Kitaab Amuus
min Kutub al‑Anbiya
Mugaddima
Al‑kitaab da yihajji be l‑nabi Amuus al‑hu raaʼi wa harraati wa sakan fi mamlakat Yahuuza fi l‑wati. Wa baʼad Allah hajja leyah be ruʼya, hu gamma macha fi mamlakat Israaʼiil fi l‑munchaakh le yiballikh kalaam Allah. Wa fi l‑wakit daak, mamlakat Israaʼiil gaaʼide fi raaha wa amaan wa bigat khaniiye marra waahid. Wa kubaaraatha gaaʼidiin yazulmu al‑masaakin. Wa l‑hagg wa l‑adaala kula bigo ma fiihum. Wa Amuus gamma yiballikh be l‑ikhaab al‑yaji fi mamlakat Israaʼiil wa aasimatha madiinat al‑Saamira. Wa l‑kalaam da bigi tagiil le kubaaraat al‑balad wa dawwaro yaturduuh.
Fi awwal gisim hana l‑kitaab da, Allah kharrar didd khamsa buldaan al‑mujaawiriin le balad Israaʼiil. Wa baʼad da, Allah kharrar didd chaʼabah wa humman naas Bani Yahuuza wa naas Bani Israaʼiil. Wa hu gaal yihaakimhum fi chaan fiʼilhum al‑cheen misil ibaadat al‑asnaam wa l‑zulum. Allah ma yakhbal be amal misil da wa laakin hu yidoor al‑hagg yisiil misil al‑seel wa l‑adaala tajri misil al‑waadi al‑ma yagiif.
Al‑gisim al‑taani hana l‑kitaab da yihajji be khamsa ruʼya al‑Amuus chaafaahum wa ballakh beehum. Wa l‑ruʼya dool bukhussu jaraad wa naar wa habil al‑yigaawusu beyah wa guffa al‑indah fawaakih wa damaar beet al‑mukhaddas. Wa be l‑ruʼya dool, Allah khabbar al‑nabi be l‑ikhaab al‑hu yidoor yinazzilah fi l‑chaʼab.
Wa fi aakhir al‑kitaab, Allah anta acham le chaʼabah kadar baʼadeen, yijaddid buna madiinat Dawuud wa yigabbil chaʼabah min al‑khurba wa yisabbithum fi l‑balad wa yaakulu min intaaj arduhum.