Allah yihaakim al‑umam
3
1 *« Aywa,
akiid fi ayyaam al‑wakit da,
ana nigabbil naas balad Yahuuza
wa Madiinat al‑Khudus min al‑khurba.
2 Wa nilimm kulla l‑umam
wa niwaddiihum fi l‑waadi al‑usmah Yahuuchafat
(maʼanaatah Allah yihaakim).
Wa fi l‑bakaan da,
nihaakimhum
fi chaan kulla cheyy al‑sawwooh
le Bani Israaʼiil,
chaʼabi al‑misil warasati.
Achaan chattatoohum fi lubb al‑umam
wa algaasamo baladi ambeenaathum.
3 Humman algaasamo chaʼabi
be amʼiyeedaat
wa baaʼo al‑awlaad
le yikaffu al‑azabaat
wa baaʼo al‑banaat
le yacharbo khamar.
4 « Wa intu kula,
ya Suur wa Seeda
wa kulla mudiiriiyaat al‑Filistiyiin.
Tidooru minni chunu ?
Tidooru tilkaffo foogi al‑taar walla ?
Kan tilkaffo foogi al‑taar,
nugumm be surʼa didduku
wa nigabbil taarku fi raasku.
5 Intu chiltu fudditi wa dahabi
wa kanzi al‑khaali dammeetuuh fi gusuurku.
6 Wa intu biʼtu naas Yahuuza
wa Madiinat al‑Khudus le l‑Yuunaaniyiin
achaan tibaʼʼuduuhum min baladhum.
7 Wa laakin daahu ana ninaadiihum
min al‑bakaan al‑biʼtuuhum foogah
wa ana nigabbil taarku fi raasku.
8 Wa ana nibiiʼ awlaadku wa banaatku
le Bani Yahuuza
wa humman yibiiʼuuhum
le naas balad Saba
al‑humman umma baʼiide. »
Aywa,
da kalaam Allah al‑hu gaalah.
Allah yihaakim al‑umam
9 Ballukhu le l‑umam wa guulu :
« Khassusu deech le l‑harib
wa gawwumu al‑furraas.
Khalli kulla l‑rujaal al‑muhaaribiin
yindammo wa yamchu.
10 Wa jaraariiku dugguuhum suyuuf
wa khanaajirku dugguuhum huraab.
Wa l‑daʼiif,
khalli yuguul :
‹ Ana bigiit faaris ! ›
11 Taʼaalu ajala,
ya kulla l‑umam al‑mujaawiriin.
Limmu hini. »
Ya Allah !
Inta kula naadi furraasak !
12 Wa Allah gaal :
« Khalli al‑umam yugummu
wa yamchu ale waadi Yahuuchafat.
Achaan hinaak ana nihaakim
kulla l‑umam al‑mujaawiriin.
13 Middu khanaajirku wa agtaʼoohum
misil al‑harraati yagtaʼ intaajah fi wakt al‑gatiʼ.
Fajjukhuuhum misil naas al‑yifajjukhu al‑inab
wakit al‑assaara anmalat.
Aywa,
fasaalithum katiire
misil mawaaʼiin malaaniin be asiir al‑inab. »
14 Daahu aalaaf al‑naas,
katiiriin marra waahid fi waadi al‑kharaar.
Yoom Allah garrab
fi waadi al‑kharaar.
15 Al‑harraay wa l‑gamar yidallumu
wa l‑nujuum yiwadduru nuurhum.
16 Min Sahyuun,
Allah yahrij
wa min Madiinat al‑Khudus hissah yinsamiʼ
wa l‑sama wa l‑ard yarjufu.
Wa laakin Allah hu maljaʼ le chaʼabah
wa maskan gawi le Bani Israaʼiil.
17 « Wa be da,
intu taʼarfu kadar ana bas Allah Ilaahku
al‑gaaʼid fi Sahyuun jabali al‑mukhaddas.
Madiinat al‑Khudus tabga bakaan mukhaddas
wa battaan ajaanib ma yadkhulu foogha. »
Al‑raaha al‑daayme taji le Bani Israaʼiil
18 « Fi l‑yoom da,
asiir al‑inab yinaggit min al‑jibaal
wa laban yisiil min al‑hujaar
wa almi yajri fi kulla wudyaan Yahuuza.
Wa een almi tisiil min beet Allah
wa tusubb fi waadi Chittiim.
19 Wa Masir tabga kharaab
wa Adoom tabga sahara kharaab
be sabab al‑unuf al‑sawwooh le Bani Yahuuza
wakit daffago damm al‑bari fi arduhum.
20 Wa laakin Yahuuza yaskunuuha ila l‑abad
wa Madiinat al‑Khudus yaskunuuha min zurriiye le zurriiye.
21 Aywa,
ana najʼalhum bariyiin
misil awwal jaʼaltuhum ma bariyiin.
Wa ana Allah naskun fi Sahyuun ! »