Kitaab Habaguug
min Kutub al‑Anbiya
1
1 Daahu kalaam al‑muhaakama al‑ja le l‑nabi Habaguug fi ruʼya.
Al‑nabi dawwar al‑fazaʼ min Allah
2 Ya Allah,
ana koorakt leek
wa mata inta tasmaʼni ?
Wa ana sarakht leek min al‑unuf
wa mata inta tinajjiini ?
3 Maala tiwassifni al‑fasaala
wa l‑taʼab ?
Wa hal tichiif al‑kharaab wa l‑unuf
al‑gaaʼidiin daayman giddaami ?
Wa l‑machaakil wa l‑huraaj kula zaado.
4 Wa achaan da,
ma tabbago churuut al‑Tawraat
wa l‑adaala abadan ma tinchaaf.
Wa l‑aasi gidir fi l‑saalih
wa achaan da bas,
al‑chariiʼa bigat ooja.
Askar Baabil yugummu didd al‑chaʼab
5 « Ya chaʼabi,
chiifu been al‑umam
wa alʼajjabo wa akhaafo.
Achaan fi wakitku da,
ana nisawwi foogku cheyy
wa kan hajjooku beyah,
ma tisadduguuh.
6 Daahu ana nigawwim askar Baabil*
wa humman naas galibhum murr
wa ma induhum sabur.
Yamchu fi kulla bakaan fi l‑ard
wa yaglaʼo buyuut al‑ma hineehum.
7 Humman naas chudaad wa bikhawwufu.
Yukhuttu chariiʼithum
wa yikabburu nufuushum.
8 Kheelhum ajiiliin misil al‑numuura
wa sariiʼiin misil maraafʼiin al‑makhrib.
Wa siyaad al‑kheel dool
jaayiin min baʼiid.
Yitiiru misil al‑sagur
al‑yidoor yadrub seedtah.
9 Kulla l‑chaʼab maattiin rigaabhum giddaam
wa jaariyiin le l‑unuf.
Wa yakurbu naas abiid
wa yilimmuuhum katiiriin misil al‑ramla.
10 Wa yahguru al‑muluuk
wa yichchammato le l‑hukkaam.
Wa yadhako le l‑mudun al‑gawiyiin
wa yihawwuguuhum be radmiiye
wa yichiiluuhum.
11 Wa yaju wa yufuutu
misil al‑riih.
Fi khataahum,
yichiifu khuwwithum
misil ilaahhum. »
Al‑nabi battaan naada Allah
12 Wa min zamaan,
inta bas ma Allah Ilaahi al‑Khudduus ?
Achaan da,
aniina ma numuutu.
Ya Allah,
inta kallaft al‑askar dool
le yihaakumuuna.
Ya jabalna al‑yahmiina,
inta bas jibtuhum le yiʼaakhubuuna.
13 Wa laakin inta khudduus !
Ma tagdar tichiif al‑charr
wa la tahmal tichiif al‑taʼab yaji fi chaʼabak.
Wa maala inta tichiif
al‑khaayniin dool ?
Wa maala taskut
wakit al‑chariir yazrut al‑saalih
al‑hu akheer minnah ?
14 Inta sawweet Bani Adam
misil huut al‑bahar
wa misil al‑zawaahif al‑ma induhum siid.
15 Wa l‑adu yarmiihum fi charakah
wa yamrughum kulluhum be l‑jambaat
wa yilimmuhum fi chabakatah.
Wa khalaas,
yafrah
wa yinbasit.
16 Wa fi chaan da,
hu dabah dahiiye le charakah
wa harrag bakhuur le chabakatah.
Achaan beehum bas,
hu kabbar gismah
wa kattar maʼaachah.
17 Wa be da,
yamrug seefah min beetah
wa yaktul al‑umam bala mahanna ila l‑abad.