Kitaab Malaakhi
min Kutub al‑Anbiya
Mugaddima
Al‑usum Malaakhi be kalaam ibraani da maʼanaatah rasuuli. Malaakhi hu nabi al‑kallam le naas Bani Israaʼiil baʼad humman gabbalo min al‑khurba wa simʼo kalaam al‑anbiya Haggaay wa Zakariiya wa bano battaan beet Allah fi Madiinat al‑Khudus. Wa Malaakhi hajja wakit Nahamya gaaʼid fi Madiinat al‑Khudus.
Fi l‑wakit da, al‑naas gaaʼidiin yarjo be acham kadar Allah yijiib leehum al‑raaha wa l‑salaam. Wa laakin al‑wakit al‑gaaʼidiin yarjooh da ma ja leehum ajala. Wa da achaan rujaal al‑diin ma ahtaramo Allah wa ma tabbago gawaaniinah wa daayman yukhuchchu Allah be dahaaya nijsiin. Allah hu malik kabiir fi l‑umam wa laakin Bani Israaʼiil gaaʼidiin yahguruuh.
Wa l‑chaʼab kula gaaʼidiin yisawwu khata. Yaakhudu awiin al‑yaʼabudan asnaam wa yitallugu awiinhum al‑hinna min Bani Israaʼiil. Wa battaan abo ma yijiibu al‑zaka wa l‑uchur le beet Allah. Wa fi chaan da, Malaakhi kallam le l‑chaʼab wa gaal waajib yikhayyuru haalhum achaan yoom Allah jaayi al‑foogah hu yihaakimhum wa yiwassif leehum adaaltah. Wa laakin gabul al‑yoom da, Allah yirassil rasuulah le yiʼaddil leyah al‑derib le jaytah. Wa Malaakhi hu aakhir nabi fi kitaab al‑Ahad al‑Gadiim.