2
1 Fi bakaan al‑haraasa,
ana niraakhib,
wa nagiif fi l‑durdur be tuuli.
Wa nichiif chunu al‑yuguulah Allah leyi
wa kikkeef hu yurudd fi chakwiti.
Allah radda le l‑nabi
2 Wa Allah radda leyi wa gaal :
« Aktib al‑ruʼya di
wa waddihha fi liihaanak
achaan yagruuha be suhuula.
3 Achaan al‑ruʼya di,
al‑wakit al‑muhaddad leeha lissaaʼ ma ja.
Wa laakin akiid hi taji fi wakitha !
Abadan ma takdib.
Wa kan akhkharat kula,
arjaaha
achaan akiid hi taji bala taʼkhiir.
4 Al‑fachchaar ma yuguud nafsah adiil
wa laakin be iimaanah,
al‑saalih yahya.
5 Sahiih,
al‑khuna tukhuun
wa l‑raajil al‑mutakabbir ma yagood saakit.
Hu yaftah khachmah misil al‑khabur
wa ma yachbaʼ misil al‑moot.
Wa hu lamma kulla l‑umam aleyah
wa khatta kulla l‑chuʼuub tihtah.
6 Wa kulla l‑naas dool
ma yadurbu beyah masal walla ?
Wa ma yichchammato leyah walla ? »
Al‑azaab le l‑yisawwi al‑fasaala
Wa yuguulu :
« Al‑azaab le l‑yakhni nafsah
be khumaam al‑ma haggah.
Wa da yagood lahaddi mata ?
Wa be da,
hu yiziid al‑duyuun fi raasah.
7 Wa fajʼatan,
al‑naas al‑inta galaʼt maalhum
yugummu min noomhum wa yirajjufuuk
wa inta tabga khaniime fi iideehum.
8 Wa misil inta nahabt umam katiiriin,
al‑chuʼuub al‑faddalo kulluhum yanhabook.
Wa da,
achaan inta katalt dimme
wa jibt al‑unuf fi l‑balad
wa fi l‑hillaal wa kulla sukkaanhum.
9 « Al‑azaab le l‑yaksab maal haraam
wa yijiibah le aayiltah.
Wa yabni beetah misil uchch foog
achaan yinajji nafsah min iid al‑chariir.
10 Inta dammart chuʼuub katiiriin
wa be da,
jibt al‑eeb fi aayiltak
wa jibt al‑zanib le nafsak
11 lahaddi l‑hujaar min daakhil al‑durdur
yasrakho wa yachku
wa l‑maraadiis hana raas al‑beet kula
yuruddu leehum.
12 « Al‑azaab le l‑yabni madiina be katil al‑dimam
wa yiʼassis hille be zulum !
13 Al‑umam yakhdumu ziyaada
le l‑cheyy al‑taakulah al‑naar.
Wa l‑chuʼuub yiʼayyu nufuushum
fi l‑cheyy al‑ma indah faayde.
Wa da ma min Allah al‑Gaadir walla ?
14 Achaan al‑ard tinmali
be maʼrafat majd Allah
misil al‑bahar yinmali be almi.
15 « Al‑azaab le l‑yazgi jaarah charaab mukhalbat be samm
wa yisakkir al‑aakhariin achaan yichiif ireehum.
16 Wa inta tachbaʼ be l‑eeb fi badal al‑charaf
wa khalaas,
tachrab wa tagood aryaan !
Aywa,
tachrab min kaas al‑khadab
al‑fi iid Allah al‑zeene
wa l‑eeb yikhatti charafak.
17 Achaan al‑unuf al‑sawweetah fi Lubnaan
yalhagak.
Wa damaarak le l‑bahaayim
yijiib leek al‑ruʼub.
Achaan inta katalt dimme
wa sawweet al‑unuf fi l‑balad
wa fi l‑hillaal wa kulla sukkaanhum.
18 Al‑sanam al‑yanjurah al‑najjaar
yanfaʼ chunu ?
Wa l‑timsaal hana l‑hadiid al‑masbuub
yiʼallim illa l‑kidib.
Wa maala al‑insaan yiʼaamin be asnaam bukum
al‑hu sawwaahum be iidah ?
19 « Al‑azaab le l‑yuguul le l‑hatab :
‹ Gumm min al‑noom ! ›
Wa le l‑yuguul le l‑hajar al‑abkam :
‹ Gumm wa hajji ! ›
Humman dool ma yiʼallumu cheyy.
Sahiih,
humman mujammaliin
be dahab wa fudda
wa laakin ma induhum ruuh.
20 Wa Allah kamaan gaaʼid
fi beetah al‑mukhaddas.
Khalli kulla sukkaan al‑ard
yaskutu giddaamah. »