Kitaab Matta
min Injiil al‑Masiih
Mugaddima
Allah bas al‑aliim wa l‑hakiim wa min gubbaal al‑bidaaya, gaaʼid fi ilmah kadar hu yirassil Isa al‑Masiih wa hu hajja beyah le l‑anbiya.
Zamaan, Allah waaʼad sayyidna Ibraahiim yanti be zurriiytah baraka kabiire al‑tabga le kulla l‑umam. Wa l‑baraka di jaat be Isa al‑Masiih wa achaan da, Isa maʼruuf be Ibn Ibraahiim.
Wa zamaan, Allah waaʼad al‑malik Dawuud wa gaal leyah hu yaʼazil naadum min zurriiytah wa yajʼalah malik kabiir bilheen al‑mulkah abadan ma yikammil. Wa l‑Masiih ja wa hu bas bigi Malik al‑Muluuk wa mulkah abadan ma yikammil. Wa achaan da, hu maʼruuf be Ibn Dawuud.
Wa zamaan, Allah hajja le l‑nabi Danyaal wa gaal hu yiʼassis mamlakatah fi l‑dunya. Wa Allah jaʼal al‑Masiih haakim fi mamlakatah al‑abadiiye di. Wa l‑naas yadkhulu fi l‑mamlaka di be l‑iimaan wa be l‑tooba wa yalgo al‑salaam wa l‑khufraan wa rahmat Allah.
Usum al‑naadum al‑Allah azalah le yaktib al‑kitaab da, hu Matta Laawi wileed Halfa wa hu katabah be gudrat al‑Ruuh al‑Khudduus. Wa gubbaal ma bigi tilmiiz al‑Masiih, hu min naas al‑jamaarik. Wa Matta katab kadar Isa al‑Masiih, hu malik al‑Yahuud al‑gaaʼidiin yarjooh. Al‑kilme « Masiih » maʼanaatah al‑malik al‑aziim al‑masahooh wa darrajooh malik.
Wa l‑kitaab da yabda be asaame juduud al‑Masiih wa yiwassif kikkeef waaluudtah al‑ajiibe bigat. Wa yiʼooriina be kikkeef sayyidna Yahya khattas al‑Masiih wa be kikkeef Ibliis jarrabah. Wa yiʼooriina be taʼliim al‑Masiih wa be gudurtah al‑ajiibe al‑sawwa beeha al‑kheer le kulla l‑naas. Wa yiʼooriina be mootah fi l‑saliib al‑Allah khaddarah leyah wa be buʼaasah al‑majiid.
Khalli ayyi naadum al‑yagri al‑kalaam da yadkhul fi mamlakat Allah wa yalga barakaatha. Aamiin.