Allah yisabbit hukmah fi l‑ard
14
1 Daahu yoom Allah yaji fi Madiinat al‑Khudus.
Yanhabooha wa yilgaasamo al‑khaniime fi lubbaha
2 Ana nilimm kulla l‑umam fi Madiinat al‑Khudus le yihaarubuuha.
Wa yichiilu al‑madiina wa yanhabo al‑buyuut wa yarugdu maʼa l‑awiin be gu.
Wa nuss sukkaan al‑madiina yiwadduuhum fi l‑khurba wa laakin al‑faddalo kamaan yikhalluuhum fi l‑madiina.
3 Wa baʼad da,
Allah yugumm wa yihaarib al‑umam dool misil hu haarab fi ayyaam al‑harib al‑faato.
4 Wa fi l‑yoom da,
Allah yagiif fi jabal al‑Zaytuun sabaah le Madiinat al‑Khudus.
Wa jabal al‑Zaytuun yinchagga min usut min al‑sabaah lahaddi l‑kharib wa yabga waadi kabiir ziyaada.
Wa nuss al‑jabal yikaskis ale l‑munchaakh wa nussah al‑aakhar yikaskis ale l‑wati.
5 Wa khalaas,
intu tiʼarrudu be l‑waadi ambeenaat al‑jibaal dool achaan al‑waadi yiwassil lahaddi Asal.
Wa tiʼarrudu misil arradtu min al‑zilzaal fi ayyaam hukum Uzziiya malik mamlakat Yahuuza.
Wa baʼad da,
Allah Ilaahi yaji maʼa kulla saalihiinah.
6 Wa fi l‑yoom da,
ma fi nuur wa la barid wa la talaj.
7 Wa da yukuun yoom waahid wa Allah bas yaʼarif al‑yoom da.
Wa foogah ma fi nahaar wa la leel.
Fi l‑makhrib kula,
al‑deyy yidawwi.
8 Wa fi l‑yoom da,
almi saafi yajri min Madiinat al‑Khudus.
Nussah yajri ale l‑bahar al‑Mayyit fi l‑sabaah wa nussah yajri ale l‑bahar al‑Abyad fi l‑kharib.
Wa yajri misil da fi wakt al‑khariif wa l‑chite.
9 Wa khalaas,
Allah yiwassif kadar hu malik foog kulla l‑ard.
Wa fi l‑yoom da,
al‑naas yaʼarfu kadar Allah hu waahid wa usmah kula waahid bas.
10 Wa kulla l‑balad tikhayyir wa tabga mustawiye wa khadra min Gabaʼ fi l‑munchaakh lahaddi Rimmuun junuub Madiinat al‑Khudus.
Wa laakin Madiinat al‑Khudus tukuun fi l‑aali fi bakaanha.
Wa huduudha yamchu min baab Banyaamiin lahaddi l‑baab al‑Gadiim wa lahaddi baab al‑Rukun.
Wa yamchu min beet al‑muraakhaba hana Hananiil lahaddi assaaraat al‑inab hana l‑malik.
11 Wa yaskunuuha wa abadan ma yikhassusuuha le l‑damaar battaan.
Wa Madiinat al‑Khudus tagood be amaan.
12 Wa daahu al‑waba al‑Allah yadrub beyah kulla l‑chuʼuub al‑haarabo Madiinat al‑Khudus.
Hu yiʼaffin jisimhum wakit humman waagfiin be tuulhum.
Wa uyuunhum yiʼaffunu fi lubb nugaarhum wa lisneehum yiʼaffunu fi lubb khuchuumhum.
13 Wa fi l‑yoom da,
Allah yibarjil al‑chuʼuub dool marra waahid.
Ayyi waahid yakrub akhuuh wa yiddaawaso ambeenaathum.
14 Wa Bani Yahuuza kula yihaarubu fi Madiinat al‑Khudus.
Wa khalaas,
yilimmu be katara al‑khuna hana kulla l‑umam al‑mujaawiriinhum misil al‑dahab wa l‑fudda wa l‑khulgaan.
15 Wa nafs al‑waba da yadrub hatta l‑kheel wa l‑bikhaal wa l‑jumaal wa l‑hamiir wa kulla l‑bahaayim al‑gaaʼidiin fi muʼaskar al‑adu.
16 Wa khalaas,
kulla l‑naas al‑faddalo hayyiin min al‑umam al‑gammo didd Madiinat al‑Khudus yamchu ayyi sana yasjudu giddaam al‑malik wa hu Allah al‑Gaadir.
Wa yiʼayyudu iid al‑Lagaadiib.
17 Wa laakin gabaayil al‑ard al‑ma yamchu Madiinat al‑Khudus le yasjudu giddaam al‑malik wa hu Allah al‑Gaadir,
al‑matar ma yanzil leehum.
18 Wa kan gabaayil Masir ma yamchu,
khalaas Allah yadrubhum be nafs al‑waba al‑darab beyah al‑umam al‑abo ma yamchu yiʼayyudu iid al‑Lagaadiib.
19 Wa da bas yabga al‑ikhaab le Masir wa le kulla l‑umam al‑abo ma yamchu yiʼayyudu iid al‑Lagaadiib.
20 Wa fi l‑yoom da,
jursaan al‑kheel kula yaktubu fooghum :
« Khaass le Allah.
» Wa hatta al‑buraam al‑fi beet Allah kula yabgo mukhassasiin misil al‑kiisaan al‑yuruchchu beehum damm al‑dahaaya al‑yukhuttuuhum giddaam al‑madbah.
21 Wa ayyi burma fi Madiinat al‑Khudus wa balad Yahuuza tabga mukhassasa le Allah al‑Gaadir.
Wa l‑naas al‑yaju yigaddumu dahaaya,
yagdaro yirakkubu dahaayaahum fi ayyi waahide min al‑buraam dool.
Wa fi l‑yoom da,
battaan ma fi tujjaar fi lubb beet Allah al‑Gaadir.