Ruʼyat arabaat al‑harib
6
1 Wa battaan rafaʼt raasi wa chift ruʼya.
Wa daahu chift arbaʼa arabaat hana harib marago min been jibaal itneen hana nahaas.
2 Al‑araba al‑awwalaaniiye kaarriinha kheel humur wa l‑taaniye kaarriinha kheel zurug.
3 Wa l‑taalta kaarriinha kheel buyud wa l‑raabʼe kaarriinha kheel rugut wa gaadriin.
4 Wa ana saʼalt al‑malak al‑gaaʼid yihajji leyi wa gult :
« Humman dool yimassulu chunu,
ya siidi ? »
5 Wa l‑malak radda leyi wa gaal :
« Humman dool yimassulu riih al‑sama al‑tusuug ale l‑jiihaat al‑arbaʼa,
al‑maarge min hadarat Allah siid kulla l‑ard.
6 Wa arabat al‑kheel al‑zurug tamchi ale balad al‑munchaakh.
Wa l‑kheel al‑buyud yitaabuʼuuhum.
Wa l‑kheel al‑rugut kamaan yamchu ale balad al‑junuub.
7 Wa l‑kheel al‑gaadriin dool marago le yamchu yuruukhu al‑ard.
Wa Allah gaal leehum :
‹ Amchu ruukhu al‑ard.
› Wa humman macho raakho al‑ard. »
8 Wa baʼad da,
Allah naadaani be hiss aali wa gaal :
« Chiif !
Al‑yamchu fi balad al‑munchaakh yihaddu khadabi fi l‑balad di. »
Yisawwu taaj le kabiir rujaal al‑diin
9 Wa Allah hajja leyi wa gaal :
10 « Akhbal al‑hadaaya al‑jaaboohum Haldaay wa Tuubiiya wa Yadaʼya min al‑naas al‑waddoohum fi l‑khurba.
Al‑yoom bas,
inta zaatak amchi fi beet Yuuchiiya wileed Safanya achaan al‑talaata rujaal dool dallo hinaak wakit jo min Baabil.
11 Wa akhbal minhum hadaaya al‑fudda wa l‑dahab wa dugg beehum taaj.
Wa khuttah fi raas kabiir rujaal al‑diin Yachuuʼ wileed Yuusaadikh.
12 « Wa guul le Yachuuʼ :
‹ Daahu Allah al‑Gaadir gaal :
“Daahu al‑raajil al‑binaaduuh Bizre
wa tihit rijileenah yabzur kulla cheyy
wa hu yabni beet Allah battaan.
13 Aywa,
hu bas yabni beet Allah
wa hu bas al‑yalbas khalag al‑muluk
wa yagood fi kursiih wa yahkim.
Wa raajil al‑diin kula
yagood jamb kursiih
wa ambeenaathum humman al‑itneen
fi muwaafaga kaamile.” ›
14 « Wa yukhuttu al‑taaj da fi beeti ana Allah wa yizzakkaro beyah Haldaay wa Tuubiiya wa Yadaʼya wa l‑kheer al‑sawwaah wileed Safanya. »
15 Wa naas baʼiidiin yaju yabnu battaan beet Allah.
Wa be da,
taʼarfu kadar Allah al‑Gaadir bas rassalaani ana Zakariiya leeku.
Wa da yukuun kan intu tasmaʼo adiil kalaam Allah Ilaahku.