Een almi al‑jaari min beet Allah
47
1 Wa l‑raajil waddaani ale madkhal al‑beet al‑mukhaddas.
Wa daahu almi maarig min tihit al‑beet min nussah al‑sabhaani achaan al‑beet muwajjih sabaah.
Wa l‑almi saal ale l‑wati wa jara wati al‑madbah.
2 Wa l‑raajil maragaani be beet al‑madkhal al‑munchaakhi wa hawwagaani fi l‑fadaay al‑barraaniiye lahaddi beet al‑madkhal al‑sabhaani.
Wa daahu almi jaari wati al‑baab da.
3 Wa l‑raajil marag ale l‑sabaah wa l‑habil al‑yigaawusu beyah fi iidah.
Wa min al‑baab,
hu kaal 1 000 duraaʼ barra.
Wa hinaak,
gattaʼaani al‑almi wa l‑almi lihig siigaani.
4 Wa battaan kaal 1 000 duraaʼ wa gattaʼaani al‑almi wa l‑almi lihig rikabbi.
Wa battaan kaal 1 000 duraaʼ wa gattaʼaani al‑almi wa l‑almi lihig sulbi.
5 Wa battaan kaal 1 000 duraaʼ wa l‑almi bigi waadi al‑ma nagdar nagtaʼah achaan al‑almi khariig wa illa naadum yuʼuum.
Wa da waadi al‑abadan naadum ma yagdar yagtaʼah.
6 Wa hu gaal leyi :
« Ya ibn Adam,
inta gaaʼid tichiif walla ?
» Wa hu waddaani wa gabbalaani fi khachum al‑waadi.
7 Wa wakit gabbalaani,
daahu ana chift chadar katiir fi khachum al‑waadi jaay wa jaay.
8 Wa hu gaal leyi :
« Al‑almi da yamchi ale balad al‑sabaah wa yamchi le waadi al‑Urdun wa yadkhul fi l‑bahar al‑Mayyit.
Wa wakit almi min al‑een di yadkhul fi l‑bahar al‑Mayyit,
kulla almi al‑bahar da yabga halu.
9 Wa fi ayyi bakaan al‑yadkhul foogah al‑almi da,
al‑makhluugiin al‑hayyiin yabgo katiiriin wa yiʼiichu.
Wa l‑huut yabga katiir ziyaada achaan almi al‑een di yaji wa yisawwi almi al‑bahar da halu.
Wa l‑haya tukuun fi ayyi bakaan al‑yadkhul foogah al‑almi da.
10 Wa khalaas,
al‑hawwaatiin yagoodu fi khachum al‑almi wa min Een Jidi lahaddi Een Aglaayim yabga bakaan al‑yuchurru foogah al‑churukka.
Wa nafar al‑huut fi l‑bahar al‑Mayyit yabga katiir min nafar al‑huut fi l‑bahar al‑Abyad.
11 Wa laakin almi ruhuudah wa birakkah ma yabga halu wa laakin yagood achaan yalgo minnah mileh.
12 Wa fi khachum al‑waadi jaay wa jaay,
yugumm nafar katiir hana chadar al‑induhum iyaal.
Warchaalhum abadan ma yaybas wa iyaalhum ma yikammulu.
Wa humman yaldo fi ayyi chahar achaan al‑almi da maarig min al‑beet al‑mukhaddas.
Wa iyaalhum,
yaakuluuhum wa warchaalhum yanti al‑aafe. »
Huduud al‑balad
13 Wa Allah al‑Rabb gaal :
« Daahu huduud al‑balad al‑tigassumuuha warasa ambeenaatku intu gabaayil Bani Israaʼiil al‑atnaachar.
Wa zurriiyit Yuusuf gisimhum yabga marrateen.
14 Wa talgo warasatku ambeenaatku sawa sawa achaan ana halaft wa gult nantiiha le juduudku.
Wa l‑balad di tabga leeku warasa.
15 « Wa daahu huduud al‑balad.
Fi l‑munchaakh,
al‑huduud yugummu min al‑bahar al‑Abyad wa yamchu lahaddi derib Hatluun wa lahaddi Sadaad
16 wa Hamaat wa Biruuta wa Sibraayim ambeen ard Dimachkh wa ard Hamaat wa min Hasar Tikuun ale huduud Hooraan.
17 Wa misil da,
al‑huduud yamchu min al‑bahar al‑Abyad lahaddi Hasar Eenaan fi ard Dimachkh wa yufuutu ard Hamaat ale jiihat al‑munchaakh.
18 « Wa fi l‑sabaah,
al‑huduud yugummu min been Hooraan wa ard Dimachkh wa yamchu been Gilʼaad wa balad Israaʼiil.
Waadi al‑Urdun yabga huduudku lahaddi l‑bahar al‑Mayyit.
Wa da ale jiihat al‑sabaah.
19 « Wa fi l‑wati fi saharat Nagab,
al‑huduud yugummu min Taamaar wa yamchu lahaddi almi Mariiba hana Khaadich wa lahaddi waadi Masir wa lahaddi l‑bahar al‑Abyad.
Wa da ale jiihat al‑Nagab fi l‑wati.
20 « Wa fi l‑kharib,
al‑huduud humman al‑bahar al‑Abyad.
Wa l‑huduud yamchu min huduud al‑wati lahaddi bakaan al‑mugaabil Labu Hamaat fi l‑munchaakh.
Wa da ale jiihat al‑kharib.
21 « Ya Bani Israaʼiil,
gassumu al‑balad di ambeenaatku hasab gabaayilku.
22 Wa gassumu al‑balad di warasa ambeenaatku be amʼiyeedaat le nufuusku wa l‑ajaanib al‑saakniin maʼaaku wa wildo iyaalhum fi usutku wa bigo muwaatiniin maʼaaku intu Bani Israaʼiil.
Wa humman yalgo gisimhum hana l‑balad di be amʼiyeedaat maʼaaku fi lubb gabaayil Bani Israaʼiil.
23 Wa le ayyi ajnabi,
tantuuh warasatah fi lubb al‑gabiila al‑hu saakin maʼaaha.
» Wa da kalaam Allah al‑Rabb.