Kitaab Safanya
min Kutub al‑Anbiya
Mugaddima
Al‑nabi Safanya hajja be kalaam Allah wa da fi ayyaam hukum Yuuchiiya malik mamlakat Yahuuza. Wa da fi wakit balad Achuur bigat daʼiife wa kammalat wa balad Baabil gammat wa bigat gawiiye. Wa fi l‑wakit da, chaʼab Yahuuza dawwaro al‑fazaʼ min Allah wa laakin Safanya ballakh kadar Allah yugumm wa yihaakim naas Yahuuza wa sukkaan Madiinat al‑Khudus. Wa da fi chaan sajado le ilaah Baʼal wa le khuwwat al‑sama wa le ilaah Muulak wa taabaʼo aadaat al‑naas al‑aakhariin.
Wa l‑nabi Safanya ballakh kadar yoom Allah garrab wa l‑yoom da yabga yoom hana dalaam wa barjaal wa harib. Wa fi l‑yoom da, Allah yidammir al‑chuʼuub al‑mujaawiriin balad Yahuuza wa humman mudun al‑Filistiyiin fi l‑kharib wa balad Muwaab wa Bani Ammuun fi l‑sabaah wa l‑Habacha fi l‑wati wa balad Achuur fi l‑munchaakh. Wa laakin al‑nabi yiʼooriihum kikkeef yisawwu le yinajju nufuushum fi yoom Allah da. Waajib yimaskunu nufuushum wa yutuubu min zunuubhum wa yifattuchu Allah wa yisawwu al‑adaala. Wa be da, Allah yikhayyir haalhum wa humman yaʼabuduuh be galib waahid.
Wa fi l‑akhiir, al‑nabi Safanya ballakh kadar Allah yaskun fi Madiinat al‑Khudus fi usut chaʼabah. Wa be da, humman battaan ma yakhaafo wa yalgo charaf fi ust al‑umam wa yukuunu farhaaniin.