Allah hu al‑Rahmaan wa l‑Rahiim wa wassaf rahmatah le kulla l‑naas be jayyit Isa al‑Masiih (salaamahu aleyna).

Wa Allah yihaasib kulla l‑naas wa hu bas al‑yagdar yantiihum al‑naja.

Wa l‑hamdulillah,

Allah rassal Isa al‑Masiih fi l‑dunya achaan yaftah le l‑naas derib al‑khufraan wa l‑naja.

Hu sawwa al‑suluh been al‑muznibiin wa Allah.

Wa be l‑Masiih,

Allah yantiihum haya abadiiye.

Wa fi l‑haya di,

al‑naas yadkhulu fi alaakha jadiide maʼa Allah wa yaʼarfu mahabbitah al‑kabiire.

Wa l‑kitaab da usmah al‑Ahad al‑Jadiid maʼanaatah al‑muʼaahada al‑jadiide.

Wa battaan maʼruuf be Injiil al‑Masiih.

Al‑kilme Injiil jaat min al‑lukhkha al‑yuunaaniiye wa maʼanaatha al‑bichaara yaʼni al‑khabar al‑halu.

Wa l‑khabar al‑halu al‑fi l‑kitaab da bukhuss al‑rahma al‑Allah rassalaaha fi l‑Masiih le kulla l‑naas.

Wa l‑Injiil da hu kalaam Allah.

Fi guluub al‑rusul,

Allah nazzal al‑Ruuh al‑Khudduus achaan yaktubu kalaamah be iznah wa be gudurtah.

Wa l‑kitaab da tarjamooh be kalaam arab daariji achaan al‑naas yafhamooh wa yalgo minnah faayde.

Tarjamooh min al‑lukhkha al‑asliiye wa hi al‑lukhkha al‑yuunaaniiye.

Wa nalgo faayde min kalaam Allah kan nasmaʼooh adiil wa nafhamooh wa nitaabuʼuuh.

Kan ma fihimnaah,

abadan ma nalgo minnah faayde.

Wa kan fihimnaah wa ma tabbagnaah,

al‑kalaam da yachhad foogna fi yoom al‑Hisaab.

Wa Allah yidoor al‑naas yitarjumu kalaamah achaan kulla l‑naas yafhamooh wa yitaabuʼuuh wa yalgo minnah baraka.

Allah hu akbar !

Al‑Ahad al‑Jadiid indah arbaʼa juzu.

Al‑juzu al‑awwal yihajji be taariikh al‑Masiih fi l‑ard wa taʼliimah wa ajaaybah wa mootah fi l‑saliib wa buʼaasah al‑majiid.

Al‑juzu da mukawwan min 4 kutub.

Al‑kitaab al‑awwal da binaaduuh Kitaab Matta min Injiil al‑Masiih.

Wa naas katiiriin yinaaduuh Injiil Matta laakin be l‑sahiih al‑Injiil da ma hana Matta.

Hu hana l‑Masiih wa tilmiizah Matta katab al‑kitaab bas be izin Allah wa be gudrat al‑Ruuh al‑Khudduus.

Wa baʼad al‑kitaab da,

talgo al‑kutub al‑kataboohum Markhus wa Luukha wa Yuuhanna.

Wa l‑juzu al‑taani usmah kitaab Aʼmaal al‑Rusul.

Wa l‑rusul dool,

humman al‑rujaal al‑Isa al‑Masiih jaʼalaahum rusulah wa rassalaahum achaan yiballukhu al‑bichaara le kulla l‑umam.

Wa kitaab Aʼmaal al‑Rusul da yiʼooriina kikkeef humman bado khidmithum wa kikkeef al‑Ruuh al‑Khudduus gaaʼid maʼaahum wa yakhdim beehum.

Wa l‑juzu al‑taalit indah 21 jawaab.

Wa l‑kalaam al‑gaaʼid fi lubbuhum,

hu al‑taʼliim al‑rassalooh rusul al‑Masiih le l‑muʼminiin.

Al‑rusul katabo al‑jawaabaat dool be izin Allah wa be gudrat al‑Ruuh al‑Khudduus.

Wa l‑rusul dool humman Buulus wa Yaakhuub wa Butrus wa Yuuhanna wa Yahuuza.

Wa be rahmat Allah,

ayyi muʼmin yalga faayde kabiire min al‑jawaabaat dool.

Wa l‑juzu al‑raabiʼ wa l‑akhiir hana l‑Ahad al‑Jadiid,

usmah kitaab al‑Ruʼya.

Wa di l‑ruʼya al‑Allah wassafha le l‑rasuul Yuuhanna achaan yaktibha.

Wa kitaab al‑Ruʼya da yihajji katiir be haal al‑muʼminiin wa taʼabhum fi kumaalit al‑dunya.

Wa naas katiiriin yasʼalo wa yuguulu :

« Isa al‑Masiih da,

hu yaatu ?

Hal al‑Injiil al‑Allah antaana yuguul Isa al‑Masiih hu Ibn Allah ?

 » Wa l‑suʼaal da muhimm.

Isa al‑Masiih indah asaame katiiriin wa ayyi usum indah maʼana muhimm le l‑naas wa kulla l‑asaame dool ma induhum eeb.

Wa l‑Injiil yuguul Isa hu Ibn Ibraahiim wa Ibn Dawuud wa Ibn al‑Insaan wa Ibn Allah.

Wa battaan usmah Kalimat Allah wa Hamal Allah wa Raajil al‑Diin al‑Kabiir wa Nuur al‑Aalam wa l‑Munajji wa indah asaame aakhariin kula.

Be kalaam ibraani lukhkhat al‑Yahuud,

usum Isa da Yachuuʼ wa maʼanaatah Allah yinajji.

Wa kan naadum yidoor yafham maʼana al‑asaame dool wa yaʼarif al‑Masiih hu yaatu,

khalli yagri al‑Injiil be galib faatih.

Wa Allah yarhamah wa yiwassifah al‑hagg wa yiwassifah kikkeef yalga al‑baraka al‑Allah yantiiha be l‑Masiih.

Aamiin.

Al‑hamdulillah,

al‑Injiil be l‑lukhkha al‑asliiye mawjuud lahaddi al‑yoom.

Wa be da,

al‑naas yagdaro yagru al‑kalaam al‑asli wa yitarjumuuh be lukhkhaathum.

Wa l‑suura di tiwassif nuskha min kitaab 2 Kuruntus be l‑lukhkha al‑asliiye hana l‑Ahad al‑Jadiid yaʼni be kalaam yuunaani.

Wa l‑nuskha di gadiime,

indaha hawaale 200 sana baʼad waaluudit Isa al‑Masiih.