Al‑buldaan al‑gawiyiin yiddammaro
11
1 Ya Lubnaan,
aftahe biibaanki
wa khalli al‑naar tahrig chadarki hana l‑arz !
2 Ya chadar al‑sarwi,
abku be hizin
achaan chadar al‑arz addammar
wa l‑kharaab lihig al‑chadar al‑aziimiin dool.
Ya chadar al‑balluut hana Baachaan,
abku be hizin
achaan al‑khaaba al‑dalma
wagaʼat fi l‑turaab.
3 Asmaʼo !
Al‑ruʼyaan yabku be hizin
achaan bakaanhum al‑aziim khirib.
Asmaʼo !
Al‑diidaan yikirru
achaan khaabat al‑Urdun khirbat.
Masal al‑ruʼyaan al‑itneen
4 Wa daahu Allah Ilaahi gaal :
« Sarrih khanam al‑juzur.
5 Wa l‑yachru al‑khanam dool yadbahoohum wa ma yandamo leehum.
Wa l‑yibiiʼuuhum yuguulu :
‹ Baarak Allah !
Daahuuni khani !
› Wa l‑yasraho beehum kula ma induhum leehum mahanna.
6 Wa ana kulla battaan ma indi ayyi mahanna le sukkaan al‑balad !
Wa daahu ana nisallim ayyi naadum fi iid jaarah wa ayyi naadum fi iid malikah.
Wa l‑muluuk yakharbu al‑balad wa laakin ana ma ninajji naadum min iidhum !
» Wa da kalaam Allah.
7 Wa khalaas,
ana saraht le l‑tujjaar be khanamhum hana l‑juzur.
Wa chilt itneen dugul.
Al‑awwalaani sammeetah Rida wa l‑taani sammeetah Wihda.
Wa khalaas,
saraht be l‑khanam.
8 Wa fi chahar waahid,
ana taradt ruʼyaanhum al‑talaata.
Wa fi l‑akhiir,
ma gidirt nahmal tujjaar al‑khanam.
Wa kan leehum humman kula,
bakhadooni.
9 Wa khalaas,
ana gult leehum :
« Battaan ma nasrah leeku.
Khalli al‑yumuutu,
yumuutu !
Wa l‑yiwadduru,
yiwadduru !
Wa l‑faddalo kamaan,
khalli yilʼaakalo ambeenaathum ! »
10 Wa ana karabt dugli Rida wa kassartah le nangud al‑muʼaahada al‑sawweetha maʼa kulla l‑chuʼuub.
11 Wa fi l‑yoom da,
ana nagadtaha.
Wa tujjaar al‑khanam al‑gaaʼidiin yichiifuuni irfo kadar fiʼili da hasab kalaam Allah.
12 Wa khalaas,
ana gult leehum :
« Kan yaʼajibku,
kaffuuni ujurti.
Wa kan ma yaʼajibku,
khalaas khalluuh.
» Wa humman wazano leyi ujurti wa kaffooni talaatiin hajar fudda.
13 Wa Allah gaal leyi :
« Yichiifu da bas al‑ujra al‑adiil leyi walla ?
La !
Mustahiil !
Azgulha le l‑haddaadi !
» Wa ana chilt al‑talaatiin hajar fudda wa zagaltuhum le l‑haddaadi al‑fi beet Allah.
14 Wa baʼad da,
kassart dugli al‑taani Wihda le nangud al‑alaakha ambeen Bani Yahuuza wa Bani Israaʼiil.
15 Wa Allah gaal leyi :
« Amchi battaan wa sawwi nafsak misil raaʼi mukhaffal.
16 Daahu ana nukhutt raaʼi fi l‑balad di.
Al‑khanamaay al‑muwaddire,
hu ma lammaah beeha.
Wa l‑tiwaddir kula,
hu ma yifattichha.
Wa l‑tinkasir kula,
hu ma yiʼaalijha.
Wa l‑aafe kula,
hu ma yisarrihha.
Wa laakin hu yaakul al‑khanam al‑sumaan wa yigattiʼ dalaafeehum.
17 Al‑azaab le l‑raaʼi al‑ma adiil
al‑yikhalli al‑khanam !
Khalli al‑seef yadrub iidah
wa yigidd eenah al‑zeene !
Khalli iidah taybas
wa eenah al‑zeene tumuut ! »