Kitaab Huuchaʼ
min Kutub al‑Anbiya
Mugaddima
Allah sawwa Huuchaʼ nabi fi mamlakat Israaʼiil fi l‑munchaakh wa da baʼad al‑nabi Amuus. Wa Huuchaʼ gaaʼid yihajji be kalaam Allah hawaale 25 sana. Wa da gubbaal naas balad Achuur ma yichiilu mamlakat Israaʼiil. Wa gubbaal damaar mamlakat Israaʼiil, al‑hukum barjal wa muluuk katiiriin hakamo al‑waahid baʼad al‑aakhar wa jaabo al‑zulum fi l‑mujtamaʼ.
Wa iimaan chaʼab Allah kula barjal lahaddi waahidiin minhum abo Allah wa abado ilaahaat aakhariin. Wa fi chaan da, al‑nabi Huuchaʼ gaal humman gaaʼidiin yichcharmato maʼa l‑ilaahaat. Wa hasab amur Allah, Huuchaʼ akhad mara charmuuta. Wa baʼad hi achcharmatat, hu gabbalha fi beetah. Wa da yimassil mahabbat Allah le chaʼabah. Kan humman achcharmato maʼa ilaahaat aakhariin kula, wakit yigabbulu leyah, hu yakhbalhum wa yihibbuhum battaan.
Fi l‑kitaab da, Huuchaʼ kallam katiir fi gabiilat Afraayim. Fi mamlakat Israaʼiil, Afraayim hi bas al‑gabiila al‑kabiire wa bakaan waahid al‑usum Afraayim yimassil kulla mamlakat Israaʼiil.