Yoom Allah garrab
2
1 Adurbu al‑buug fi Sahyuun
wa iitu fi jabal Allah al‑mukhaddas.
Wa khalli kulla sukkaan al‑balad yarjufu
achaan yoom Allah jaayi wa garrab.
2 Da yoom hana dalaam azrag kurum
wa yoom hana sahaab adlam marra waahid.
Daahu deech kabiir wa gawi jaayi,
misil nuur al‑sabaah al‑talaʼ fi l‑jibaal.
Abadan ma chaafo misilhum
fi l‑zurriiye al‑faatat wa la fi l‑zurriiye al‑taji.
3 Giddaamhum,
naar taakul
wa waraahum,
hariige tahrig.
Al‑balad giddaamhum
misil jineenit Adin
wa laakin waraahum,
kadaade kharaab
wa cheyy yanja minhum ke ma fiih.
4 Wa humman bichaabuhu al‑kheel
wa jarraayiin misil naas al‑yigallubu.
5 Wa harakathum misil harakat arabaat al‑harib
al‑yinattutu fi ruuse al‑jibaal.
Wa misil harakat lahiib al‑naar
al‑tahrig al‑gechch,
wa misil askar chudaad
rasso le l‑harib.
6 Giddaamhum,
al‑chaʼab yarjufu
wa kulla wujuuhhum yabgo dulum min al‑khoof.
7 Askarhum yajru misil al‑furraas
wa yatlaʼo al‑daraadir misil muhaaribiin.
Ayyi waahid chaayil derbah
wa abadan ma yikiss min tariigah.
8 Wa ma fi waahid yatruch akhuuh,
ayyi waahid maachi adiil fi derbah.
Wa hatta kan yizarruguuhum be nachaachiib kula,
ma yichattutu.
9 Yanzulu fi l‑madiina
wa yatlaʼo fi l‑daraadir.
Yadkhulu al‑buyuut
wa yadkhulu be l‑chabaabiik misil saraariig.
10 Giddaamhum,
al‑ard tinhazza
wa l‑sama tarjif.
Al‑harraay wa l‑gamar yidallumu
wa l‑nujuum yiwadduru nuurhum.
11 Allah yarfaʼ hissah giddaam deechah
wa askarah kubaar wa chudaad yitabbugu kalaamah.
Yoom Allah aziim
wa mukhiif marra waahid.
Yaatu yagdar yahmalah ?
Taʼaalu tuubu giddaam al‑Rabb
12 « Wa hassaʼ,
gabbulu leyi
be kulla guluubku,
be baki wa siyaam wa nuwaah. »
Wa da kalaam Allah.
13 Ma ticharrutu khulgaanku bas
wa laakin tuubu min daakhal galibku
wa gabbulu le Allah Ilaahku.
Achaan hu al‑Rahmaan al‑Rahiim
wa l‑Sabuur wa l‑Muhibb
wa yikhalli al‑khadab
al‑awwal hu kharrar yinazzilah foogku.
14 Akuun yikhalli khadabah
wa yibaarikku battaan.
Wa battaan intu tigaddumu le Allah Ilaahku
hadaaya hana dagiig
wa hadaaya hana charaab.
15 Adurbu al‑buug fi Sahyuun
wa khassusu yoom hana siyaam
wa kharruru malamma khaassa.
16 Limmu al‑chaʼab
wa khassusu malamma.
Ajmaʼo al‑chiyyaab
wa limmu al‑iyaal
hatta al‑atfaal al‑bardaʼo.
Wa khalli al‑ariis yamrug min beetah
wa l‑aruus min khurfitha.
17 Wa khalli rujaal al‑diin yabku
been khurfit al‑madkhal wa l‑madbah.
Aywa,
khaddaamiin Allah yuguulu :
« Ya Allah,
hinn fi chaʼabak !
Humman al‑misil warasatak,
ma tiʼayyibhum
wa la tikhalli al‑umam yichchammato fooghum.
Maala fi ust al‑chuʼuub al‑aakhariin yuguulu :
‹ Ween Ilaahhum ?
› »
Allah yurudd le chaʼabah
18 Allah yihibb baladah ziyaada
wa yihinn fi chaʼabah.
19 Wa Allah yurudd le chaʼabah wa yuguul :
« Daahu ana nirassil leeku gameh
wa khamar wa dihin.
Intu tachbaʼo minhum
wa battaan ma niʼayyibku giddaam al‑umam.
20 Al‑udwaan al‑yaju min al‑munchaakh,
nibaʼʼidhum minku
wa niwaddiihum fi ard jafaaf
wa kharaab.
Awwalhum narmiih fi l‑bahar al‑Mayyit fi l‑sabaah
wa aakhirhum fi l‑bahar al‑Abyad fi l‑kharib.
Afanat janaazaathum tinchamma
wa l‑hawa yiʼaffin
achaan ana Allah sawweet achya kubaar. »
21 Ya l‑ard,
ma takhaafe,
afrahe wa anbasti.
Achaan Allah yisawwi achya kubaar.
22 Ya haywaanaat al‑kadaade,
ma takhaafo
achaan gechch al‑kadaade yikhaddir.
Al‑chadar yisawwu iyaal
wa l‑inab wa l‑tiin yantu intaajhum.
23 Ya naas Sahyuun,
afraho wa anbastu be Allah Ilaahku.
Achaan yinazzil matar awwal al‑khariif al‑waajib leeku
wa yinazzil leeku matar al‑richaach
wa matar al‑khariif misil zamaan.
24 Al‑madagg yinmali be gameh
wa l‑assaara tinmali be khamar jadiid wa dihin.
25 « Ana Allah nikaffiiku intaaj al‑siniin al‑faato
wakit rassalt leeku deech kabiir hana hacharaat.
Wa humman ambukbuk wa l‑jaraad
wa amkachool wa saar al‑leel.
26 Wa intu taakulu wa tachbaʼo
wa tahmudu usmi ana Allah Ilaahku.
Ana sawweet leeku ajaayib
wa chaʼabi abadan ma yalgo eeb.
27 Wa taʼarfu kadar ana gaaʼid fi usutku,
ya Bani Israaʼiil.
Wa ana bas Allah Ilaahku,
ma fi Ilaah balaayi.
Wa chaʼabi abadan ma yalgo eeb. »
Allah yinazzil ruuhah fi kulla l‑naas
28 *« Wa baʼad da,
ana ninazzil Ruuhi
fi kulla l‑naas.
Awlaadku wa banaatku yitnabbaʼo
wa chiyyaabku yahlamo be hilim
wa subyaanku yichiifu ruʼya.
29 Wa fi l‑zaman da,
al‑abiid wa l‑khadiim kula
ninazzil Ruuhi fooghum.
30 Wa nisawwi ajaayib fi l‑sama wa fi l‑ard
wa l‑naas yichiifu damm wa naar wa dukhkhaan azrag.
31 Wa l‑harraay tabga zarga
wa l‑gamar yabga ahmar misil al‑damm.
Wa da gubbaal yoom Allah ma yaji
wa hu yoom aziim wa mukhiif.
32 Wa ayyi naadum al‑yadʼi be usum Allah yanja
achaan fi jabal Sahyuun wa fi Madiinat al‑Khudus,
yifaddulu naas misil Allah gaalah.
Wa l‑yinaadiihum Allah,
yukuunu been al‑naas al‑yanjo. »