Kitaab Safanya
min Kutub al‑Anbiya
1
1 Wa daahu kalaam Allah al‑gaalah le Safanya wileed Kuuchi wileed Gadaalya wileed Amarya wileed Hizkhiiya.
Wa da fi ayyaam hukum Yuuchiiya wileed Aamuun malik mamlakat Yahuuza.
Allah yiʼaakhib sukkaan al‑ard
2 Daahu kalaam Allah :
« Akiid nuguchch kulla cheyy
min wijh al‑ard.
3 Nuguchch al‑naas wa l‑bahaayim
wa nuguchch tuyuur al‑sama wa huut al‑bahar
wa kulla cheyy al‑yarmi al‑aasiyiin fi isyaanhum.
Wa nikammil al‑naas
min wijh al‑ard. »
Wa da kalaam Allah.
Allah yugumm didd balad Yahuuza
4 « Wa nimidd iidi didd balad Yahuuza
wa didd kulla sukkaan Madiinat al‑Khudus.
Wa nikammil min al‑bakaan da
al‑faddal min al‑naas al‑yaʼabudu ilaah Baʼal
wa khaddaamiinah wa rujaal diinah kula.
5 Wa nuguchch al‑naas al‑yasjudu
fi ruuse buyuuthum le khuwwaat al‑sama.
Wa nuguchch al‑yasjudu leyi ana Allah
wa yahalfu be usmi
wa battaan yahalfu be usum sanam Muulak kula.
6 Wa nuguchch al‑yikhalluuni ana Allah
wa l‑ma yitaabuʼuuni wa la yasʼalo minni. »
7 Askutu giddaam Allah al‑Rabb
achaan yoom Allah garrab.
Allah jahhaz dahiiye
wa khassas maʼzuumiinah.
8 Wa Allah gaal :
« Fi yoom al‑dahiiye di,
ana niʼaakhib al‑kubaaraat
wa iyaal al‑malik
wa kulla l‑naas al‑yalbaso khulgaan al‑ajaanib
le yitaabuʼu aadaathum.
9 Wa fi l‑yoom da,
ana niʼaakhib ayyi waahid
al‑yunutt atabat al‑baab
hana beet ilaahah le yicharrifah.
Wa humman al‑naas al‑yamlo beet ilaahhum
be l‑unuf wa l‑khachch.
10 Wa fi l‑yoom da,
fi Madiinat al‑Khudus,
yinsamiʼ baki jamb baab al‑Huut
wa siraakh fi l‑haara al‑jadiide
wa harakat damaar kabiir fi l‑jibaal.
Wa da kalaam Allah.
11 Abku be hizin,
ya sukkaan haarat al‑suug,
achaan kulla l‑tujjaar yiddammaro
wa kulla l‑yawzunu al‑fudda yikammulu.
12 Wa fi l‑wakit da,
ana nifattich fi lubb Madiinat al‑Khudus be faanuus.
Wa niʼaakhib kulla l‑rujaal al‑gaaʼidiin fi zunuubhum
misil al‑khamar al‑gaaʼid fi rindiih.
Humman yuguulu fi guluubhum :
‹ Allah ma yisawwi cheyy
wa la kheer wa la charr. ›
13 Wa khalaas,
khunaahum yabga khaniime
wa buyuuthum yabgo kharaab.
Humman yabnu buyuut
wa laakin ma yaskunu fooghum.
Wa yimaggunu jineenaat inab
wa laakin ma yacharbo min khamarhum. »
Yoom Allah garrab
14 Al‑yoom al‑kabiir hana Allah garrab.
Hu garrab wa jaayi be surʼa.
Wakit harakat yoom Allah tinsamiʼ,
al‑furraas kula yasrakho be chidde.
15 Wa l‑yoom da,
yoom hana khadab
wa yoom hana diige wa taʼab.
Hu yoom hana kharaab wa damaar
wa yoom hana dalaam azrag kurum
wa yoom hana sahaab adlam marra waahid.
16 Wa da yoom darabaan al‑buug
wa korooraak al‑harib
didd al‑mudun al‑gawiyiin
wa bakaanaathum hana l‑muraakhaba.
17 « Wa ana nidiss al‑naas fi l‑diige
wa humman yuruukhu misil amyaaniin
achaan humman aznabo diddi ana Allah.
Wa dammuhum yidaffig
misil almi fi l‑turaab
wa janaazaathum yichchattato
misil al‑baʼar. »
18 Wa la fuddithum wa la dahabhum
yagdaro yinajjiihum
min yoom khadab Allah.
Wa be naar khiirtah,
kulla l‑ard tahrag.
Aywa,
al‑damaar da yabga chadiid
lahaddi yikammil kulla sukkaan al‑ard.