Gisim hana gabaayil al‑munchaakh
48
1 « Daahu asaame al‑gabaayil wa gisimhum.
Gisim le gabiilat Daan yamchi min aakhir al‑munchaakh fi l‑derib hana Hatluun lahaddi Labu Hamaat wa Hasar Eenaan wa yamchi fi ard Dimachkh fi l‑munchaakh jamb Hamaat.
Gisim Daan yamchi min al‑sabaah le l‑kharib.
2 Wa wati min huduud Daan min al‑sabaah le l‑kharib,
da gisim le gabiilat Achiir.
3 Wa wati min huduud Achiir min al‑sabaah le l‑kharib,
da gisim le gabiilat Naftaali.
4 Wa wati min huduud Naftaali min al‑sabaah le l‑kharib,
da gisim le gabiilat Manassa.
5 Wa wati min huduud Manassa min al‑sabaah le l‑kharib,
da gisim gabiilat Afraayim.
6 Wa wati min huduud Afraayim min al‑sabaah le l‑kharib,
da gisim le gabiilat Raʼuubiin.
7 Wa wati min huduud Raʼuubiin min al‑sabaah le l‑kharib,
da gisim le gabiilat Yahuuza.
Gisim al‑antooh hadiiye le Allah
8 « Wa wati min huduud Yahuuza min al‑sabaah le l‑kharib,
da gisim al‑tantuuh hadiiye leyi ana Allah.
Urdah 25 000 duraaʼ wa tuulah misil tuul gisim al‑gabaayil min al‑sabaah le l‑kharib.
Wa l‑beet al‑mukhaddas yukuun fi ust al‑ard di.
9 Wa l‑gisim al‑tantuuh hadiiye leyi ana Allah,
tuulah 25 000 duraaʼ wa urdah 10 000 duraaʼ.
10 Wa da yabga gisim mukhassas le rujaal al‑diin.
Fi l‑munchaakh,
tuulah 25 000 duraaʼ wa fi l‑kharib,
urdah 10 000 duraaʼ wa fi l‑sabaah,
urdah 10 000 duraaʼ wa fi l‑wati,
tuulah 25 000 duraaʼ.
Wa l‑beet al‑mukhaddas hanaayi ana Allah yukuun ust al‑ard di.
11 Wa da yabga le rujaal al‑diin al‑mukhassasiin al‑min zurriiyit Saduukh al‑awwal sawwo khidimti wa ma baʼʼado minni misil Bani Israaʼiil wa l‑Laawiyiin.
12 Wa gisimhum yukuun hadiiye al‑yantuuha leehum min al‑balad.
Wa arduhum di mukhaddasa marra waahid wa tabga huduud maʼa gisim al‑Laawiyiin.
13 Wa kan le l‑Laawiyiin kamaan,
gisimhum yabga huduud maʼa ard rujaal al‑diin.
Wa gisim rujaal al‑diin wa gisim al‑Laawiyiin kula tuulhum 25 000 duraaʼ wa urduhum 10 000 duraaʼ.
14 Wa l‑ard di ma yibiiʼuuha wa la yibadduluuha wa la yantu awwal intaajha achaan al‑ard di hinti ana Allah wa hi mukhaddasa.
Gisim al‑malik
15 « Wa l‑ard al‑tifaddil min al‑gisim da tabga bakaan ma mukhaddas wa yabnu foogha madiina be buyuutha wa bakaanaatha hana l‑sarha.
Wa l‑ard di,
urdaha 5 000 duraaʼ wa tuulha 25 000 duraaʼ wa l‑madiina tukuun fi usutha.
16 Wa daahu magaas al‑madiina di.
Hi murabbaʼa wa tuulha fi ayyi jiihe 4 500 duraaʼ.
17 Wa bakaan al‑sarha hana l‑madiina gaaʼid fi ayyi jiihe.
Fi kulli jiihe min al‑jiihaat al‑arbaʼa,
indah 250 duraaʼ.
18 Wa l‑ard al‑tifaddil jaay wa jaay min al‑madiina tabga bakaan ziraaʼa al‑yiʼiichu beyah khaddaamiin al‑madiina.
Wa fi l‑kharib,
tuulha 10 000 duraaʼ wa fi l‑sabaah kula tuulha 10 000 duraaʼ wa hi tabga huduud maʼa l‑ard al‑mukhaddasa.
19 Wa khaddaamiin al‑madiina al‑yahartu al‑bakaan da yaju min kulla gabaayil Bani Israaʼiil.
20 Wa kulla l‑gisim al‑yantuuh hadiiye leyi ana Allah da murabbaʼ,
tuulah wa urdah kula 25 000 duraaʼ.
Wa yantu rubuʼ hana l‑gisim al‑mukhaddas da le l‑madiina.
21 « Wa l‑ard al‑tifaddil jaay wa jaay le l‑gisim al‑mukhaddas al‑yantuuh hadiiye leyi ana Allah wa le gisim al‑madiina tukuun le l‑malik.
Wa tuul ard al‑malik,
hu 25 000 duraaʼ jamb huduud al‑ard al‑mukhaddasa wa gisim al‑madiina.
Wa nuss ardah fi l‑kharib wa nuss ardah fi l‑sabaah.
Wa l‑gisim al‑mukhaddas al‑yantuuh hadiiye leyi ana Allah wa l‑beet al‑mukhaddas gaaʼidiin usut al‑gisim al‑itneen hana l‑malik.
22 Wa gisim al‑Laawiyiin wa gisim al‑madiina kula gaaʼidiin usut ambeen al‑gisim al‑itneen hana l‑malik.
Wa gisim al‑malik yukuun ambeen gisim Yahuuza fi l‑munchaakh wa gisim Banyaamiin fi l‑wati.
Gisim hana gabaayil al‑wati
23 « Wa daahu gisim hana l‑gabaayil al‑faddalo.
Min al‑sabaah le l‑kharib,
da gisim gabiilat Banyaamiin.
24 Wa wati min huduud Banyaamiin min al‑sabaah le l‑kharib,
da gisim le gabiilat Chimʼuun.
25 Wa wati min huduud Chimʼuun min al‑sabaah le l‑kharib,
da gisim le gabiilat Yassaakar.
26 Wa wati min huduud Yassaakar min al‑sabaah le l‑kharib,
da gisim le gabiilat Zabuluun.
27 Wa wati min huduud Zabuluun min al‑sabaah le l‑kharib,
da gisim le gabiilat Gaad.
28 Wa huduud Gaad yamchu fi saharat Nagab min Taamaar lahaddi almi Mariiba hana Khaadich wa lahaddi waadi Masir wa lahaddi l‑bahar al‑Abyad.
29 Wa di l‑balad wa da l‑gisim al‑tigassumuuh warasa be amʼiyeedaat le gabaayil Bani Israaʼiil.
» Wa da kalaam Allah al‑Rabb.
Al‑biibaan al‑atnaachar hana l‑madiina
30 « Wa daahu biibaan al‑madiina.
Fi l‑munchaakh,
tuul durdur al‑madiina 4 500 duraaʼ.
31 Wa biibaan al‑madiina yisammuuhum be asaame gabaayil Bani Israaʼiil.
Fi l‑munchaakh,
al‑durdur indah talaata biibaan wa humman baab Raʼuubiin wa baab Yahuuza wa baab Laawi.
32 Wa fi l‑sabaah,
tuul al‑durdur 4 500 duraaʼ wa indah talaata biibaan wa humman baab Yuusuf wa baab Banyaamiin wa baab Daan.
33 Wa fi l‑wati,
tuul al‑durdur 4 500 duraaʼ wa indah talaata biibaan wa humman baab Chimʼuun wa baab Yassaakar wa baab Zabuluun.
34 Wa fi l‑kharib,
tuul al‑durdur 4 500 duraaʼ wa indah talaata biibaan wa humman baab Gaad wa baab Achiir wa baab Naftaali.
35 Wa tuul daayir al‑durdur da 18 000 duraaʼ.
Wa min al‑yoom,
al‑madiina di yisammuuha Allah Gaaʼid Hini. »