4 « Wa fi l‑yoom da,
kulla l‑kheel niliff raashum wa nadrub agul rukkaabhum.
Wa laakin le Bani Yahuuza,
nukhutt eeni fooghum wa le kulla kheel al‑chuʼuub kamaan,
nadrubhum be l‑ama.
Wa da kalaam Allah.
5 Wa chuyuukh Yahuuza yuguulu fi nufuushum :
‹ Sukkaan Madiinat al‑Khudus ligo gudrithum min Allah al‑Gaadir Ilaahhum. ›
6 « Wa fi l‑yoom da,
ana nisawwi chuyuukh Yahuuza misil kaanuun malaan naar tihit koom hana hatab aw misil naar al‑mugabbide fi rubta hana ganaadiil.
Wa humman yaakulu zeene wa isra kulla l‑chuʼuub al‑mujaawiriinhum.
Wa laakin sukkaan Madiinat al‑Khudus yaskunu fi madiinithum.
7 Wa ana Allah ninajji fi l‑awwal aayilaat Bani Yahuuza.
Wa be da,
charaf zurriiyit Dawuud wa sukkaan Madiinat al‑Khudus ma yabga ziyaada min charaf aayilaat Bani Yahuuza.
8 « Wa fi l‑yoom da,
ana Allah nahmi sukkaan Madiinat al‑Khudus hatta al‑daʼiif minhum kula yabga chadiid misil al‑malik Dawuud.
Wa zurriiyit Dawuud yalgo ihtiraam misli ana al‑Rabb wa misil malak Allah al‑maachi giddaamhum.
9 « Wa fi l‑yoom da,
ana nichiil niiye achaan nidammir kulla l‑umam al‑yaju yahjumu Madiinat al‑Khudus.
10 Wa ninazzil fi zurriiyit Dawuud wa fi sukkaan Madiinat al‑Khudus ruuh hana rahma wa duʼa.
Wa yichiifu aleyi ana al‑humman taʼanooni be amalhum al‑cheen al‑misil harba.
Humman yahzano leyah misil hizin al‑wileed al‑wahiid wa yabku leyah misil baki le l‑wileed al‑bikir.
11 « Wa fi l‑yoom da,
al‑hizin yabga chadiid fi Madiinat al‑Khudus misil hizin Haddaad Rimmuun fi kadaadit Magiddu.
12 Wa l‑balad tahzan,
ayyi khachum beet wiheedah.
Khachum beet zurriiyit Dawuud yahzano wiheedhum
wa awiinhum wiheedhin.
Khachum beet zurriiyit Naataan yahzano wiheedhum
wa awiinhum wiheedhin.
13 Khachum beet zurriiyit Laawi yahzano wiheedhum
wa awiinhum wiheedhin.
Khachum beet Chimʼi yahzano wiheedhum
wa awiinhum wiheedhin.
14 Wa kulla khuchuum buyuut al‑aakhariin yahzano wiheedhum
wa awiinhum wiheedhin. »