Kitaab Danyaal
min Kutub al‑Anbiya
Mugaddima
Kitaab Danyaal hu waahid min kutub al‑Anbiya wa maktuub be l‑lukhkha al‑ibraaniiye wa l‑araamiiye. Al‑kitaab da yikallim be Nabuukhadnasar malik Baabil wakit haasar Madiinat al‑Khudus aasimat mamlakat Yahuuza. Wa hu karab malikha wa chaal waahidiin min al‑subyaan wa waddaahum fi l‑khurba fi Baabil. Wa been al‑subyaan dool, fiyah Danyaal wa rufgaanah al‑talaata. Wa humman yaʼabudu Allah wa fi chaan da, abo ma yinajjusu nufuushum be akil al‑malik achaan malik Baabil ma yaʼarif Allah. Wa Danyaal wa rufgaanah karabo iimaanhum gawi wakit ramoohum fi l‑naar wa fi nugrat al‑diidaan kula. Wa fi chaan iimaanhum al‑gawi da, Allah najjaahum be ajaayib.
Wa fi l‑kitaab da, Allah arrafah le Danyaal be l‑cheyy al‑yukuun fi l‑mustakhbal. Wa hajja leyah be ruʼya al‑maʼanaatha gaasi bilheen achaan fi l‑ruʼya di, hu chaaf haywaanaat al‑induhum ruuse wa guruun katiiriin. Wa fi l‑ruʼya di, Allah khabbarah be harib wa waba al‑abadan ke ma bilwassaf. Wa hajja leyah be muluuk misil muluuk al‑Maadiyiin wa l‑Faarisiyiin wa muluk Masir wa Suuriya al‑yaju wa yitaʼʼubu chaʼab Allah al‑Aali. Wa sahiih chaʼab Allah yalgo taʼab fi l‑dunya di wa laakin taʼabhum da le wakit muhaddad bas wa fi l‑akhiir, yalgo al‑naja. Wa Allah hu siid al‑gudra, yirakkib muluuk wa yidalli muluuk. Wa l‑mustakhbal kula fi iidah hu wa abadan ma yikhalli naasah.